قوعام • 02 ناۋرىز، 2021

الماتىدا مەديتسينالىق كادرلار تاپشىلىعىن ازايتۋ ءۇشىن جوبا جاسالدى

9 رەت كورسەتىلدى

ءدال قازىرگى كۇندەرى قالالىقتاردىڭ دەنساۋلىعى – الماتى اكىمدىگى جۇمىسىنىڭ باستى مىندەتىنە اينالىپ تۇر. سوندىقتان مەگاپوليستىڭ مەديتسينا ۇيىمدارىنداعى كادر تاپشىلىعىن ازايتۋ ءۇشىن جالپى قالالىق جوبا قابىلداندى.   ونىڭ ىشىندە قالاداعى ءولىم-ءجىتىمدى ازايتۋعا قاتىستى ءىس-شارالار جوسپارى دا بار، دەپ حابارلايدى Egemen.kz.

الماتى اكىمى ب.ساعىنتاەۆتىڭ توراعالىعىمەن وتكەن القا جيىنىندا 2020-2025 جىلدارى قالادا دەنساۋلىق ساقتاۋدى دامىتۋدىڭ مەملەكەتتىك باعدارلامالارىن ىسكە اسىرۋدىڭ قورىتىندىلارى، سونىمەن قاتار جالپى ءولىمدى، انا مەن بالا ولىمدەرىن ازايتۋ، كادر تاپشىلىعىن شەشۋ جانە الداعى كەزەڭدەگى مىندەتتەر تۋرالى ماسەلەلەر قارالدى.   

الماتىنىڭ مەديتسينالىق ۇيىمدارىنا 2 ميلليوننان استام ادام تىركەلگەن، ونىڭ 28،5%-ى 18 جاسقا دەيىنگى بالالار. مەديتسينالىق قىزمەتتەردى تمككك اياسىندا قوعامدىق دەنساۋلىق باسقارماسىنا باعىنىشتى 74 مەديتسينالىق ۇيىم، 13 رەسپۋبليكالىق جانە 90-نان استام جەكە مەديتسينالىق ۇيىمدار كورسەتەدى.

القا جيىنىندا اتالىپ وتكەندەي، دەنساۋلىق ساقتاۋ جۇيەسىنىڭ باستى مىندەتى مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ بولىپ تابىلادى. دەنساۋلىق ساقتاۋدى دامىتۋدىڭ مەملەكەتتىك باعدارلاماسى اياسىندا 24 كورسەتكىشتەر مەن ينديكاتورلاردىڭ 21-ءى بويىنشا جوسپارلى ماندەر ىسكە استى.

وسىعان وراي الماتى اكىمى باقىتجان ساعىنتاەۆ 2021 جىلى كورسەتكىشتەر مەن ينديكاتورلارعا قولجەتكىزۋ بويىنشا شارالار قابىلداۋدى، سونداي-اق جالپى ءولىمدى ازايتۋ بويىنشا ءىس-شارالار جوسپارىن جۇزەگە اسىرۋدى تاپسىردى. اسىرەسە، انالار مەن سابيلەر ءولىمىنىڭ الدىن-الۋعا جانە ولاردى ەسكەرتۋگە ەرەكشە نازار اۋدارۋ كەرەك. سونىمەن بىرگە، انا مەن بالانى قورعاۋ ءبولىمىنىڭ، امسك-ءتىڭ، ايەلدەر كونسۋلتاتسيالارى مەن بوسانۋعا كومەكتەسەتىن ۇيىمداردىڭ جۇمىستارى كۇشەيتىلەدى.

بۇگىنگى كۇنى مەگاپوليستىڭ مەملەكەتتىك مەديتسينالىق ۇيىمدارىندا 6 مىڭنان استام دارىگەر مەن 13 مىڭعا جۋىق ورتا مەديتسينالىق قىزمەتكەر جۇمىس ىستەيدى. ينفەكتسيالىق ستاتسيونارلاردىڭ، كوپبەيىندى كلينيكالاردىڭ جانە وتباسىلىق دارىگەرلىك امبۋلاتوريالاردىڭ قارقىندى سالىنۋى كادر تاپشىلىعىنىڭ وزەكتى ماسەلەگە اينالعانىن كورسەتۋدە.

قالانىڭ مەديتسينالىق ۇيىمدارىنا شامامەن 590 دارىگەر – انەستەزيولوگتار، پۋلمونولوگتار، كارديولوگتار، نەۆروپاتولوگتار جانە باسقالارى، سونداي-اق 300-گە جۋىق ورتا بۋىن قىزمەتكەر قاجەت.

تاياۋ جىلدارى جاڭا اۋرۋحانالار مەن ەمحانالاردىڭ اشىلاتىنىن ەسكەرە وتىرىپ، قالا اكىمى ب. ساعىنتاەۆ كادر تاپشىلىعىن تومەندەتۋ بويىنشا جالپىقالالىق جوبا قابىلداۋدى تاپسىردى. ءىس-شارالار جوسپارىندا تۇلەكتەردى جۇمىسقا ورنالاستىرۋ جانە مەديتسينالىق قىزمەتكەرلەردىڭ بىلىكتىلىگىن ارتتىرۋ ىسىنە جوعارى وقۋ ورىندارى مەن كوللەدجدەردى تارتۋ كەرەكتىگى كورسەتىلەتىن بولادى. ىنتالاندىرۋ تەتىكتەرى، ونىڭ ىشىندە KPI بويىنشا باعالاۋ، ۇستەماقى جانە الەۋمەتتىك قامسىزداندىرۋ، جەڭىلدەتىلگەن قالالىق باعدارلامالار بويىنشا تۇرعىن ءۇي ساتىپ الۋ مۇمكىندىكتەرى قاراستىرىلعان.

القالى جيىندا قالانىڭ دەنساۋلىق ساقتاۋ جۇيەسىن تاياۋ ارادا دامىتۋدىڭ مىندەتتەرى ايقىندالدى. كەزدەسۋدى قورىتىندىلاعان الماتى اكىمى ب. ساعىنتاەۆ وسىناۋ يگى ماقساتتاردى جۇزەگە اسىرۋدا قالا تاراپىنان تولىق قولداۋ كورسەتىلەتىنىن اتاپ ءوتتى، ويتكەنى اكىمدىك جۇمىسىنداعى ەڭ باستى باعىت قالا تۇرعىندارىنىڭ دەنساۋلىعى بولىپ تابىلادى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار