اقش جامال حاششوگي ءىسىن قايتا تەرگەيدى
ساۋد ارابياسى اقش-تىڭ جۋرناليست جامال حاششوگيدى ءولتىرۋ جونىندەگى تاپسىرىستى مەملەكەتتىڭ حانزاداسى موحاممەد بين سالمان بەردى دەگەن ايىپپەن كەلىسپەيتىنىن مالىمدەدى.
ساۋديالىق جۋرناليست جامال حاششوگي 2018 جىلى ساۋد ارابياسىنىڭ ىستانبۇلداعى كونسۋلدىعىندا ولتىرىلگەن بولاتىن. وسىعان بايلانىستى اقش ۇكىمەتى جۋرناليست ساۋد ارابياسىنىڭ لاۋازىمدى تۇلعالارىنىڭ «تاپسىرىسىمەن» ءولتىرىلدى دەگەن پىكىرىن ءبىلدىردى. وتكەن اپتادا ساۋد ارابياسى سىرتقى ىستەر ءمينيسترى ايىپتى تەرىسكە شىعارىپ, اقپاراتتىڭ جالعان ەكەنىن مالىمدەدى.
بايدەن اكىمشىلىگى كورولدىكتى كىسى ولىمىنە قاتىستى جاۋاپكەرشىلىكتى وزىنە الۋعا شاقىرادى. بۇل وقيعاعا باسقا مەملەكەتتەر مەن بىرقاتار حالىقارالىق ۇيىم الاڭداۋشىلىق تانىتقان-دى. ماسەلەن, ۇلىبريتانيا بۇل ءىستىڭ تۇبەگەيلى زەرتتەلىپ, تەرگەلۋى كەرەكتىگىن, وعان قوسا, وسى ولىمگە قاتىستى دەگەن كۇدىككە ىلىنگەن 20 لاۋازىمدى تۇلعاعا سانكتسيا جاريالايتىنىن مالىمدەدى.
بۇۇ-نىڭ سوتتان تىس ماسەلەلەر بويىنشا ارنايى وكىلى اگنەس كاللامارد الەۋمەتتىك جەلىدەگى پاراقشالارىنىڭ بىرىندە اقش-تىڭ دايىنداعان قۇجاتى ساۋد ارابياسى ۇكىمەتىنىڭ بۇل وقيعاعا قاتىسى بارىن جوعارى دەڭگەيدە دالەلدەدى دەگەن پىكىرىمەن ءبولىستى. «ەندى اقش ۇكىمەتى دە بۇل قىلمىسقا قاتىستى جاۋاپكەرشىلىك تانىتىپ, كەلەشەكتە حالىقارالىق مەحانيزمدە وسىنداي قىلمىستىڭ الدىن الىپ ءتيىستى جازاسىن بەرۋدە ءوز ورنىن تابۋى ءتيىس. اقش موحامماد بين سالمان حانزاداعا سانكتسيا جاريالاسىن», دەيدى وكىل. بۇل مالىمدەمە بايدەننىڭ ساۋديالىق حانزاداعا قاتىستى تاققان ايىبىنان ءبىر كۇننەن كەيىن جاريالاندى.
حانزادا بولسا, قىلمىس اشكەرەلەنگەن كۇننەن بەرى بۇل وقيعاعا قاتىستى جاۋاپكەرشىلىكتى الاتىنىن, الايدا وعان «تاپسىرىس بەرمەگەنىن» مالىمدەدى. دەگەنمەن, جاۋاپتى تۇلعالار جۋرناليست ولىمىنە قاتىستى 8 ادامدى تاپقانىن حابارلاعان-دى. ۇكىمەت ولاردىڭ كىم ەكەنىن ءالى اشىپ ايتپادى.
دومينيكان شەكاراسىن شەگەندەيدى
دومينيكان رەسپۋبليكاسى شەكاراسىن شەگەندەگىسى كەلەتىنىن حابارلادى. ەل پرەزيدەنتى لۋيس ابينادەر گايتيمەن شەكتەسەتىن ايماقتى ناقتىلاپ, ەكى ارادا شەكارا تۇرعىزعىسى كەلەتىن نيەتىن ءبىلدىردى.
رەسمي اقپارات بويىنشا, اتالعان جەردەگى ايماق 380 شاقىرىمدى قۇرايدى ەكەن. پرەزيدەنت بۇل شەشىمىن اراداعى زاڭسىز كوشى-قونعا نۇكتە قويىپ, ماشينا ۇرلاۋ مەن ەسىرتكى تاسىمالىن توقتاتۋ قاجەتتىگىمەن ءتۇسىندىردى.
ابينادەر شەكارا شەگەندەۋ جۇمىسى بيىلدان قالمايتىنىن مالىمدەدى. ەكى ەل كاريب ارالدارىن ءبولىسىپ وتىر. ال گايتي – سول ايماقتاعى ەڭ كەدەي مەملەكەت. ەكى ەل اراسىنداعى قاتىناس اۋەلدەن شيەلەنىسكە تولى. «الداعى ەكى جىل ىشىندە كورشىلەس ەلدەر اراسىنداعى ماسەلەلەرگە نۇكتە قويىپ, ۇرلانعان زاتتار, ەسىرتكىنىڭ تاسىمالىن توقتاتۋعا كۇش سالامىز. اراداعى پروبلەمالى ايماقتاردا ەكى قاتارلى شەكارا سالىنادى. سونىمەن قاتار ونداي جەرلەرگە كامەرا ورناتۋدى جوسپارلاپ وتىرمىز», دەدى پرەزيدەنت.
جوبا قۇنى ازىرگە بەلگىسىز. دەگەنمەن دومينيكان ۇكىمەتى جوباسىن دايىنداپ, شەكارا بەلگىلەۋ بويىنشا جۇمىسقا كىرىسىپ كەتكەن.
ەكى ەل اراسىنداعى شيەلەنىستەر, نەگىزىنەن وسى كوشى-قون ماسەلەسىنە قاتىستى تۋىندايدى. دومينيكان رەسپۋبليكاسى حالقىنىڭ سانى – 11 ميلليون. دەگەنمەن, ونداعى زاڭسىز جۇرگەن گايتي ازاماتتارىنىڭ سانى ميلليونعا جەتىپ جىعىلادى. بيىل قاڭتاردا دومينيكان ۇكىمەتى گايتي ۇكىمەتىنەن ەلدەن جىراقتا جۇرگەن ازاماتتارىنا ارنايى قۇجات بەرىپ, بۇل ماسەلەنى باقىلاۋىنا الۋدى تاپسىرعان ەدى.
2015 جىلى گايتي دومينيكان رەسپۋبليكاسىنان مىڭداعان ازاماتىن جوسپارلى تۇردە ەلىنە قايتارۋ باعدارلاماسىن توقتاتۋدى سۇراعان بولاتىن. ال ءوز وتانىنا ورالۋدى قالامايتىن ادامدار ەكى ەل شەكاراسىندا لاگەرلەر قۇرىپ, سول جاقتا ءومىر سۇرەتىن. بۇل ماسەلەنىڭ شەشىمى تابىلماي جۇرگەنىنە 100 جىلعا جۋىق ۋاقىت ءوتتى. دومينيكاندىقتاردىڭ ەندىگى ءۇمىتى – جاڭا جوسپاردا.
دايىنداعان
سۆەتلانا عالىمجانقىزى,
«Egemen Qazaqstan»
