قوعام • 03 ناۋرىز، 2021

188 ميلليارد تەڭگە جىمقىرعان 4 ەكس-بانكيرگە سوت ۇكىمى شىقتى

3356 رەت كورسەتىلدى

الماتى قالاسىندا «Bank RBK»، «Qazaq Banki» جانە «Eurasian Bank» بانكتەرىنەن 188 ميلليارد تەڭگەدەن استام قاراجاتتى جىمقىرۋ ءىسى بويىنشا سوت ۇكىمى شىقتى، دەپ حابارلايدى Egemen.kz

ايىپتىلاردىڭ قاتارىندا ەكس-بانكير جومارت ەرتاەۆ، استىق وليگارحى نۇرلان تىلەۋباەۆ، ءالىمجان تىلەۋباەۆ، اقان سۇلتانوۆ، سەرىك اتاباي جانە وكسانا شەستاكوۆا بار. قىلمىستىق ءىستىڭ ماتەريالدارى نەگىزىندە نۇرلان تىلەۋباەۆ جومارت ەرتاەۆتىڭ كومەگىمەن قامتاماسىز ەتىلمەگەن استىق قولحاتتارى ارقىلى نەسيە العان. سونىمەن قاتار، ەرتاەۆ تىلەۋباەۆتى ءوزى ىقپال ەتە الاتىن ارىپتەستەرىمەن تانىستىرعان. ال تلەۋباەۆ بولسا، اقشانىڭ ءبىر بولىگىن ەرتاەۆقا اۋدارۋى كەرەك بولدى.

سوت جومارت ەرتاەۆتى قىلمىستىق توپ قۇرعانى جانە الاياقتىق جاساعانى ءۇشىن كىنالى دەپ تانىپ، 9 جىلعا باس بوستاندىعىنان ايىردى. ال نۇرلان تىلەۋباەۆتى 10 جىل مەرزىمگە ماتەريالدىق جاۋاپكەرشىلىككە بايلانىستى لاۋازىمداردى اتقارۋ قۇقىعىنان ايىرا وتىرىپ 9 جىلعا سوتتالدى. ول جازاسىن قاۋىپسىزدىگى ورتاشا كولونيادا وتەيتىن بولدى. ءالىمجان تىلەۋباەۆقا ءىرى كولەمدە الاياقتىق جاسادى دەگەن ايىپ تاعىلدى.

سوت ونى 5 جارىم جىلعا سوتتادى. پارا بوپسالادى دەپ ايىپتالعان اقان سۇلتانوۆ كىنالى دەپ تانىلدى. بىراق ول شاعىمدانۋ مەرزىمىنىڭ اياقتالۋىنا بايلانىستى جازادان بوساتىلدى. اسا ءىرى كولەمدە الاياقتىق جانە جالعان قۇجاتتار جاساۋ، ولاردى ساتۋ بويىنشا ايىپتالعان وكسانا شەستاكوۆا مەن سەرىك اتابايعا باس بوستاندىعىنان ايىرۋ جازاسى تاعايىندالدى. سەرىك اتاباي – 5 جارىم جىلعا، ال شەستاكوۆ 5 جىلعا سوتتالدى.

ەكەۋى دە جازالارىن قاۋىپسىزدىگى ورتاشا كولونيادا وتەيتىن بولادى. سوت نۇرلان تىلەۋباەۆ، ءالىمجان تىلەۋباۆا، جومارت ەرتاەۆ، سەرىك اتاباي، وكسانا شەستاكوۆادان «DSFK (دسفك) ارنايى قارجى كومپانياسى» جشس-ءنىڭ پايداسىنا 97 ملرد تەڭگەدەن استام جانە مەملەكەتكە 2 ملرد تەڭگەدەن استام باج سالىعىن ءوندىرىپ الۋ تۋرالى شەشىم شىعاردى. ال 46 ملرد تەڭگەدەن استام جانە 1 ميلليارد تەڭگەدەن استام مەملەكەتتىك باج «Qazaq Banki» پايداسىنا بولسا، 24 ملرد-تان استام تەڭگە جانە 725 ميلليون تەڭگە مەملەكەتتىك باج سالىعى «ەۋرازيالىق بانك» اق پايداسىنا بولماق. ايىپتىلارعا ازاماتتىق ءىستى اياقتاۋعا ەكى اي ۋاقىت بەرىلدى.

ايتا كەتۋ كەرەك، ەكس-بانكير جومارت ەرتاەۆ 2018 جىلدىڭ مامىرىندا ماسكەۋدە ۇستالعان بولاتىن. وعان اسا ءىرى كولەمدە قارجى جىمقىردى دەگەن ايىپ تاعىلدى. بىرنەشە ايعا سوزىلعان سوت پروتسەسىنەن سوڭ جومارت ەرتاەۆ Bank RBK تيەسىلى 140 ملرد تەڭگەنى جىمقىردى دەپ ايىپتالىپ، 11 جىلعا سوتتالعان ەدى.

سوڭعى جاڭالىقتار

ۇقساس جاڭالىقتار