ايماقتار • 03 ناۋرىز، 2021

ءبىر مىڭ ءتۇپ تال ەگىلدى

11 رەت كورسەتىلدى

العىس ايتۋ كۇنى اۋليەاتا وڭىرىندە دە وزىندىك ءسان-سالتاناتىمەن اتالىپ ءوتتى. ايتۋلى مەرەكە قارساڭىندا تارازدىقتار قالا ورتالىعىنداعى «اربات-1» اللەياسىندا ورنالاسقان «قازاق حالقىنا مىڭ العىس» مونۋمەنتىنە گۇل شوقتارىن قويدى. گۇل قويۋ راسىمىنە ءوڭىردىڭ زيالى قاۋىم وكىلدەرى، قالا تۇرعىندارى مەن قوناقتارى، وبلىستىق قازاقستان حالقى اسسامبلەياسىنىڭ مۇشەلەرى، ەتنومادەني بىرلەستىكتەردىڭ باسشىلارى مەن بەلسەندىلەرى، اسسامبلەيا جانىنداعى انالار كەڭەسىنىڭ وكىلدەرى مەن جەرگىلىكتى جاستار قاتىستى. اتالعان شاراعا جامبىل وبلىسىنىڭ اكىمى بەردىبەك ساپارباەۆ قاتىسىپ، كوپشىلىكتى قۇتتىقتادى.

«وسىدان بەس جىل بۇرىن قازاق­ستان­داعى ءتۇرلى ەتنوستاردىڭ وكىلدەرىن ءبىر شاڭىراققا توپتاستىرعان سوناۋ قيىن كەزەڭدەردى ەسكە تۇسىرەتىن تا­ماشا مەرەكە پايدا بولعان ەدى. اشار­شى­لىق، سوعىس جانە قۋعىن-سۇرگىن جىلدارى ءبىز ءبىر ءۇزىم ناندى ءبولىسىپ جەپ، ءبىر-ءبىرىمىزدىڭ ۇلتىمىزعا قاراماي دوستاسا بىلدىك. تاۋەلسىزدىك جىلدارىندا دا ءبىز باستى بايلىعىمىز – بەيبىتشىلىگىمىز بەن ىنتىماعىمىزدى ودان ءارى نىعايتا تۇستىك. ال، بۇل ءوز كەزەگىندە ەلىمىزدىڭ ەكونوميكالىق دامۋىنىڭ نەگىزى بولىپ تابىلاتىن تۇراقتىلىعىمىزدىڭ كەپىلى. ءاربىر ازامات ۇلتتار دوستىعىن نىعايتۋعا ءوز ۇلەسىن قوسۋى ءتيىس. وسى ورايدا مەن العىس ايتۋ كۇنى كوروناۆيرۋس پاندەمياسىنىڭ قيىن ساتتەرىندە حالىققا كورسەتكەن كومەك-قولداۋى ءۇشىن بارلىق ەتنومادەني بىرلەستىكتەر مەن وبلىس جاستارىنا العىسىمدى بىلدىرگىم كەلەدى»، دەدى اكىم.

سونىمەن قاتار مەرەكەلىك شارادا تاراز قالالىق وزبەك ەتنومادەني بىرلەستىگىنىڭ توراعاسى ابدۋراحمان زاينۋتدينوۆ پەن تاراز قالاسىنداعى №34 ورتا مەكتەپتىڭ ديرەكتورى، دۇنگەن ەتنومادەني بىرلەستىگىنىڭ مۇ­شە­سى دينارا نۇراليەۆا ءسوز الىپ، ەگە­مەن ەلىمىزدەگى بەيبىتشىلىك پەن تا­تۋ­لىق ءۇشىن العىس ءبىلدىردى.

العىس ايتۋ كۇنىنە ارنالعان شارادا ەتنومادەني بىرلەستىكتەر ءوز تاراپىنان 10 شاتىر تىگىپ، قولونەر جانە «دوستىق داستارقانى» ۇلتتىق تاعامدار كورمەسىن ۇيىمداستىردى. كوپشىلىك ءبىر-ءبىرىن مەرەكەمەن قۇت­تىق­تاپ، داستارقاننان ءدام تاتتى. ال ءىس-شارادا «قازاق» ەتنومادەني بىر­لەس­تىگىنىڭ مۇشەلەرى «قازاق وسى» ءانىن شىرقاسا، «وزبەك» ەتنومادەني بىرلەستىگىنىڭ مۇشەلەرى كوپشىلىككە ۇلتتىق اندەرىن تارتۋ ەتتى. سونداي-اق بۇل كۇنى تاراز قالاسىنىڭ بىرقاتار كوشەلەرىندە تال ەگۋ اكتسياسى باستاۋ الىپ، 1000 ءتۇپ تال ەگىلدى. اتالعان باس­تاما ءوڭىر اۋداندارىندا دا جالعاستى.

 

 

سوڭعى جاڭالىقتار

ۇقساس جاڭالىقتار