تۇراقتى چەمپيوناتتىڭ كەزەكتى تۋر ويىنىن وتكىزۋ ءۇشىن نۇر-سۇلتانعا ساپار شەككەن ولەگ بولياكين شاكىرتتەرى جەرگىلىكتى «سنەجنىە بارسى» كلۋبىمەن مۇزايدىندا ەكى مارتە جولىعىپ, ەكەۋىندە دە قارسىلاستارىن ءىرى ەسەپپەن جەڭدى. العاشقى ويىندا 6:1 ەسەبى تىركەلسە, كەيىنگى ماتچتا تورپەدولىقتار «قار بارىستارىنىڭ» قاقپاسىنا سەگىز بىردەي شايبا سوقتى. قورىتىندى ەسەپ – 8:1. وسىنداي جارقىن جەڭىسىنەن سوڭ «تورپەدو» شايبالى حوككەيدەن ەل چەمپيوناتىنداعى 42 كەزدەسۋدەن كەيىن 108 ۇپاي جيناپ, تۋرنير كەستەسىندە وزىنەن كەيىن تۇرعان «تەمىرتاۋ» كلۋبىنان باقانداي 27 ۇپايعا وزىپ كەتتى. تەمىرتاۋلىقتار بىرىنشىلىك سوڭىنا دەيىن بارلىق ويىندا جەڭىسكە جەتىپ, ال «تورپەدو» كەرىسىنشە بۇكىل ماتچتا جەڭىلگەن كۇننىڭ وزىندە دە وسكەمەندىكتەرگە جەتە المايتىنى بەلگىلى بولدى. مەرزىمىنەن بۇرىن ەل چەمپيونى اتانعان «تورپەدو» ەندى پلەي-وفف كەزەڭىنە دايىندىعىن پىسىقتايدى.
جالپى شايبالى حوككەيدەن قازاقستان قۇراماسىنىڭ الەمدە الار ورنى قانداي بولسا, قۇرىلعانىنا 60 جىلدان اساتىن وسكەمەننىڭ «تورپەدوسى» دا قازاقستاننىڭ شايبالى حوككەيىندە ەرەكشە قۇرمەتكە يە. الەمدىك دەڭگەيدەگى ءىرى جەتىستىگىمىزگە دە ءدال وسى «تورپەدونىڭ» قوسقان ۇلەسى وراسان زور دەسەك ارتىق ايتقاندىق ەمەس. تاريحى سوناۋ 1955 جىلدان باستاۋ الاتىن وسكەمەننىڭ كومانداسى بۇگىنگە دەيىن قازاقستاندىق حوككەيشىلەردىڭ ءبىر شوعىرىن تاربيەلەپ شىعارعانىن كوزى قاراقتى وقىرماندارىمىز جاقسى بىلەدى. ماسەلەن, 1998 جىلى جاپونيانىڭ ناگانو قالاسىندا وتكەن قىسقى وليمپيا ويىندارىندا جانە سول جىلى شۆەيتساريادا جالاۋى جەلبىرەگەن الەم چەمپيوناتىندا ەل نامىسىن ءدال وسى «تورپەدونىڭ» تۇلەكتەرى قورعادى. قاقپاشىلار الەكساندر شيمين, ۆيتالي ەرەمەەۆ, قورعاۋشىلار الەكسەي تروششينسكي, ۆيتالي ترەگۋبوۆ, ۆلاديمير انتيپين, اندرەي سوكولوۆ, شابۋىلشىلار كونستانتين شافرانوۆ, ميحايل بورودۋلين جانە تاعى باسقا حوككەيشىلەر جاپونيا تورىندە اتوي سالدى.
قازاقستاندىق حوككەيشىلەر تورتجىلدىقتىڭ باستى دوداسىنا تۇڭعىش رەت قاتىسىپ تۇرسا دا, نامىستى قولدان بەرمەي شيرەك فينالعا جەتىپ جىعىلدى. جارتىلاي فينال جولداماسى ءۇشىن وتكەن ماتچتا ءبىر قالادان جاساقتالعان قۇرامامىز, «جىعىلساڭ ناردان جىعىل» دەگەندەي, شايبالى حوككەيدى ۇلتتىق سپورتى سانايتىن ۇيەڭكى جاپىراقتار ەلىنىڭ سپورتشىلارىمەن شەبەرلىك بايقاسىپ, 4:1 ەسەبىمەن ەسە جىبەردى.
