2013 جىلى مەملەكەت باسشىسىنىڭ تاريحي باستاماسى – «بولاشاق» حالىقارالىق ستيپەندياسىنا 20 جىل تولدى
وتپەلى كەزەڭنىڭ قيىندىقتارىنا قاراماستان, قازاقستاننىڭ تۇڭعىش پرەزيدەنتى نۇرسۇلتان نازارباەۆ شەتەلدە جاڭا بۋىن كادرلارىن دايارلاۋ بويىنشا «بولاشاق» مەملەكەتتىك ستيپەندياسىن قۇرۋ جونىندە ستراتەگيالىق شەشىم قابىلدادى.
2013 جىلى مەملەكەت باسشىسىنىڭ تاريحي باستاماسى – «بولاشاق» حالىقارالىق ستيپەندياسىنا 20 جىل تولدى
وتپەلى كەزەڭنىڭ قيىندىقتارىنا قاراماستان, قازاقستاننىڭ تۇڭعىش پرەزيدەنتى نۇرسۇلتان نازارباەۆ شەتەلدە جاڭا بۋىن كادرلارىن دايارلاۋ بويىنشا «بولاشاق» مەملەكەتتىك ستيپەندياسىن قۇرۋ جونىندە ستراتەگيالىق شەشىم قابىلدادى.
قازىرگە دەيىن «بولاشاق» باعدارلاماسى بويىنشا يننوۆاتسيالىق جوبالار مەن تەحنولوگيالار, مەتاللۋرگيا, تەلەكوممۋنيكاتسيا, ەنەرگەتيكا سالالارىندا ەكى مىڭعا جۋىق ينجەنەرلىك-تەحنيكالىق مامان دايارلاندى.
تەحنيكالىق جانە مەديتسينالىق ماماندىقتار ستۋدەنتتەرىنە شەتەلدە وقۋ مۇمكىندىگىن بەرۋ دارىندى جاستارىمىزدىڭ الەۋەتىن ساپالىق جانە ساندىق جاعىنان ءوسىردى – قاجەتتىلىگى جوعارى تەحنيكالىق جانە مەديتسينالىق ماماندىقتاردىڭ ديپلومدى كادرلارىنىڭ سانى ەكى ەسەگە ءوستى.
«بولاشاق» باعدارلاماسى قازاقستانداعى العاشقى عىلىمي-زەرتتەۋ ۋنيۆەرسيتەتى – «نازارباەۆ ۋنيۆەرسيتەتىن» قۇرۋعا دا نەگىز بولدى.
2008 جىلدان باستاپ باعدارلاما بويىنشا وقۋ اۋىل جاستارى, عىلىمي جانە پەداگوگ كادرلار ءۇشىن قولجەتىمدى بولدى. ەلدىڭ قارقىندى دامۋى, جاڭا ونەركاسىپتىك وبەكتىلەردىڭ اشىلۋى, الەمدىك قوعامداستىققا تىعىز شوعىرلانۋ ەكونوميكانىڭ بارلىق سالالارىندا قىزمەتكەرلەردىڭ قۇزىرەتىن جاڭارتۋدى قاجەت ەتتى.
بۇل مىندەتتەردى شەشۋ ءۇشىن باعدارلاما تولىقتاي جەتىلدىرىلدى. مەملەكەت ستيپەنديانى ىسكە اسىرۋ ءپرينتسيپىن تۇبەگەيلى وزگەرتتى. اكادەميالىق وقۋدان باسقا, شەتەلدە عىلىمي جانە كاسىپتىك تاعىلىمدامالار ەنگىزىلدى. 2011 جىلدان باستاپ باعدارلاما جاسى ۇلكەن, تاجىريبەلى ادامدار ءۇشىن دە قولجەتىمدى بولدى.
«بولاشاق» تۇلەكتەرى اراسىنان ەلدى ۇدەمەلى يننوۆاتسيالىق يندۋسترياليزاتسيالاۋ جانە ءۇشىنشى ونەركاسىپتىك رەۆوليۋتسيانىڭ مىندەتتەرىن شەشۋ ءۇشىن ستيپەندياتتاردىڭ 43%-ى دايارلانعانىن اتاپ وتۋگە بولادى. بولاشاقتىق مامانداردىڭ ۇلتتىڭ ادامي كاپيتالىن تابىستى دامىتۋعا ارنالعان ۇلەسى – 15%, مەملەكەتتىك باسقارۋ جانە جوسپارلاۋ جۇيەسىن جاڭعىرتۋعا – 19%, ەلدە ۇلتتىق كاسىپكەرلىكتى جانە ورتا كلاستى, ىسكەرلىك رۋحىن, پراگماتيزم مەن باستاماشىلىقتى نىعايتۋعا – 15% جانە بولاشاق ەكونوميكانى قۇرۋعا – 8%.
