«جومارت تۇلەك-2021» كەزدەسۋىن وبلىس اكىمى بەردىبەك ساپارباەۆ اشىپ, شارانىڭ ماڭىزىنا توقتالدى. «باستى ماقسات – ءتۇرلى سالادا جەمىستى ەڭبەك ەتىپ جۇرگەن ەلىمىزگە بەلگىلى تۇلەكتەردىڭ تابىستى ءومىر جولىن جاس ۇرپاققا ۇلگى ەتۋ, تانىمال جامبىلدىقتاردى تۋعان ولكەسىنىڭ الەۋمەتتىك ماسەلەلەرىن شەشۋگە اتسالىسۋعا تارتا وتىرىپ, الەۋمەتتىك باستامالاردى جۇزەگە اسىرۋ جولىنداعى ومىرلىك تاجىريبەلەرىمەن ءبولىسۋ جانە الەۋمەتتىك ماڭىزدى جوبالاردى جۇزەگە اسىرۋ. «جومارت تۇلەك-2021» جوباسى اياسىندا jambyl-tylek.kz. سايتى ىسكە قوسىلىپ, قازىر وعان 80 مىڭعا جۋىق تۇلەك تىركەلگەن. سوڭعى بەس جىل ىشىندە ءبىزدىڭ تۇلەكتەر تۋعان مەكتەبىنە, اۋىلىنا جالپى كولەمى 2 ملرد تەڭگە كولەمىندە دەمەۋشىلىك كومەك كورسەتتى. «تۋعان جەر» جوباسى اياسىندا 5,5 ملرد تەڭگە كولەمىندە 30-دان استام الەۋمەتتىك جوبانى ىسكە اسىرۋ ۇسىنىلۋدا», دەدى اكىم. جيىندا قازىرگى كەزدە سان سالادا ەل دامۋىنا سۇبەلى ۇلەس قوسىپ جۇرگەن تانىمال تۇلەكتەر جەتىستىككە جەتۋ تاجىريبەسىمەن جانە تۋعان اۋىلدارى تۋرالى ەستەلىكتەرىمەن ءبولىستى. ولاردىڭ بىرقاتارى ارنايى كەلىپ قاتىسسا, كەيبىر ازاماتتار بەينەبايلانىس ارقىلى قوسىلدى.
اۋەلى تۇڭعىش پرەزيدەنت – ەلباسى كەڭسەسىنىڭ باسشىسى ماحمۇد قاسىمبەكوۆ جيىنعا بەينەبايلانىس ارقىلى قوسىلىپ, ەلباسى نۇرسۇلتان نازارباەۆتىڭ قۇتتىقتاۋىن جەتكىزدى. سونداي-اق نۇرسۇلتان ءابىش ۇلىنىڭ وبلىس اكىمى ب.ساپارباەۆتىڭ وڭىردە قازاقستاندىقتاردىڭ پاتريوتتىق رۋحىن نىعايتۋعا ىقپال ەتەتىن وسىنداي يگى شارانى وتكىزۋ باستاماسىن جوعارى باعالاعانىن اتاپ ءوتتى. «تۋعان جەرىنە, حالقىنا دەگەن سۇيىسپەنشىلىكتەن تۋعان وسىنداي يگى ءىس-شارالار پاتريوتتىق سەزىمدى كۇشەيتىپ, جاس ۇرپاقتى تاربيەلەۋگە ۇلكەن ۇلەس قوسادى. جامبىل وبلىسىندا باستالعان فورۋم رەسپۋبليكانىڭ باسقا دا وبلىستارىندا ءوز جالعاسىن تابادى دەپ سەنەمىن», دەلىنگەن ەلباسىنىڭ قۇتتىقتاۋىندا. سونىمەن قاتار م.قاسىمبەكوۆ وڭىردە بۇگىندە اتقارىلىپ جاتقان جۇمىستارعا توقتالىپ, ءوزى ءبىلىم العان شۋ اۋدانىنداعى س.سەيفۋللين اتىنداعى مەكتەپكە قولداۋ كورسەتىپ كەلە جاتقانىن ايتتى. ال جيىنعا ارنايى قاتىسقان ايگىلى اكتەر, قازاقستاننىڭ ەڭبەك ەرى ءاسانالى ءاشىموۆ ءىس-شارانىڭ ماڭىزدىلىعىنا توقتالدى. ء«وز تۋعان جەرىن مۇمكىندىگىنشە دارىپتەپ جۇرگەن بارشا جامبىلدىق تۇلەكتەردى بىرىكتىرۋ يدەياسى ماعان ۇنادى. بۇل اسا ماڭىزدى. اسىرەسە ولار جاس ۇرپاققا دۇرىس ۇلگى-ونەگە بولا الادى دەپ ويلايمىن. تانىمال جامبىلدىقتار جاس جەرلەستەرىنە كوزدەگەن كەز كەلگەن بيىكتەرىنە قول جەتكىزۋگە دەگەن سەنىمدىلىك ۇيالاتادى. ەڭ باستىسى, تالماي ادال ەڭبەك ەتۋ, تۋعان جەرىن ەستەن شىعارماي, مۇمكىندىگىنشە ونىڭ وركەندەۋىنە ءوز ۇلەسىن قوسۋ كەرەك. ويتكەنى سول تۋعان مەكەنىمىز ءبىزدى ءوسىردى, تاربيەلەدى, ارمانىمىزعا قانات ءبىتىردى. مەن ءوزىم وسىنداي تۇلەكتەردىڭ قاتارىندا بولعانىمدى ماقتان تۇتامىن», دەدى ا.ءاشىموۆ. ءوز سوزىندە مەملەكەت جانە قوعام قايراتكەرى ومىربەك بايگەلدى وسىنداي فورۋم ۇيىمداستىرعانى ءۇشىن وبلىس باسشىلىعىنا ريزاشىلىعىن ءبىلدىرىپ, بۇل الداعى ۋاقىتتا دا ءداستۇرلى تۇردە ءوز جالعاسىن تاباتىنىنا سەنىم ءبىلدىردى. سونداي-اق ءوڭىردى ءوزى باسقارعان جىلداردان ەستەلىكتەر ايتىپ, جاستاردى ەلگە, جەرگە ادال ەڭبەك ەتۋگە شاقىردى.
«اۋليەاتا توپىراعى مەملەكەتىمىزدىڭ قالىپتاسۋى مەن دامۋىنا وراسان ۇلەس قوسقان جانە قوسىپ كەلە جاتقان كوپتەگەن تالانتتى جانە ايگىلى ەل ازاماتتارىن تاربيەلەپ شىعاردى. ولاردىڭ تۋعان جەرىمەن بايلانىسىن ۇزبەۋى وتە ماڭىزدى. بىرلەسكەن كۇش-جىگەرمەن ءبىز جامبىل وبلىسىنىڭ دامۋى جولىندا كوپتەگەن يگى ىستەردى اتقارا الاتىنىمىزعا سەنىمدىمىن», دەدى حالىق قاھارمانى, گەنەرال-لەيتەنانت باقىتجان ەرتاەۆ. ال ءانشى-كومپوزيتور, مەملەكەتتىك سىيلىقتىڭ لاۋرەاتى التىنبەك قورازباەۆ, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاكير بالىقباەۆ, قازاقستاننىڭ ەڭبەك ەرى اياگۇل ميرازوۆا مۇنداي فورۋمنىڭ اسىرەسە جاستار ءۇشىن ماڭىزدى ەكەنىن ايتىپ, ءاربىر تۇلەك ءوز تۋعان جەرىنە لايىقتى كوڭىل ءبولۋ كەرەكتىگىن جەتكىزدى. سونىمەن قاتار فورۋمعا «اباي اتىنداعى قازاق ۇلتتىق پەداگوگيكالىق ۋنيۆەرسيتەتى» كەاق ديرەكتورلار كەڭەسىنىڭ توراعاسى گۇلميرا يسيمباەۆا دا بەينەبايلانىس ارقىلى قاتىسىپ, ءوزىنىڭ جۇرەكجاردى لەبىزىن ءبىلدىردى. اۋليەاتا وڭىرىنەن شىعىپ, بۇگىندە بۇكىل قازاققا تانىمال بولعان ا.ءاشىموۆ, ءو.بايگەلدى سياقتى ازاماتتاردىڭ ءومىر جولى اسىرەسە جاستار ءۇشىن ۇلگى ەكەنىن ايتتى. فورۋم بارىسىندا اقىن, قازاقستاننىڭ ەڭبەك سىڭىرگەن قايراتكەرى مارالتاي رايىمبەك ۇلى دا ءوزىنىڭ يگى تىلەگىن ءبىلدىرىپ, «كونە تاراز» اتتى ولەڭىن وقىدى.
«جومارت تۇلەك-2021» فورۋمى جامبىل وڭىرىنەن شىعىپ, بۇگىندە شەتەلدەردە ءومىر ءسۇرىپ جاتقان ازاماتتاردى دا قامتىدى. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ماگيسترانتى بوگدان زاگريبەلنىي, سينگاپۋر ەلىندە تۇراتىن كاسىپكەر تالعات تۇرىمباەۆ سىندى تۇلەكتەرمەن قاتار, اقش, تۇركيا جانە باسقا دا ەلدەردەن قاتىسۋشىلار بايلانىسقا شىقتى. ماسەلەن, كوروناۆيرۋس ىندەتى ءورشىپ تۇرعان كەزدە Kusto Group حالىقارالىق كومپانياسىنىڭ نەگىزىن قالاۋشىلاردىڭ ءبىرى, جۋالى اۋدانىنىڭ تۇلەگى تالعات تۇرىمباەۆ جەرلەستەرىنە كومەكتەسىپ, ءوز اتىنان 100 ملن تەڭگەگە اۋداندىق اۋرۋحاناعا رەانيموبيلدى كولىك, ءدارى-دارمەكتەر مەن مەديتسينالىق جابدىقتار ساتىپ الىپ بەرگەن. كاسىپكەر ءوز سوزىندە تۋعان جەرىن ءاردايىم قولدايتىنىن ايتتى. كەزدەسۋگە قاتىسۋشى تۇلەكتەردىڭ ءبارى دە تۇراقتى نەگىزدە تۋعان جەرىنە, ءوزى ءبىلىم العان مەكتەپكە كومەك كورسەتىپ كەلەدى. جيىندا ب.ساپارباەۆ ءاربىر تۇلەككە تۋعان جەرىنە دەگەن قولداۋى ءۇشىن العىس ءبىلدىردى. ۇرپاقتار ساباقتاستىعى ءارى قاراي دا ساقتالۋى ءتيىس ەكەنىن باسا ايتتى.
«مەملەكەت باسشىسى قاسىم-جومارت توقاەۆ ايتقانداي, وتانعا دەگەن سۇيىسپەنشىلىك – بوس ۇراندار مەن دەكلاراتسيالار ەمەس, ول حالىق يگىلىگى ءۇشىن كۇندەلىكتى ايانباي ەڭبەك ەتۋ, شىن جۇرەكپەن جاسالاتىن قايىرىمدى ىستەر. ءار ادام ءوز وتانىن ءسۇيۋى ءتيىس. بارلىعىڭىزعا ءوڭىرىمىزدى دامىتۋعا ءوز ۇلەستەرىڭىزدى قوسىپ جۇرگەندەرىڭىز ءۇشىن ريزامىز. وسىلاي جالعاسا بەرەدى دەپ ۇمىتتەنەمىن. ءبىز دە اۋقىمدى ءارى قىزىقتى جوبالاردى جۇزەگە اسىرۋدى جوسپارلاپ وتىرمىز. ينۆەستورلارعا ينفراقۇرىلىم جۇرگىزۋگە كومەكتەسەمىز. سىزدەردىڭ دە ارقايسىلارىڭىز ولاردى جۇزەگە اسىرۋعا قولۇشىن سوزا الاسىزدار», دەدى ب.ساپارباەۆ.
ەلىمىز تاۋەلسىزدىك العان جىلداردان بەرى جامبىل وبلىسىنداعى مەكتەپتەردى 400 مىڭنان استام تۇلەك بىتىرگەن. ولاردىڭ كوپشىلىگى تۋعان جەرىنەن قول ۇزبەي, قولداۋ كورسەتىپ كەلەدى. كەزدەسۋ سوڭىندا تانىمال تۇلەكتەرگە «جومارت تۇلەك-2021» سىيلىعى تابىستالدى.
جامبىل وبلىسى
