قوعام • 26 اقپان، 2021

باس پروكۋراتۋرا الەۋمەتتىك جەلىلەردە ميتينگكە شاقىرۋعا بايلانىستى ۇندەۋ جاريالادى

429 رەت كورسەتىلدى

الەۋمەتتىك جەلىلەردە جەكەلەگەن تۇلعالار ەلدىڭ ءارتۇرلى ايماقتارىندا زاڭسىز ميتينگىلەر مەن شەرۋلەرگە قاتىسۋعا شاقىرۋى تارالۋىنا بايلانىستى قر باس پروكۋرورىنىڭ ورىنباسارى ب.ب. دەمباەۆ ۇندەۋ جاريالادى، دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.

قۇرمەتتى ازاماتتار!

الەۋمەتتىك جەلىلەردە جەكەلەگەن تۇلعالار ەلدىڭ ءارتۇرلى ايماقتارىندا زاڭسىز ميتينگىلەر مەن شەرۋلەرگە قاتىسۋعا شاقىرۋلار تاراتۋدا.

وسىعان بايلانىستى، باس پروكۋراتۋرا ميتينگىلەردى ۇيىمداستىرۋ جانە وتكىزۋ ءتارتىبى 2020 جىلعى 25 مامىردا قابىلدانعان «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جاڭا زاڭمەن (بۇدان ءارى - زاڭ) رەتتەلەتىنىن تۇسىندىرەدى.

بۇل زاڭ ەلدە بەيبىت جينالىستاردى ۇيىمداستىرۋ مەن وتكىزۋدى دەموكراتيالاندىرىپ، جەڭىلدەتتى.

ناقتى ايتقاندا، جينالىستار، ميتينگىلەر مەن پيكەتتەردى ۇيىمداستىرۋ جانە وتكىزۋ ءۇشىن حابارلاما جاساۋ تارتىبى قاراستىرىلعان.

ولاردى وتكىزۋ تۋرالى حابارلاما بەلگىلەنگەن كۇنگە دەيىن 5 جۇمىس كۇنىنەن كەشىكتىرىلمەي جەرگىلىكتى اتقارۋشى ورگانعا جازباشا نىساندا بەرىلەدى.

وندا بەيبىت جينالىستىڭ ماقساتى مەن نىسانى، ۇيىمداستىرۋشىلار مەن قوعامدىق ءتارتىپتى ساقتاۋعا جاۋاپتى ادامداردىڭ دەرەكتەرى كورسەتىلەدى (زاڭنىڭ 10-بابى).

اتالعان حابارلامانى جەرگىلىكتى اتقارۋشى ورگان ونى تىركەگەن كۇننەن باستاپ 3 جۇمىس كۇنى ىشىندە قاراۋعا ءتيىس (زاڭنىڭ 11-بابى). وسى 3 كۇن وتكەننەن كەيىن جاۋاپ بولماعان جاعدايدا، ۇيىمداستىرۋشى بەرىلگەن حابارلاماعا سايكەس بەيبىت جينالىس وتكىزۋگە قۇقىلى.

دەمونستراتسيالار مەن شەرۋلەر كەلىسۋ تارتىبىمەن وتكىزىلەدى.

ول ءۇشىن ۇيىمداستىرۋشى ونىڭ وتكىزىلەتىن كۇنىنە دەيىن 10 جۇمىس كۇن بۇرىن ءوتىنىش بەرۋگە، ال جەرگىلىكتى اتقارۋشى ورگان ول بويىنشا 7 جۇمىس كۇنى ىشىندە جاۋاپ بەرۋگە مىندەتتى (زاڭنىڭ 12، 13-باپتارى).

ۇيىمداستىرۋشى وتىنىشتە قاتىسۋشىلاردىڭ ءجۇرۋ باعىتىن، سونداي-اق قوعامدىق ءتارتىپتى ساقتاۋدى، مەديتسينالىق كومەكتى ۇيىمداستىرۋدى، ءورت قاۋىپسىزدىگىن قامتاماسىز ەتۋگە جاردەمدەسۋ شارالارىن كورسەتەدى (زاڭنىڭ 12-بابى).

ءوتىنىشتى قاراۋ قورىتىندىلارى بويىنشا جەرگىلىكتى اتقارۋشى ورگان ۇيىمداستىرۋشىعا دەمونستراتسيا نەمەسە شەرۋ وتكىزۋ كەلىسىلگەنى نە ونى وتكىزۋدەن باس تارتقانى تۋرالى حابارلايدى (زاڭنىڭ 13-بابى).