ەلدىڭ نەگىزگى بايلىعى – ينتەللەكتۋالدى كاپيتالدى ءوسىرۋ يدەياسىنىڭ ۇزاق مەرزىمدى ستراتەگيالىق ماقساتتارى مەن مىندەتتەرى بولدى. بولاشاقتىقتاردىڭ ەلدە ودان ءارى رەفورمالار جاساۋ جانە قازاقستاندى الەمدىك ارەنادا تانىتۋ ميسسياسى 1994 جىلى پرەزيدەنتتىك ستيپەنديا يەگەرلەرىنىڭ ءبىرىنشى كەزدەسۋىندە بەلگىلەنگەن. بۇگىنگى كۇنى بۇل ميسسيانىڭ ەڭ باستى مىندەتى – «قازاقستان-2050» ستراتەگياسىن ىسكە اسىرۋ.
«بولاشاق» دامۋىنىڭ اعىمداعى كەزەڭىندە مەملەكەت نەگىزگى نازاردى عىلىمي جانە زەرتتەۋ قىزمەتىنە باعىتتالعان ماگيستراتۋرا جانە PhD دوكتورانتۋراسىنىڭ اكادەميالىق كۋرستارى بويىنشا كادرلار دايارلاۋعا ءبولدى.
«بولاشاق» باعدارلاماسى شەتەلدە وقىتۋدىڭ اكادەميالىق باعدارلامالارىنان باسقا, ءۇزدىك جوعارى وقۋ ورىندارىندا, عىلىمي ورتالىقتاردا, زەرتحانالار مەن الەمنىڭ ءىرى ءوندىرىستىك كاسىپورىندارىندا تاعىلىمدامالاردىڭ كەڭ سپەكتورىن ۇسىنادى. ءتورت سانات: ينجەنەرلىك-تەحنيكالىق, مەديتسينالىق, عىلىمي جانە پەداگوگ قىزمەتكەرلەر دايارلانۋدا. تاعىلىمدامالار – بۇل جاسى ۇلكەن كادرلاردى قىسقا مەرزىمدە جىلدام دايارلاۋدىڭ جاقسى ءتاسىلى, سەبەبى, ودان ەكونوميكانىڭ ءتۇرلى سەكتورلارىنىڭ وكىلدەرى, كاسىپورىن, عىلىمي ۇيىمداردىڭ قىزمەتكەرلەرى وتەدى. ساراپشىلاردىڭ پىكىرى بويىنشا, جاڭا باعىت – كاسىپتىك تاعىلىمدامالار بىلىكتى كادرلارعا ەل ەكونوميكاسىنىڭ قاجەتتىلىگىن قامتاماسىز ەتۋگە جانە ءوندىرىس پەن تەحنولوگيالار ترانسفەرىنىڭ شەتەلدىك تاجىريبەسىن زەردەلەۋگە ىقپال ەتەدى.
قازىرگى ستيپەندياتتارعا كەلەتىن بولساق, بۇل كۇندەرى الەمنىڭ 33 ەلىندە 2532 بولاشاقتىق ءبىلىم الۋدا. ستيپەندياتتاردىڭ ۇشتەن ءبىر بولىگى اقش-تا, جارتىسىنا جۋىعى – ۇلىبريتانيا مەن يرلانديادا, 15%-ى – ەۋروپادا, قالعاندارى – ازيا, اۆستراليا جانە تمد ەلدەرىندە. ستيپەندياتتارىمىزدىڭ جارتىسىنا جۋىعى – ماگيستراتۋرا باعدارلاماسىنىڭ ستۋدەنتتەرى (42%). ستيپەندياتتاردىڭ ۇشتەن ءبىر بولىگى باكالاۆريات باعدارلاماسى بويىنشا وقۋلارىن جالعاستىرۋدا (31%). 2015 جىلعا قاراي 350 ديپلومدى باكالاۆر وقۋىن اياقتايدى, 2017 جىلى تاعى 450 ستيپەنديات وقۋلارىن ءتامامدايدى دەپ كۇتىلۋدە.