اراعا ساناۋلى ايلار سالىپ ءبىزدىڭ جىگىتتەر 62 مارتە جالاۋى جەلبىرەگەن شۆەيتسارياداعى الەم چەمپيوناتىندا باق سىنادى. ىرىكتەۋ كەزەڭىندە رەسەي, فينليانديا جانە لاتۆيا قۇرامالارىمەن ءبىر توپتا ويناپ, وكىنىشكە قاراي, بارلىق ماتچتا قارسىلاستارىنا جول بەردى.
سول جىلى ۇلتتىق قۇرامانىڭ تىزگىنىن «تورپەدونىڭ» تۇلەگى, كسرو مەن قازاقستاننىڭ اتاقتى حوككەيشىسى, بىلىكتى باپكەر بوريس الەكساندروۆ ۇستاعان بولاتىن. 1955 جىلى وسكەمەندە دۇنيەگە كەلگەن ول 1970 جىلداردان باستاپ جەرگىلىكتى «تورپەدو» كلۋبىندا تەر توكتى. كەيىننەن تسسكا كلۋبىنا اۋىستى. جەرلەسىمىز 1976 جىلى ينسبرۋكتە وتكەن قىسقى وليمپيا ويىندارىندا كسرو قۇراماسىنىڭ التىن مەدال يەلەنۋىنە زور ۇلەس قوسقانىن زور ماقتانىشپەن ايتا الامىز. قازاقستان تاۋەلسىزدىك العان سوڭ ب.الەكساندروۆ ەل بىرىنشىلىگىندە ونەر كورسەتتى. وكىنىشكە قاراي, ب.الەكساندروۆ 2002 جىلى 46 جاسىندا كولىك اپاتىنان قازا تاپتى. 2016 جىلى بوريس الەكساندروۆتىڭ ەسىمى وسكەمەندەگى سپورت كەشەنىنە بەرىلسە, 2019 جىلى اتاقتى حوككەيشىنىڭ اتى حالىقارالىق شايبالى حوككەي فەدەراتسياسىنىڭ (IIHF) داڭق زالىنا ەنگىزىلدى. بۇگىندە IIHF «داڭق زالىندا» 220-دان اسا مۇشە بار. ءبىر ايتا كەتەرلىگى, بوريس الەكساندروۆ – «داڭق زالىنا» ەنگەن تۇڭعىش قازاقستاندىق حوككەيشى.
ناگانوداعى ءدۇبىرلى دوداعا قاتىسقان داڭقتى حوككەيشىلەر – اعايىندى ەۆگەني مەن الەكساندر كورەشكوۆتار اراعا 8 جىل سالىپ, 2006 جىلى تۋريندەگى (يتاليا) قىسقى وليمپيا ويىندارىندا شايبالى حوككەيدەن قازاقستان قۇراماسىن باستاپ باردى. ال الەكساندر كورەشكوۆ تۋريندەگى دودانىڭ اشىلۋ سالتاناتىندا ەلىمىزدىڭ كوك بايراعىن ۇستاپ شىقتى. سول جىلى جەرلەستەرمىز 1988 جىلعى جەتىستىكتى قايتالاي الماسا دا, ءتاۋىر ويىن كورسەتىپ, قارسىلاستارىنا وڭايلىقپەن ۇپاي بەرمەيتىندەرىن اڭعارتتى. اعايىندى حوككەيشىلەر ويىنشى رەتىندە كارەراسىن اياقتاعان سوڭ, باپكەرلىك ونەرگە بەت بۇردى. ەكى رەت وليمپيا ويىندارىنا, ءۇش مارتە الەم چەمپيوناتىنا قاتىسقان الەكساندر كورەشكوۆ 2010 جىلى قازاقستان شايبالى حوككەي فەدەراتسياسىنىڭ بالالار مەن جاسوسپىرىمدەر حوككەيىن دامىتۋ جونىندەگى ءبولىمىن باسقارىپ, 2015 جىلى ۇلتتىق قۇرامانىڭ باس جاتتىقتىرۋشىسى اتاندى.
