سپورت • 26 اقپان، 2021

جاتتىقتىرۋشىلاردىڭ كاسىبي مەرەكەسى 7 ساۋىردە اتاپ ءوتىلۋى مۇمكىن

9 رەت كورسەتىلدى

رەسپۋبليكالىق «قازاقستاندىق سپورتشىلار وداعى» قوعامدىق بىرلەستىگىنىڭ توراعاسى ازامات قارلىعاشەۆ ەلىمىزدە «سپورت جاتتىقتىرۋشىسى» كۇنىن رەسمي تۇردە مەرەكەلىك كۇندەردىڭ تىزبەسىنە ەنگىزۋ كەرەكتىگىن العا تارتادى، دەپ حابارلايدى Egemen.kz

«ەلىمىزدە كوپتەگەن كاسىبي مەرەكە بار: مۇعالىمدەر كۇنى، ەنەرگەتيكتەر كۇنى، قارجىگەرلەر كۇنى جانە تاعى باسقا. الايدا بۇل مەرەكەلەر تىزىمىندە سپورت جاتتىقتىرۋشىسى كۇنى جوق. سوندىقتان ءبىز سپورت جاتتىقتىرۋشىسى كۇنىن كاسىبي مەرەكەلەر كۇنتىزبەسىنە رەسمي تۇردە ەنگىزۋدى ۇسىنامىز»، دەدى وداق توراعاسى.

ازامات قارلىعاشەۆ مەرەكەنى 7 ساۋىردە اتاپ ءوتۋدى ۇسىندى. «2021 جىلدىڭ 7 ساۋىردە ەلىمىزدىڭ اتاقتى بالۋانى قاجىمۇقان مۇڭايتپاسوۆتىڭ 150 جىلدىعىن تويلاعالى وتىرمىز. سوندىقتان ءبىز سپورت جاتتىقتىرۋشىسى كۇنىن ءدال وسى كۇنى اتاپ ءوتۋ كەرەك دەپ سانايمىز»، دەدى ازامات قارلىعاشەۆ.

بۇل باستامانى كسرو-نىڭ بوكستان 5 دۇركىن چەمپيونى، قازاقستاندىق سپورتشىلار وداعىنىڭ قۇرمەتتى مۇشەسى بولات تەمىروۆ قولدايتىنىن جەتكىزدى.

«بىزدە ەڭبەك سىڭىرگەن جاتتىقتىرۋشىلار كوپ. ولاردىڭ كوپشىلىگى الەم چەمپيوندارىن تاربيەلەپ، قازاقستاننىڭ اتىن شىعاردى. الايدا ولاردىڭ كاسىبي مەرەكەسى جوق»، – دەدى ول. بۇل پىكىردى قازاقستاننىڭ ەڭبەك سىڭىرگەن سپورت قايراتكەرى سادىق مۇستافاەۆ تا قولدادى. «قازاقستاندا جاتتىقتىرۋشىلارعا باسىمدىق بەرىلمەيدى. ولار وقۋشىلارىنىڭ كولەڭكەسىندە قالىپ ءجۇر. ارينە، جاتتىقتىرۋشىلارعا مەملەكەتتىك دەڭگەيدە كوڭىل ءبولىنۋى كەرەك»، دەدى سپورت قايراتكەرى.

سونىمەن قاتار وداق بۇل باستاما بويىنشا قر پرەزيدەنت اكىمشىلىگى مەن مادەنيەت جانە سپورت مينيسترلىگىنە ۇسىنىس حات جولداعانىن اتاپ ءوتتى.

ايتا كەتەيىك، قازاقستان سپورتشىلار وداعى – بۇرىنعى جانە قازىرگى سپورتشىلاردى، دەنە شىنىقتىرۋ، سپورت جانە تۋريزم قىزمەتكەرلەرىن بىرىكتىرەتىن ەلىمىزدەگى ەرىكتى كوممەرتسيالىق ەمەس قوعامدىق ۇيىم، 2020 جىلدىڭ 21 مامىرىندا قۇرىلعان. قازىرگى تاڭدا وداقتىڭ 600-دەن اسا مۇشەسى بار.

سوڭعى جاڭالىقتار

ارىنعازى

رۋحانيات • بۇگىن، 07:32

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار