وبلىس ورتالىعىندا ءوتىپ جاتقان قۇسبەگىلەردىڭ رەسپۋبليكالىق XV چەمپيوناتىنا وننان استام بۇركىتشى قاتىستى. بۇركىت قانا ەمەس, يتەلگى مەن قارشىعا ۇشىرعاندار دا بولدى.
ۇلتتىق سپورت قاۋىمداستىعىنىڭ ۇيىمداستىرۋىمەن ءوتىپ جاتقان جارىستىڭ شارتى بويىنشا العاشقى كۇنى قۇستاردى شىرعاعا سالىپ, ىرىكتەۋدەن وتكىزدى. ەكىنشى كۇنى ىرىكتەۋدەن وتكەندەرى قويانعا ءتۇستى. بۇركىتتىڭ تەگەۋرىنى كورىنگەندە, قوياندار شالت بۇرىلىپ قاشا ما دەپ ەدىك, جوق, كەرىسىنشە جاتا قالىستى. قولدا وسكەن قوياندار عوي, ورعي جونەلمەدى. ءاي بىراق, قاسقىرعا ءتۇسىپ جۇرگەن قىراننان قويانىڭ قالاي قاشسا دا قۇتىلسىن با؟!
قولىنا بۇركىت قوندىرىپ, بەلىنە كۇمىس بەلبەۋ تاققان بۇركىتشىلەرگە ريزا كوزبەن قاراستى ءبارى. ۇلتتىق قۇندىلىقتى دارىپتەپ جۇرگەن ازاماتتار عوي. جۇيرىك باپتاپ, بايگەگە قوسۋ قانداي قيىن بولسا, قىران قۇستىڭ بابى دا ودان كەم تۇسپەيدى.
– جەتى اتامىزدان بەرى بوساعامىزدان قۇس كەتپەگەن. اتادان مۇرا بولىپ كەلە جاتقان سوڭ, بۇركىت باپتاپ وتىرمىز. كوك بايراعىمىزدا دا بەينەلەنگەن قاسيەتتى قۇس. بابى ەندى, قيىن. جاس ەت تاۋىپ بەرۋ دە وڭاي ەمەس, – دەيدى ۇرجارلىق قۇسبەگى ىرىزدىق قاسەيىن.
اقساقال ايتقانداي, كۇندەلىكتى ازىعى بار, قوياسىن الۋ دەگەندەي كۇتىمدەرى تاعى بار. قۇس جىرتقىش بولعاندىقتان, ارا-تۇرا اڭعا سالىپ تۇرۋ كەرەك. ءۇرجار ءوڭىرى ۇلتتىق پاركتىڭ اۋماعىندا جاتقاندىقتان, قىراندى ءتۇز تاعىسىنا تۇسىرۋگە تىيىم سالىنعان. سول ءۇشىن ىرىزدىق قاسەيىن بۇركىتىن ءۇي قويانىنا سالىپ تۇرادى.
سونىمەن ءۇش كۇنگە سوزىلعان جارىس قورىتىندىسى بويىنشا III ورىندى الماتى وبلىسىنان كەلگەن ايان سەيىتجان قانجىعاسىنا بايلادى. II جۇلدەلى ورىن سوناۋ اتىراۋدان التايعا ات ارىتىپ كەلگەن ارمان قوشقاروۆقا بۇيىردى. ال I ورىن ءۇرجار اۋدانىنان كەلگەن بۇركىتشى نۇعىم قايدار ۇلىنا بەرىلدى.
شىعىس قازاقستان وبلىسى
