ونىڭ ايتۋىنشا, بۇگىندە سىر بويىنا باۋ-باقشا تۇقىمدارى مەن كوشەتتەر, قالامشالار كورشىلەس وبلىستاردان جەتكىزىلىپ وتىر.
– بۇل ورتالىقتى اشۋداعى ماقسات – وبلىس حالقىن ساپالى تۇقىمدارمەن قامتاماسىز ەتۋ, ايماق تۇرعىندارىنىڭ ەگىنشىلىككە دەگەن قىزىعۋشىلىعىن وياتۋ. بۇرىن جەمىس-جيدەك پەن كوكونىستىڭ نەشە ءتۇرى ەگىلگەن وڭىردە باقشا شارۋاشىلىعىن وركەندەتۋدى كوزدەيمىز. بۇل ءۇشىن تۇقىمنىڭ ساپاسىنا ەرەكشە ءمان بەرىپ وتىرمىز. وندىرۋشىلەرمەن تىعىز بايلانىس ورناتىپ, تۇقىمداردى وريگيناتورلاردان الۋدى جولعا قويدىق. تۇقىمدى شەت ەلدىك كومپانيالارمەن قوسا كورشىلەس شىمكەنت قالاسىنان, سونداي-اق جاڭاقورعان اۋدانىنداعى «سىر تابيعاتى» تۇقىم باعىنان دا الىپ وتىرمىز. جاڭاقورعاندىق ارىپتەستەرىمىزدىڭ جەرگىلىكتى جەمىس جانە ساندىك ەكپە اعاشتارىن وبلىس ورتالىعىنا جەتكىزەمىز, – دەيدى «جاسا اگرو» ورتالىعىنىڭ باسشىسى سامالبەك قوسانوۆ.
ورتالىقتا باۋ-باقشانى تامشىلاتىپ سۋارۋ ءۇشىن قاجەتتى قۇرالدار, تىڭايتقىشتار, جىلىجايعا كەرەكتى جابدىقتارعا دەيىن بار. كاسىپكەر ورتالىق جانىنان جىلىجاي دا سالىپ قويعان. بيىل ءتۇرلى كوكونىستەردىڭ 50 مىڭ كوشەتىن نارىققا شىعارماق, الداعى ۋاقىتتا ونىڭ كولەمىن 150-200 مىڭعا دەيىن ارتتىرادى. كوشەتتەردەن كەيىن جىلىجايعا قيار ەگىلەدى ەكەن.
كاسىپكەر-عالىم ورتالىقتان تۇقىم, باۋ-باقشاعا قاجەتتى وزگە دە زاتتاردى العاندارعا ءتۇرلى كەڭەس بەرىپ, ءونىمدى ودان ءارى جەتىلدىرۋگە كومەك كورسەتەتىنىن جەتكىزدى.
بۇدان بولەك الداعى ۋاقىتتا جۇمىسپەن قامتۋ ورتالىعىمەن تىعىز بايلانىس ورناتىپ, جۇمىسسىز جۇرگەن جانداردى باعباندىقتىڭ قىر-سىرىنا ۇيرەتۋدى, ولارعا بىلىكتىلىگىن ايقىندايتىن سەرتيفيكاتتار بەرۋدى كوزدەپ وتىر.
قىزىلوردا وبلىسى كاسىپكەرلەر پالاتاسى ديرەكتورىنىڭ ورىنباسارى پىرمۇحاممەد سىزدىقوۆ بىرنەشە جىل بۇرىن ءوڭىر ديقاندارى ءۇشىن باۋ-باقشا ونىمدەرىنە سۋبسيديا الۋ ۇلكەن ماسەلەگە اينالعانىن ايتادى. پالاتا وبلىستىق اۋىل شارۋاشىلىعى باسقارماسىمەن بىرلەسە وتىرىپ, بۇل پروبلەمانى مينيسترلىككە جەتكىزگەن. وسىنىڭ ناتيجەسىندە ايماق تۇرعىندارى 2019 جىلدان بەرى جەمىس-جيدەك, باۋ-باقشا وسىرگەنى ءۇشىن مەملەكەتتىك قولداۋعا يە بولىپ كەلەدى.
– بۇگىنگى اشىلعان ورتالىق وڭىردە جەرگىلىكتى ونىمدەردىڭ قاتارىن ارتتىرۋعا, ەگىستىك القاپتاردى ارتاراپتاندىرۋعا ۇلكەن ۇلەس قوسادى دەپ سەنەمىز. كاسىپكەرلەر پالاتاسى بۇل باستامانى قولدايدى, الدا دا كومەك كورسەتەمىز, – دەدى پ.سىزدىقوۆ.
قىزىلوردا وبلىسى