ال ونىڭ باۋىرى ەۆگەني كورەشكوۆ 2007 جىلى شۆەيتساريانىڭ «مارتيني» كومانداسىندا ويناپ ءجۇرىپ, كارەراسىن اياقتاعان سوڭ 2008-2015 جىلدار ارالىعىندا رەسەيدىڭ «مەتاللۋرگ-2» (2008-2009), «ستالنىە ليسى» (2009-2013) كلۋبتارىن جاتتىقتىردى. ءتىپتى 2010 جىلى رەسەي جاستار قۇراماسىنىڭ دا تىزگىنىن ۇستادى. تىڭ تاجىريبە, وزگەشە كوزقاراسپەن قازاقستانعا ورالعان ول ەكى جىل كولەمىندە ەلوردانىڭ «بارىسىن» باپتادى. ايگىلى «تورپەدونىڭ» تۇلەگى «بارىستى» تۇراقتى بىرىنشىلىكتىڭ پلەي-وفف كەزەڭىندەگى جارىس جولىندا ¼ فينالعا دەيىن جەتكىزە الدى.
سونىمەن قاتار «تورپەدونىڭ» داڭقتى حوككەيشىلەرىنىڭ قاتارىندا قازاقستان جاستار قۇراماسى ساپىندا كسرو-نىڭ ەكى دۇركىن جەڭىمپازى, 1995/1996 جىلعى ماۋسىمدا رەسەيدىڭ «اۆانگارد» كلۋبىمەن حالىقارالىق حوككەي ليگاسىنىڭ قولا جۇلدەگەرى, قازاقستاننىڭ ەرەسەكتەر قۇراماسىمەن ەكى مارتە ازيا چەمپيوناتىنىڭ (1996 جانە 1999 جىلدارى) باس جۇلدەسىن يەلەنگەن, ناگانو وليمپياداسىنا قازاقستان قۇراماسىن كاپيتان رەتىندە باستاپ بارعان ەرلان ساعىمباەۆ, تۇڭعىش رەت قازاقستاندىق حوككەيشىلەر اراسىندا مۇحيتتىڭ ارعى بەتىندەگى ۇلتتىق حوككەي ليگاسىندا ويناپ, اقش-تىڭ ايگىلى «نيۋ-يورك رەيندجەرس», «اتلانتا ترەشەرز» جانە كانادانىڭ «ۆيننيپەگ دجەتس» كلۋبتارىندا جاسىنداي جارقىلداعان نيكولاي انتروپوۆ, سونداي-اق ۇحل-دىڭ «كالگاري حيتمەن», «لوس-اندجەلەس كينگز», «مانچەستەر موناركس» جانە «ايوۆا ستارز» كلۋبتارىندا ويناعان كونستانتين پۋشكاريوۆ, 2007 جىلى قازاقستانىڭ ەڭ ۇزدىك حوككەيشىسى دەپ تانىلىپ, 2014 جىلى قحل-دىڭ «جۇلدىزدار ماتچىندا» ونەر كورسەتكەن, قازاقستان قۇراماسى ساپىندا قىسقى ازيا ويىندارىنىڭ جەڭىمپازى (2011 جىلى) جانە كۇمىس جۇلدەگەرى (2007 جىلى) جانە جوعارىدا اتالعان ەكى جارىستىڭ اشىلۋ سالتاناتىندا قازاق ەلىنىڭ كوك بايراعىن ۇستاپ شىعۋ قۇرمەتىنە بولەنگەن تالعات جايلاۋوۆ جانە تاعى باسقا بىرقاتار حوككەيشىلەردىڭ ەسىمىن اتاي الامىز.
سونىمەن قاتار قازىرگى تاڭدا ۇلتتىق قۇراما مەن ەلىمىزدىڭ باس كومانداسى – «بارىس» ساپىندا جۇرگەن حوككەيشىلەردىڭ بىرقاتارى دا وسكەمەن حوككەي مەكتەبىنىڭ تۇلەگى سانالادى. اتاپ ايتار بولساق, قاقپاشىلار سەرگەي كۋدرياۆتسەۆ, دەنيس كاراتاەۆ, شابۋىلشىلار رومان ستارچەنكو, ءاليحان اسەتوۆ جانە تاعى باسقا دا سپورتشىلار حوككەيدىڭ قىر-سىرىنا «تورپەدودا» ءجۇرىپ قانىققان.
مىنە, قازاقستاندىق حوككەيشىلەردىڭ ءبىر شوعىرىن تاربيەلەپ شىعارعان وسكەمەندىك «تورپەدونىڭ» قازاقستاننىڭ شايبالى حوككەيدەن الاتىن ورنى قاي دارەجەدە ەكەنىن ءوزىڭىز باعامداي بەرىڭىز. تالانتتاردى تاربيەلەپ شىعارعان وسكەمەن كلۋبى ءالى دە تالاي جاستىڭ باعىن اشارى انىق.
