«بۇگىن قازاقستان مەن تۇركيا اراسىندا ديپلوماتيالىق قاتىناستارىنىڭ 29 جىلدىعىن اتاپ وتۋدەمىز.
تامىرى ورتاق تاريحىمىز بەن مادەني جانە رۋحاني بايلانىستارىمىزعا نەگىزدەلگەن تۇرىك-قازاق باۋىرلاستىعىنىڭ 30 جىلعا جۋىق ۋاقىت بويى نىعايىپ كەلە جاتقانىنا, ەلدەرىمىز اراسىنداعى ىنتىماقتاستىقتىڭ بارلىق سالادا دامىعانىنا ريزاشىلىقپەن كۋا بولۋدامىز.
ديپلوماتيالىق قاتىناستار ورناعاننان كەيىن ەلدەرىمىز اراسىندا قول قويىلعان كوپتەگەن كەلىسىمدەر مەن حاتتامالار قارىم-قاتىناسىمىز بەن ىنتىماقتاستىعىمىزدىڭ قۇقىقتىق نەگىزىن قالادى. دوس جانە باۋىرلاس ەل - قازاقستانمەن قارىم-قاتىناسىمىز ءوزارا سەنىم مەن ىنتىماقتاستىق تۇسىنىگى نەگىزىندە تەز دامىپ, بۇگىنگى كۇنى كوپ ولشەمدى ستراتەگيالىق ارىپتەستىك دەڭگەيىنە كوتەرىلدى.
قارىم-قاتىناسىمىز ساياسي سالادا دامىپ قانا قويماي, الەۋمەتتىك-گۋمانيتارلىق, ەكونوميكالىق, مادەني سىندى كەڭ اۋقىمدى سالالارداعى جەتىستىكتەر ەلدەرىمىزدى ءبىر-بىرىنە ودان ءارى جاقىنداستىرا تۇسۋدە. تۇركيادان قازاقستانعا قۇيىلعان ينۆەستيتسيانىڭ جالپى كولەمى 3,2 ملرد اقش دوللارىن قۇرادى. 2020 جىلى پاندەميا جاعدايىنا قاراماستان ەكىجاقتى ساۋدا اينالىمى 3 ملرد اقش دوللارىنان اسىپ ءتۇستى. بۇل كورسەتكىشتى الداعى ۋاقىتتا 5 ملرد دوللار, كەيىن 10 ملرد دوللارعا جەتكىزۋ, سونداي-اق بىرلەسكەن ينۆەستيتسيالارىمىزدى ساپالىق جانە ساندىق جاعىنان ۇلعايتۋ ءبىزدىڭ ورتاق ماقساتىمىز بولىپ وتىر.
ەلدەرىمىزدىڭ اراسىنداعى ءبىلىم جانە مادەني قاتىناستار دا حالىقتارىمىزدىڭ ءبىر-ءبىرىن جاقسىراق تانۋعا مۇمكىندىك بەرەدى. بۇگىنگى تاڭدا 5000-عا جۋىق قازاق ستۋدەنتتەرى ءبىزدىڭ ەلىمىزدە «تۇركيا ستيپەنديالارى» باعدارلاماسى اياسىندا باكالاۆريات, ماگيستراتۋرا جانە دوكتورانتۋرا بويىنشا ءبىلىم الدى.
ەكىجاقتى دەڭگەيدە دە كوپجاقتى پلاتفورمالاردا دا ەلدەرىمىز اراسىنداعى ستراتەگيالىق ارىپتەستىككە نەگىزدەلگەن تىعىز ىنتىماقتاستىعىمىز وڭىرلىك تۇراقتىلىق, بەيبىتشىلىك جانە وركەندەۋگە ماڭىزدى ۇلەستەر قوسۋدا.
وسى مۇمكىندىكتى پايدالانا وتىرىپ, تۇرىك جانە قازاق حالىقتارى اراسىنداعى مىزعىماس دوستىعىنىڭ ءاردايىم جالعاسۋىن تىلەپ, قازاقستان حالقىنا گۇلدەنۋ, تىنىشتىق پەن اماندىق تىلەكتەرىمىزدى ۇسىنامىز», دەلىنگەن حابارلامادا.
