قازاقستان • 26 اقپان، 2021

70 ملن توننا مۇناي ەكسپورتتالدى

33 رەت كورسەتىلدى

قازاقستاندىق مۇناي ەكسپورتىنىڭ 75%-ى «كاسپي قۇبىر كونسورتسيۋمى» ماگيسترالدىق مۇناي قۇبىرى ارقىلى جەتكىزىلدى. بۇل تۋرالى «قازمۇنايگاز» اق باسقارما توراعاسىنىڭ مۇناي تاسىمالداۋ جونىندەگى ورىنباسارى دانيار بەرلىباەۆ حابارلادى.

كومپانيا وكىلىنىڭ ايتۋىنشا، بىلتىر بارلىعى 68،5 ملن توننا مۇناي ەكسپورتقا شىعارىلىپ، ونىڭ ىشىندە «كاسپي قۇبىر كونسورتسيۋمى» (كقك) قۇبىر جۇيەسى ارقىلى 51،8 ملن توننا شيكىزات تاسىمالداندى.

«قازمۇنايگاز» كومپانياسى «كاسپي قۇبىر كونسورتسيۋمىنىڭ» ءىرى اكتسيونەرى سانالادى. بۇل جوبانى ىسكە اسىرۋعا جانە قازاقستان ءۇشىن ستراتەگيالىق ماڭىزدى باعىتتى دامىتۋعا باسا نازار اۋدارامىز. بيىل مۇناي قۇبىرى ارقىلى العاشقى مۇناي جونەلتىلگەنىنە 20 جىل تولدى. وسى ۋاقىت ارالىعىندا «كاسپي قۇبىر كونسورتسيۋمى» قازاقستاندىق مۇنايدى تاسىمالداۋدىڭ ءتيىمدى جانە سەنىمدى باعىتى رەتىندە تانىلدى. اتالعان باعىتتا 600 ملن توننادان استام جۇك تيەلدى. بىلتىر قازاقستاننان 68،5 ملن توننا مۇناي ەكسپورتتالسا، ونىڭ ىشىندە كقك ارقىلى 51،8 «قارا التىن» سىرتقى نارىققا تاسىمالداندى. ياعني مۇناي ەكسپورتىنىڭ 75% ماگيسترالدىق مۇناي قۇبىرى ارقىلى جونەلتىلدى»، دەدى د.بەرلىباەۆ.

ول بىلتىر «قازمۇنايگاز» «كقك-ر» كومپانياسى­نىڭ ديرەكتورلار كەڭەسىن باسقارعانىن جانە باسقا اكتسيونەرلەردىڭ، اتاپ ايتقاندا «ترانسنەفت»، «شەۆرون» جانە باسقا دا حالىقارالىق كومپانيالاردىڭ وكىلدەرىمەن بىرگە، وسى باعىتتى دامىتۋمەن بەلسەندى اينالىساتىنىن اتاپ ءوتتى.

«2023 جىلعا قاراي بۇل باعىتتا قازاقستاننان 72 ملن توننا ەكسپورتتاۋ ءۇشىن بيىل الدىمىزعا ۇل­كەن مىندەتتەر قويىپ وتىرمىز. 2020 جىلى كقك كوم­پانياسى بارلىق اكتسيونەر الدىنداعى قارىزىن تولىعىمەن وتەپ، 1 ملرد دوللارعا جۋىق قارىزىن تولەدى، ونىڭ ىشىندە قازاقستاندا 100 ملن دوللاردان استام ءتيىستى سالىقتار تولەندى. 2021 جىلى ديۆيدەندتەر تولەنە باستادى، بۇل تيىسىنشە اكتسيونەرلەردىڭ زور قىزىعۋشىلىعىن وياتادى. جالپى، «قازمۇنايگاز» كقك قىزمەتىنىڭ وندىرىستىك ناتيجەلەرىن وڭ باعالايدى، بۇل جەتىستىكتەردى كقك اكتسيونەرلەرىنىڭ، سونداي-اق قازاقستان مەن رف ۇكىمەتتەرىنىڭ كوپجىلدىق جەمىستى ىنتىماقتاستىعىنىڭ ناتيجەسى دەپ سانايدى»، دەپ تۇيىندەدى د.بەرلىباەۆ.

«كاسپي قۇبىر كونسورتسيۋمى» اق باس ديرەكتورى نيكولاي گوربان ايتقانداي، 2020 جىلدىڭ قورىتىندىسىنا سايكەس كونسورتسيۋمنىڭ تەڭىز تەرمينالى ارقىلى 59 ملن توننادان استام مۇناي قابىلدانىپ، جونەلتىلدى.