زاڭ بويىنشا بەيبىت جينالىستار قاتاڭ تۇردە ارنايى جەرلەردە جانە قالالىق، اۋداندىق ماسليحاتتارمەن بەلگىلەگەن مارشرۋت بويىنشا ۇيىمداستىرىلۋى جانە وتكىزىلۋى ءتيىس.

الايدا ۇيىمداستىرۋشىلار بەيبىت جينالىستاردى ۇيىمداستىرۋ جانە وتكىزۋ تۋرالى جەرگىلىكتى اتقارۋشى ورگاندارعا ءتيىستى حابارلامالار مەن وتىنىشتەر بەرمەگەن نەمەسە ولار بويىنشا كەلىسۋدەن باس تارتىلعان.

تيىسىنشە، زاڭدى (3-باپتىڭ 3-تارماعىن) بۇزا وتىرىپ جۇرگىزىلەتىن بەيبىت جينالىستاردى ۇيىمداستىرۋ جانە وعان قاتىسۋ قۇقىققا قايشى بولىپ تابىلادى جانە اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا اكىمشىلىك جاۋاپتىلىققا اكەپ سوعادى (25 تاۋلىككە دەيىن قاماۋعا الۋ).

ەگەر بۇل ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرۋمەن قاتار جۇرەتىن بولسا، قىلمىستىق كودەكستىڭ 400-بابى بويىنشا قىلمىستىق جاۋاپتىلىق تۋىندايدى، ول ايىپپۇل نە 200 اەك-كە دەيىنگى مولشەردە تۇزەۋ جۇمىستارى نەمەسە 200 ساعاتقا دەيىنگى مەرزىمگە قوعامدىق جۇمىستارعا تارتۋ نە 50 تاۋلىككە دەيىنگى مەرزىمگە قاماۋ تۇرىندەگى جازانى كوزدەيدى.

بۇدان باسقا، «سovid-19» كوروناۆيرۋستىق ينفەكتسياسىنىڭ پاندەمياسىنا بايلانىستى قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرىنىڭ 2020 جىلعى 25 جەلتوقسانداعى №68 «كارانتيندىك شەكتەۋ شارالارى جانە ولاردى كەزەڭ-كەزەڭمەن جەڭىلدەتۋ تۋرالى» قاۋلىسىمەن بەلگىلەنگەن ادامدار كوپ جينالاتىن ءىس-شارالاردى وتكىزۋگە سالىنعان تىيىم ءالى دە قولدانىستا ەكەندىگىن ەسكە سالامىز.

ونى ساقتاماعانى ءۇشىن اكىمشىلىك (اقبتك-ءنىڭ 425-بابى – حالىقتىڭ سانيتاريالىق-ەپيدەميولوگيالىق سالاماتتىلىعى سالاسىنداعى زاڭناما تالاپتارىن بۇزۋ – 30-دان 200 اەك-كە دەيىن ايىپپۇل) جانە قىلمىستىق (قك-ءنىڭ 304-بابى – سانيتاريالىق قاعيدالاردى نەمەسە گيگيەنالىق نورماتيۆتەردى ابايسىزدا ادامداردىڭ جاپپاي سىرقاتتانۋىنا، اۋرۋ جۇقتىرۋىنا اكەپ سوققان بۇزۋ – 2 مىڭ اەك مولشەرىندەگى ايىپپۇلدان باستاپ 5 جىلعا دەيىنگى مەرزىمگە باس بوستاندىعىنان ايىرۋعا دەيىن) جاۋاپتىلىق كوزدەلگەن.

باس پروكۋراتۋرا ازاماتتاردى قولدانىستاعى زاڭناما نورمالارىن مۇلتىكسىز ساقتاۋعا، ارانداتۋشىلىققا بوي الدىرماۋعا جانە زاڭسىز اكتسيالارعا قاتىسۋدان باس تارتۋعا شاقىرادى.

قۇقىق قورعاۋ ورگاندارى بەلگىلەنگەن تارتىپكە، قوعامدىق قاۋىپسىزدىككە قول سۇعاتىن كەز كەلگەن قۇقىق بۇزۋشىلىقتىڭ جولىن كەسەدى، سونداي-اق ولارعا جول بەرمەۋ جونىندە زاڭدا كوزدەلگەن شارالاردى قولدانادى.

سوڭعى جاڭالىقتار

ارىنعازى

رۋحانيات • بۇگىن، 07:32

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار