وقيعا بۇگىن ساعات 12:10 شاماسىندا بولدى. ۇلتتىق ۇلاننىڭ ەلوردالىق 5573 اسكەري ءبولىمىنىڭ قىزمەتكەرى, مايور ءالىم تاسماعامبەتوۆ كەزەكتى ەڭبەك دەمالىسىندا بولعان. ءوز كولىگىمەن جۇمىستارمەن وبلىس ورتالىعىنىڭ ن.نازارباەۆ كوشەسىمەن كەتىپ بارا جاتىپ, بەس قاباتتى تۇرعىن ءۇيدىڭ بىرىنەن قويۋ ءتۇتىن شىعىپ جاتقانىن بايقايدى.
سول ساتتە ءتۇتىن بۋداقتاعان پاتەردە ەشكىم بولماعان. وفيتسەر 101 تەلەفونىنا حابار بەرىپ, ءورت شىققان كىرەبەرىس تۇرعىندارىن سىرتقا شىعارا باستايدى. جەدەل ارەكەت ەتىپ, ۇيدەن ەكى ەگدە ازاماتشانى جانە ءبىر ءجاسوسپىرىمدى الىپ شىقتى. ءسويتىپ ولار توڭىپ قالماس ءۇشىن ءوز كولىگىنە وتىرعىزادى.
– ءبىرىنشى قاباتتان ءتۇتىندى بايقادىم. ءتۇتىن تەز ارادا بۇكىل كىرەبەرىستى العان. جول-جونەكەي مەن ءورت ءسوندىرۋشى توپتى شاقىردىم. كىرەبەرىستىڭ سىرتقى ەسى جابىق ەكەن. مەن بارلىق پاتەرگە قوڭىراۋ شالا باستادىم, كەي تەرەزەلەرگە قار لاقتىردىم. وسى ارقىلى ەلدىڭ كوڭىلىن ورتكە بولگىم كەلدى. ساناۋلى سەكۋندتاردا سىرتقى ەسىك تە اشىلدى. قۋانىشتىسى, سول ورتەنگەن ۇيدە ەشكىم بولماي شىقتى. مەن جوعارى قاباتتارعا كوتەرىلىپ, ءار پاتەردىڭ ەسىگىن قاعىپ شىقتىم. بەسىنشى قاباتتا 83 جاسار ەگدە ايەل تۇرادى ەكەن. ول ۇيىقتاپ جاتقان بولۋى كەرەك, ءورتتىڭ شىققانىن سەزبەگەن. مەن ونى كوتەرىپ الىپ, دالاعا شىعاردىم. ىلە-شالا 70 جاستاعى ازاماتشا مەن 14 جاستاعى جەتكىنشەكتى سىرتقا شىعارىپ, كولىگىمە وتىرعىزدىم. سەبەبى كۇن اياز ەدى, – دەيدى ۇلتتىق ۇلان وفيتسەرى.
كەيىن ءورت ورنىنا ۇلتتىق ۇلان اسكەري ينستيتۋتىنىڭ ەكى اسكەري قىزمەتكەرى كەلدى. كىشى سەرجانت دەنيس مۋحين جانە پراپورششيك ەۆگەني ۆيدنيكەۆيچتەر دە ءورت سوندىرۋشىلەرمەن قالعان تۇرعىنداردى ورتەنگەن ۇيدەن سىرتقا شىعاردى. اسكەريلەر ۇيدەن تاعى ءبىر بالانى ەۆاكۋاتسيالاعان.
ايتا كەتەيىك, جالپى تۇتىندەگەن كىرەبەرىسىتەن 15 ادام, ونىڭ ىشىندە 3 بالا قۇتقارىلدى. ورتتەن ەشكىم زارداپ شەككەن جوق.
