بۇل مالىمدەمە ەلىمىزدەگى ساياسي رەفورمالاردىڭ جالعاسى بولىپ وتىر. ياعني بۇل پارتيالاردىڭ پارلامەنتكە ءوتۋ مەجەسىنىڭ ازايۋى, سونىمەن قاتار بيۋللەتەندەردىڭ بارلىعىنا «قارسى» دەگەن نورمانىڭ ەنگىزىلۋى زاڭ بويىنشا ءارى قاراي جالعاسىن تابادى دەگەن ءسوز.
كەلەلى باسقوسۋدا اۋىل اكىمدەرىن سايلاۋ جونىندەگى ناقتى مەرزىم انىقتالىپ, 2024 جىلدان باستاپ اۋدان اكىمدەرىن سايلايتىن تەتىكتەر ەنگىزىلمەك. بۇل ءبىزدىڭ ەلىمىزدەگى ساياسي كوزقاراستىڭ قالىپتاسقانىن بىلدىرەدى. قازاقستاندىقتاردى تولعاندىرعان ەڭ باستى جايت – جەردى شەتەلدىكتەرگە جالعا بەرۋ-بەرمەۋ ماسەلەسىنە نۇكتە قويىلدى. قاسىم-جومارت كەمەل ۇلى قازاقستانداعى شەتەلدىك ازاماتتارعا جەردى جالعا بەرۋگە, ساتۋعا تولىق تىيىم سالۋ جونىندەگى زاڭ نورماسى ەنگىزىلەتىنىن ايتتى. بۇل ءبىزدىڭ ەلىمىزدەگى جەر ماسەلەسىنە قاتىستى جالپىۇلتتىق ديسكۋسسياعا نۇكتە قويىلعاندىعىن كورسەتەدى. ياعني جەر رەسۋرستارى تەك قازاقستان ازاماتتارىنا قىزمەت ەتەتىن بولادى. دەگەنمەن جەر – ەكونوميكالىق رەسۋرس. ول ءبىزدىڭ حالقىمىزعا يگىلىك اكەلۋى كەرەك. ءبىزدىڭ ەلىمىزدەگى جەر رەسۋرستارىن مەملەكەتتىڭ دامۋى ءۇشىن پايدالانۋ جونىندە ماسەلەنى شەشۋ ءۇشىن ۇكىمەت جانىنان قوعامدىق كوميسسيا قۇرىلادى. بۇل قوعامدىق كوميسسيا جەر ماسەلەسىن پىسىقتايتىن بولادى. جىلدىڭ اياعىنا دەيىن ۇكىمەت بۇل ماسەلەگە قاتىستى ءوز ۇسىنىستارىن ەنگىزۋى قاجەت. قازاقستاننىڭ جەر رەسۋرستارىنا بايلانىستى ماسەلەلەرى بۇگىنگى تاڭداعى ەڭ نەگىزگى ەكەنى ەشكىمگە جاسىرىن ەمەس. سول سەبەپتى بۇل ماسەلە جان-جاقتى پىسىقتالىپ, تۇيتكىلدەرى تولىق انىقتالۋى قاجەت.
باسقوسۋدا كەڭەستىڭ مەملەكەتىمىزدىڭ, ەل ازاماتتارىنىڭ مۇددەسى ءۇشىن جۇمىس ىستەيتىندىگىن تاعى ءبىر بايقادىق. بۇگىنگى تاڭدا ۇلتتىق كەڭەستىڭ تەك قوعامدىق ۇيىم ەمەس, ەلىمىزدەگى ساياسي-ەكونوميكالىق رەفورمالاردىڭ باستى الاڭىنا اينالعانىن دا اڭعارۋ قيىن ەمەس.
ەرلان سايروۆ,
پارلامەنت ءماجىلىسىنىڭ دەپۋتاتى,
ۇلتتىق قوعامدىق سەنىم
كەڭەسىنىڭ مۇشەسى
