تاعايىنداۋ • 02 ناۋرىز، 2021

جامبىل وبلىسىندا بىرقاتار كادرلىق تاعايىنداۋلار بولدى

838 رەت كورسەتىلدى

بۇگىن جامبىل وبلىسىندا بىرقاتار كادرلىق وزگەرىستەر ورىن الدى. وبلىس اكىمى بەردىبەك ساپارباەۆتىڭ وكىمىمەن وبلىستىق ىشكى ساياسات باسقارماسىنىڭ باسشىسى بولىپ بەيقۇت جامانگوزوۆ تاعايىندالدى

ەڭبەك جولىن 1990 جىلى قورداي اۋدانى، شارباقتى اۋىلىنداعى №36 ن.ساۋرانباەۆ اتىنداعى ورتا مەكتەپتە مۇعالىم بولىپ باستاعان بەيقۇت جامانگوزوۆ ءار جىلدارى اتالعان مەكتەپتىڭ ديرەكتورى، قورداي اۋداندىق ءبىلىم ءبولىمى باسشىسىنىڭ ورىنباسارى، جامبىل وبلىستىق ءبىلىم باسقارماسى باسشىسىنىڭ ورىنباسارى قىزمەتتەرىن اتقارعان. سوڭعى ۋاقىتتا قورداي اۋدانى اكىمىنىڭ ورىنباسارى لاۋازىمىندا بولعان. جاڭا تاعايىندالعان باسقارما باسشىسىن وبلىس اكىمىنىڭ ورىنباسارى ەرجان جىلقىباەۆ ۇجىمعا تانىستىردى. ال، اتالعان باسقارمانى وسى ۋاقىتقا دەيىن باسقارعان داۋىل بەيسەنقۇلوۆ «Nur Otan» پارتياسى جامبىل وبلىستىق فيليالى توراعاسىنىڭ ءبىرىنشى ورىنباسارى لاۋازىمىنا جوعارىلاعان بولاتىن.

سونداي-اق، بۇگىن جامبىل وبلىسى اكىمىنىڭ وكىمىمەن قازاقستان رەسپۋبليكاسى پرەزيدەنتى اكىمشىلىگىنىڭ جانە اۋداندىق ءماسليحات دەپۋتاتتارىنىڭ كەلىسىمى نەگىزىندە بىرقاتار اۋدان اكىمدەرى اۋىستى. وسى ۋاقىتقا دەيىن قورداي اۋداندىق ءماسليحاتىنىڭ حاتشىسى قىزمەتىن اتقارىپ كەلگەن رۋسلان نۇرسيپاتوۆ مەركى اۋدانى اكىمىنىڭ لاۋازىمىنا تاعايىندالدى. اۋدان اكتيۆىنىڭ جيىنىنا ارنايى قاتىسقان جامبىل وبلىسىنىڭ اكىمى بەردىبەك ساپارباەۆ اۋداندى بەس جىل بويى باسقارعان مەيىرحان ومىربەكوۆتىڭ جۇمىسىنا جوعارى باعا بەرىپ، جاڭا اكىمدى مەركىلىكتەرگە تانىستىردى. اۋدان باسشىسىنىڭ جۇمىسىنا ساتتىلىك تىلەپ، بىرقاتار تاپسىرمالار جۇكتەدى.

سونىمەن قاتار، بۇگىن جۋالى اۋدانىنىڭ دا اكىمى اۋىستى. اۋدان اكىمىنىڭ ورىنتاعىنا ولجاس قارجاۋوۆ جايعاستى. ول وسى ۋاقىتقا دەيىن «تاراز» الەۋمەتتىك-كاسىپكەرلىك كورپوراتسياسى» اكتسيونەرلىك قوعامىنىڭ باسقارما توراعاسى قىزمەتىن اتقارىپ كەلدى. ال، بۇگىنگە دەيىن جۋالى اۋدانىنىڭ اكىمى بولىپ نارباي ەرگەبەكوۆ ىستەگەن بولاتىن.

 

جامبىل وبلىسى

 

 

 

 

 

 

 

   

 

 

   

 

 

 

 

 

 

سوڭعى جاڭالىقتار

ۇقساس جاڭالىقتار