«تەڭىز تەرمينالىندا ۇزىن سانى 572 تانكەرگە شيكىزات تيەلىپ، جونەلتىلدى. 2020 جىلدىڭ مامىر ايى­نان باستاپ، مۇناي ەكسپورتتاۋشىلار ۇيىمى جانە وعان كىرمەيتىن مەملەكەتتەر (وپەك+) تامىزعا دەيىن تاۋلىگىنە 9،7 ملن باررەلگە جانە 2020 جىلدىڭ سوڭىنا دەيىن 7،7 ملن باررەلگە مۇناي ءوندىرۋدى شەكتەۋگە ۋاعدالاستى. وسى شەشىمدى راستاۋ ءۇشىن قازاقستان ۇكىمەتى بىلتىرعى مامىر-شىلدە جانە تامىز-جەلتوق­سان كەزەڭدەرىندە كومىرسۋتەكتى ورىندارعا بارلاۋ جۇرگىزۋ جانە ءوندىرۋ جونىندەگى وپەراتسيالاردى جۇرگىزۋگە بايلانىستى ۋاقىتشا شەكتەۋلەر ەنگىزدى. ءتيىستى شەكتەۋلەر قازاقستاندىق جۇك جونەلتۋشىلەردىڭ مۇنايدى قابىلداپ، تاپسىرۋ كەستەلەرىندە كورىنىس تاۋىپ، تەڭىز تەرمينالىنداعى قارا التىن تاسىمالىنىڭ تومەندەۋىنە سەبەپ بولدى»، دەدى ن.گوربان.

ايتسە دە، كومپانيا باسشىسىنىڭ ايتۋىنشا، نەگىزگى ءتۇسىم 2 ملرد دوللاردان استى. سالىق سالىمدارىن ەسەپكە الماعاندا، تازا پايدا 630 ملن دوللاردان اسىپ وتىر. كورپوراتيۆتىك سالىق سوماسى 70 ملن دوللاردى قۇراسا، م ۇلىك سالىعى 16 ملن دوللارعا جەتكەن.

كومپانيا باسشىسىنىڭ سوزىنە سەنسەك، 2020 جىلى شەكتەۋلى جەرلەردى جويۋ باعدارلاماسىن ىسكە اسىرۋدىڭ بەلسەندى كەزەڭى باستالدى. اتالعان باعدارلاما رەسپۋبليكانىڭ اۋماعىنان كقك مۇناي قۇبىرى ارقىلى «قارا التىندى» تاسىمالداۋدى جىلىنا 72،5 ملن تونناعا دەيىن ۇلعايتۋ ماقساتىندا ازىرلەنىپ، ەنگىزىلدى. قازىر مۇناي قۇبىرىنىڭ جوبالىق قۋاتى – 67 ملن توننا.

«بۇل نەگىزگى ستانسا سانالادى. نەگە دەسەڭىز، «تەڭىز» كەن ورنىنداعى مۇناي سوعان قۇيىلادى. مۇندا دا بەلسەندى جاڭعىرتۋ جۇمىستارى جۇرگىزىلىپ جاتىر. 2023 جىلدىڭ باسىندا مۇناي تاسىمالى ۇلعايا تۇسەدى دەپ بولجانۋدا. سونداي-اق «تەڭىز» مۇناي ايداۋ ستانساسىندا جاڭعىرتۋ جۇمىستارى قولعا الىندى. بۇدان باسقا، باس ستانسانى تولىققاندى ەلەكتر قۋاتىمەن جابدىقتاۋ ءۇشىن جاڭا قوسالقى ستانسا مەن ەكى ەلەكتر بەرۋ جەلىسى سالىنۋدا. سونداي-اق اتىراۋدا، «يساتاي» مەن «قۇرمانعازىداعى» مۇناي ايداۋ ستانسالارىندا جاڭا ماگيسترالدىق سورعى اگرەگاتتارى مەن ىلەسپە قۇرىلىمدارىن سالۋ كوزدەلگەن. تۇتاستاي العاندا، بۇل ماقساتقا 157 ملن دوللار ءبولىندى»، دەدى كونسورتسيۋمنىڭ باسشىسى.

ەلىمىزدە كوروناۆيرۋس ەپيدەمياسى ورشىگەندە مۇناي ايداۋ ستانسالارىندا اۋىسىمدىق جۇمىس 56 كۇنگە دەيىن سوزىلىپتى. كارانتين كەزەڭىندە ماڭىز­دى شەشىمدەردىڭ ءبىرى ۆاحتالىق ادىسكە كوشۋ بولدى. ءىسساپار بارىسىندا قىزمەتكەرلەر بارلىق سانيتارلىق-ەپيدەميالىق تالاپتاردى ساقتاي وتىرىپ، ارنايى جالعا الىنعان قوناقۇي كەشەنىندە تۇردى.

«ىندەت شارىقتاعاندا «تەڭىز»، «يساتاي» جانە «قۇرمانعازى» مۇناي ايداۋ ستانسالارىندا قاتاڭ جۇمىس  رەجىمى ەنگىزىلدى. اتاپ ايتقاندا، اۋىسىمدىق جۇمىس 56 كۇنگە دەيىن سوزىلدى. قازىر اتالعان ستانسالاردا ەپيدەميالىق جاعدايدىڭ تۇراقتانۋىنا بايلانىستى جۇمىس رەجىمى 28 كۇنگە قىسقارتىلدى. قازىر اتىراۋداعى كەڭسە قىزمەتكەرلەرىنىڭ 80%-ى قاشىقتان جۇمىس ىستەۋگە كوشتى. كومپانيانىڭ IT قىزمەتتەرىنىڭ ۇيلەسىمدى جۇمىسى ارقىلى ءونىمدى جۇمىس ىستەۋگە مۇمكىندىك الدىق»، دەدى ن.گوربان.

 

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار