ايماقتار • 05 ناۋرىز، 2021

التىن قولدى باتىر اپاي اۋىل اۋرۋحاناسىندا ەڭبەك ەتەدى

84 رەت كورسەتىلدى

مەدبيكە ءلاززات يلياسقىزىن اۋىلداعى اعايىن «التىن قولدى باتىر اپاي» دەپ اتايدى ەكەن. مۇنىڭ وزىندىك سەبەبى بار. ويتكەنى كەيىپكەرىمىز قازىر تاريحقا اينالعان اۋعان سوعىسىنا قاتىسىپتى. ودان كەيىنگى ەڭبەك جولى اۋىلداعى اۋرۋحانادا جالعاسىپ، قاتارداعى مەدبيكە بولىپ زەينەتكە شىققان. ءالى دە قاتاردان قالماي، دەنساۋلىق كۇزەتىندە ءجۇر.

باسشي اۋىلى – الماتى وبلىسىنىڭ كەربۇلاق پەن پانفيلوۆ اۋداندارىنىڭ شەكاراسىنا ورنالاسقان ءوڭىر. اكىمشىلىك ءبولىنىسى جاعىنان كەربۇلاق اۋدانىنا قارايتىن وكرۋگتە 3 مىڭنان اسا تۇرعىن بار. باسشيدەگى اۋرۋ­حا­نا وسى اۋماقتاعى ءۇش اۋىلدىڭ ادامىنا مەديتسينالىق قىزمەت كورسەتەدى. ورتالىقتان شالعايداعى بارلىق اۋىلعا ءتان ماسەلە بۇل ماڭعا دا جات ەمەس. اسىرەسە كادر تاپشىلىعى قاتتى سەزىلەتىنىن ايتۋىمىز كەرەك. بۇگىندە اۋىلدىق اۋرۋحانادا جوعارى ءبىلىمدى ەكى مامان دارىگەر عانا جۇمىس ىستەيدى ەكەن. ورتا بۋىن مەديتسينا قىزمەتكەرلەرىنە دە سۇرانىس بار. جۇمىس ىزدەپ كەلگەن جاستار كوبىنە قايتادان قالا جاعالاپ كەتەدى ەكەن. اۋرۋحانا باسشىلىعى ءلاززات اپايدى بوساعان ورىنعا اتتاي قالاپ، مەدبيكەلىك جۇمىسىن جالعاستىرۋعا شاقىرىپ الىپتى. تاجىريبەلى مامانعا ارىپتەستەرى دە، دەرتىنە شيپا ىزدەگەن ناۋقاستار دا ءدان ريزا.

اپاي اۋعان سوعىسىنا قاتىستى ەستەلىك ايتۋعا اسا ىقىلاستى ەمەس ەكەن. سانانى سىزداتاتىن وقيعانى قايتا جاڭعىرتۋ اۋىر بولسا كەرەك. ءارى ول زاماندا مەديتسينا ماماندىعىندا وقىعاندار ءۇشىن اسكەري مىندەتىن اتقارۋ پارىز بولعان. مەدۋچيليششەنى اياقتاپ، ەڭبەككە ارالاسقان ءلاززات سارجانوۆانى دا سوعىس ءورتى ءورشىپ تۇرعان اۋعان ەلىنە سول مىندەت جەتەلەپ اپارىپتى. العاشىندا كەيىپكەرىمىزدى اسكەري كوميسساريات پولشاداعى اسكەري كونتينگەنتكە قىزمەت ەتۋگە شاقىرادى دا، كەيىننەن اۋعانستانعا جىبەرەدى. بۇل – 1986 جىلى بولعان جاعداي. ازداعان دايىندىقتان كەيىن ءبىر توپ مەدبيكە مىنگەن ۇشاق اتاقتى باگرام اۋەجايىنا قونادى. بۇل جاقتا قيانكەسكى ۇرىس بولماسا دا، وقتىن-وقتىن اتىس قارۋىنىڭ داۋىسى ەستىلىپ تۇراتىن.

– سول جىلى كۇزدە اياق استى اتىس بولىپ كەتتى دە، اۋەدەن مينا جاۋعان شابۋىلدىڭ استىندا قالدىق. جارالانعان ادامدار كوپ بولدى. ءبىر جاس جاۋىنگەردىڭ اياعىن ج ۇلىپ كەتكەن ەكەن، جاراسىن تاڭىپ، قانىن ازەر توقتاتتىم. بايعۇس جىگىتتىڭ كوزىندەگى ۇرەي مەن ومىرگە دەگەن قۇشتارلىقتىڭ ارپالىسقانىن كورىپ، دەنەم تۇرشىكتى. باعىمىزعا قاراي، ءبىزدىڭ توبىمىز تۇگەلىمەن مىندەتىن وتەپ، امان ساۋ قايتتى، – دەيدى مەدبيكە.

ءلاززات يلياسقىزى ادام ومىرىنە اراشا تۇرۋعا بەرگەن سەرتىنەن اينىماي، مەدبيكەلىك جۇمىسىن بەيبىت كۇندە دە جالعاستىردى. 1993 جىلى وسى باسشي اۋىلىنىڭ ازاماتىمەن وتاۋ قۇرىپ، ورتالىقتان الىستاعى وڭىرگە كەلدى. سودان بەرى تاپجىلماي اۋىلدىق اۋرۋحانادا ەڭبەك ەتتى. زەينەتكە شىققان سوڭ ورنىن جاستارعا بەرگەن. كەيىننەن قىزمەتكەر جەتىسپەي، باس دارىگەر قايتادان اۋرۋحاناعا شاقىرىپ، جۇمىس ىستەۋگە كوندىرىپتى. قازىر قولى جەڭىل مەدبيكەنى اۋماقتاعى اعايىن قۇرمەتتەپ، ىزدەپ كەلىپ العىس ايتاتىن بولعان.

اۋىل تۇرعىندارىنىڭ العىسىنا بولەنگەن مەدبيكەنى بۇكىل اۋدان بىلەدى. اۋعانستانداعى اسكەري قىزمەتى ءۇشىن بىرنەشە جاۋىنگەرلىك مەدالمەن ماراپاتتالعان. ەڭبەكتەگى جەتىستىگى ەلەنىپ، «كەربۇلاق اۋدانىنىڭ قۇرمەتتى ازاماتى» اتاعىن العان. ەل-جۇرتقا سىيلى، اۋلەتىنە اياۋلى. داڭقتى مەدبيكە بۇگىندە اۋىلدىق اۋرۋحاناعا جولدامامەن كەلگەن جاس ماماندارعا اقىلشى ۇستاز دا بولىپ ءجۇر. وڭىردەگى ەل ءومىرىنىڭ ءبىر جارقىن ءساتى وسىنداي جاندارمەن نۇرلى ەكەنى داۋسىز.

 

الماتى وبلىسى

 

سوڭعى جاڭالىقتار

تۇركىستانعا 3000 جىل

رۋحانيات • بۇگىن، 12:10

2002 ادام كوروناۆيرۋستان ەمدەلىپ شىقتى

كوروناۆيرۋس • بۇگىن، 09:32

سارىالا قازدىڭ قاڭقىلى ەستىلدى

رۋحانيات • بۇگىن، 08:51

قور نارىعى قىمباتتادى

الەم • بۇگىن، 08:33

بابا اماناتىنا ادالدىق

رۋحانيات • بۇگىن، 08:07

بالۋاننىڭ العاشقى التىنى

كۇرەس • بۇگىن، 08:02

پسج ەسە قايتاردى

فۋتبول • بۇگىن، 07:59

جارىستى جەڭىسپەن باستادى

بوكس • بۇگىن، 07:56

جاقاەۆتىڭ تاقياسى

رۋحانيات • بۇگىن، 07:47

شىلىكتى اۋىلىن سۋ باستى

ايماقتار • بۇگىن، 07:44

Ever Given مىسىردا قالدى

الەم • بۇگىن، 07:28

جەر تۋرالى زاڭ سەناتقا جولداندى

پارلامەنت • بۇگىن، 07:22

ۇقساس جاڭالىقتار