20 جىل ىشىندە ستيپەنديانى ىسكە اسىرۋدىڭ بارلىق جەتىستىكتەرى مەن ناتيجەلەرى مەرەيتويلىق جىلدىڭ ۇلكەن وقيعاسى بولعان استانا قالاسىندا 29 قاراشادا ن.ءا.نازارباەۆتىڭ قاتىسۋىمەن وتكەن «بولاشاق» حالىقارالىق ستيپەندياسى ستيپەندياتتارى مەن تۇلەكتەرىنىڭ فورۋمىندا ەگجەي-تەگجەيلى ايتىلدى. تاۋەلسىزدىك سارايىندا وتكەن ءىس-شاراعا ەلىمىزدىڭ ءتۇرلى وڭىرلەرىنەن 1500-گە جۋىق ستيپەنديات قاتىستى. فورۋمدا «بولاشاق» حالىقارالىق ستيپەندياسىنىڭ 20 جىل ىشىندەگى جۇمىسىنىڭ قورىتىندىسى شىعارىلىپ, «قازاقستان-2050» ستراتەگياسىن ىسكە اسىرۋداعى وسى باعدارلامانىڭ جاڭا مىندەتتەرى انىقتالدى.
مەملەكەت باسشىسى ءوز سوزىندە «بولاشاق» باعدارلاماسىن قۇرۋ سەنىمدى ستراتەگيالىق تاڭداۋ بولعاندىعىن جانە بۇگىنگى كۇنى ەگەمەندى قازاقستان تاريحىنداعى «التىن پاراقتاردىڭ» ءبىرىنە اينالعانىن اتاپ ءوتتى. رەسپۋبليكانىڭ «قازاقستان-2030» ستراتەگياسىن قىسقا مەرزىمدە تابىستى ىسكە اسىرۋداعى تاريحي جەتىستىگىنە «بولاشاق» باعدارلاماسى تۇلەكتەرىنىڭ قوسقان ۇلەستەرى از ەمەس.
پرەزيدەنت «بولاشاق» باعدارلاماسىنىڭ تۇلەكتەرى, ستيپەندياتتارى «قازاقستان-2050» ستراتەگياسىنىڭ بەلسەندى جاقتاۋشىلارى بولادى, سونداي-اق, بولاشاققا نەگىز سالا وتىرىپ, پەرسپەكتيۆالىق تەحنولوگيالاردى ازىرلەۋ جانە ەنگىزۋ پروتسەسىنە بەلسەندى قاتىساتىن بولادى دەپ سەنىممەن ايتتى.
ەلباسىنىڭ «بولاشاق» باعدارلاماسى نەگىزىندە «قازاقستان-2050» جالپىۇلتتىق قوزعالىسىن قۇرۋ تۋرالى ۇسىنىسى فورۋم قاتىسۋشىلارى ءۇشىن كۇتپەگەن وقيعا بولدى. ەل پرەزيدەنتى: «قازاقستان-2050» ستراتەگياسى – بۇل ءححى عاسىرداعى ءبىزدىڭ ۇلتتىق يدەيامىز, ول حالقىمىز ىنتا قويعان قۇندىلىقتاردى, ماقساتتاردى انىقتايتىن بولادى», – دەدى.
بۇل ۇسىنىستى بولاشاقتىقتار دا, قازاقستاننىڭ بارلىق پروگرەسسيۆتى جاستارى دا قۇلشىنىسپەن قابىل الدى. قازاقستاندىقتاردىڭ باستاماشىل توبى پرەزيدەنتتىڭ ۇسىنىسىن قولداي وتىرىپ, «قازاقستان-2050» جالپىۇلتتىق قوزعالىسىنىڭ قۇرىلعانىن جاريالادى. جاڭا قوزعالىستىڭ نەگىزگى مىندەتى قازاقستان رەسپۋبليكاسىنىڭ تۇڭعىش پرەزيدەنتىنىڭ «قازاقستان-2050» ستراتەگياسىندا ايتىلعان ساياسي باعىتىن قولداۋ ارقىلى قازاقستاننىڭ الەمنىڭ نەعۇرلىم دامىعان 30 ەلىنىڭ قاتارىنا ەنۋىن قامتاماسىز ەتۋ بولىپ تابىلادى.
عاني نىعىمەتوۆ,
«حالىقارالىق باعدارلامالار
ورتالىعى» اق پرەزيدەنتى.
