5 ناۋرىزدا تۇنگى ساعات 1-لەر شاماسىندا قاراعاندى وبلىسىنىڭ شەت اۋدانىنداعى اقسۋ-ايۋلى كەنتىنەن 30 شاقىرىم قاشىقتا «الماتى-ەكاتەرينبۋرگ» اۆتوجولىندا «گازەل» اۆتوكولىگىنىڭ 34 جاستاعى جۇرگىزۋشىسى قارسى بەتكە شىعىپ كەتىپ, «تاراز-نۇر-سۇلتان» باعىتىمەن كەلە جاتقان 56 جاستاعى جۇرگىزۋشىنىڭ باسقارۋىنداعى «VAN HOOL» ماركالى اۆتوبۋسپەن سوقتىعىسقان.
«جول اپاتى سالدارىنان «گازەل» اۆتوكولىگىنىڭ جۇرگىزۋشىسى مەن 24 جاستاعى جولاۋشىسى, سونداي-اق 37 جاستاعى اۆتوبۋستىڭ ەكىنشى جۇرگىزۋشىسى العان جاراقاتىنان وقيعا ورنىندا كوز جۇمدى. جول اپاتى كەزىندە اۆتوبۋستا ءتورت جولاۋشى بولعان», دەپ حابارلادى قاراعاندى وبلىسى پد ءباسپاسوز قىزمەتى.
اتالعان فاكتى بويىنشا قىلمىستىق كودەكستىڭ 345-بابى 4-بولىگى بويىنشا قىلمىستىق ءىس تىركەلدى. ءتيىستى ساراپتامالار تاعايىندالدى, تەرگەۋ جۇرگىزىلىپ جاتىر. قاراعاندى وبلىسىنىڭ پوليتسيا دەپارتامەنتى جۇرگىزۋشىلەرگە جول قوزعالىسى ەرەجەسىن ساقتاۋدى جانە جىلدامدىقتى اسىرماۋدى ەسكەرتەدى.
