ءححىى قىسقى وليمپيادانىڭ باستالۋىنا 41 كۇن قالدى
الداعى جىلدىڭ اقپان ايىندا رەسەيدىڭ قارا تەڭىز جاعالاۋىنداعى سوچي قالاسىندا جالاۋىن كوتەرگەلى تۇرعان XXII قىسقى وليمپياداسىنىڭ قىزىعى باستالاتىن شاق تا كۇن ساناپ جاقىنداپ كەلەدى. بۇل جاھاندىق جارىس 2014 جىلدىڭ 7 اقپانىندا سورەدەن شىعىپ, 24 اقپاندا مارەگە جەتەدى. ويىنداردا سپورتتىڭ 15 ءتۇرى بويىنشا 98 مەدالدار جيىنتىعى ساراپقا سالىنادى. سونىڭ ىشىندە قازاقستان اتلەتتەرى سپورتتىڭ 11 ءتۇرى بويىنشا جارىسقا جالىن قوسادى. ءبىز بۇگىننەن باستاپ گازەت بەتىندە وسى ويىندار تۋرالى ارنايى ءبولىم بەرىپ تۇراتىن بولامىز.
ءححىى قىسقى وليمپيادانىڭ باستالۋىنا 41 كۇن قالدى
الداعى جىلدىڭ اقپان ايىندا رەسەيدىڭ قارا تەڭىز جاعالاۋىنداعى سوچي قالاسىندا جالاۋىن كوتەرگەلى تۇرعان XXII قىسقى وليمپياداسىنىڭ قىزىعى باستالاتىن شاق تا كۇن ساناپ جاقىنداپ كەلەدى. بۇل جاھاندىق جارىس 2014 جىلدىڭ 7 اقپانىندا سورەدەن شىعىپ, 24 اقپاندا مارەگە جەتەدى. ويىنداردا سپورتتىڭ 15 ءتۇرى بويىنشا 98 مەدالدار جيىنتىعى ساراپقا سالىنادى. سونىڭ ىشىندە قازاقستان اتلەتتەرى سپورتتىڭ 11 ءتۇرى بويىنشا جارىسقا جالىن قوسادى. ءبىز بۇگىننەن باستاپ گازەت بەتىندە وسى ويىندار تۋرالى ارنايى ءبولىم بەرىپ تۇراتىن بولامىز.
قازاقستان سپورتتىڭ 6 تۇرىنەن مەدالعا تالاسادى
رەسپۋبليكا سپورت جانە دەنە-شىنىقتىرۋ اگەنتتىگىنىڭ باسشىسى تاستانبەك ەسەنتاەۆ وسىلاي دەپ وتىر. ول مۇنى جاقىندا ورتالىق كوممۋنيكاتسيالار قىزمەتىندە بەرگەن بريفينگى كەزىندە ايتتى.
ەلىمىزدىڭ سپورت سالاسى تىزگىنىن ۇستاپ وتىرعان تۇلعانىڭ پىكىرىنشە, ساڭلاقتارىمىز وسى جولى شىنىندا دا ايدى اسپاننان ءبىر-اق شىعارىپ, 6 مەدالدى الىپ قالۋى ابدەن ىقتيمال. جاسىراتىنى جوق, ءبىز بۇرىن مۇنداي مەدالدار مەرەكەسىن كورمەك تۇرماق, وسىنشا جۇلدەلەر جايلى ارمانداۋدىڭ ءوزىن ارتىق كورۋشى ەدىك. ەندى قالاي, قازاقستان تاۋەلسىزدىككە قول جەتكىزگەلى بەرى ءبىزدىڭ بار-جوعى 3 سپورتىمىز عانا قىسقى وليمپيالىق ويىنداردىڭ قۇرمەت تۇعىرىنان كورىنگەن ەكەن. ولاردىڭ ءوزى 3 وليمپيادادا عانا, ەلىمىزدىڭ اتىن شىعارسا, قالعان 2 ويىنداردان ءتىپتى قورجىنىمىز بوس قايتىپتى. جانە مەدالدار ەڭ كوپ بولعاندا, ۇشەۋدەن اسپاعان. اتاپ ايتقاندا, 1994 جىلى ليلليحاممەردە وتكەن دودادا 1 التىن, 2 كۇمىس, بارلىعى 3 مەدالدى اتاقتى شاڭعىشى ۆلاديمير سميرنوۆ جەڭىپ السا, كەلەسى جولى, 1998 جىلى ناگانودا جالاۋىن كوتەرگەن باسەكەدە ۆلاديمير سميرنوۆ پەن كونكيشى ليۋدميلا پروكاشەۆا ءبىر-ءبىر قولا مەدالدى قاناعات تۇتتى. ال سودان كەيىنگى سولت-لەيك سيتي (2002) مەن تورينودا (2006) مەدالدىڭ اۋىلىنا جاقىنداپ باراتىن اتلەت تاپپاي قالدىق. بۇل ولقىلىقتى تەك 2010 جىلى ۆانكۋۆەردە وتكەن ويىنداردا بياتلونشى ەلەنا حرۋستالەۆا 1 كۇمىس مەدالىمەن تولتىرعانداي بولدى. مىنە, قازاقستاننىڭ قىسقى وليمپيالىق ويىندارداعى جۇلدە قورى وسىنداي.
ال تاستانبەك ەسەنتاەۆ الداعى ويىنداردا ءبىزدىڭ سپورتشىلارىمىز شاڭعى, بياتلون, فريستايل, كونكي, مانەرلەپ سىرعاناۋ جانە سنوۋبورد سەكىلدى سپورت تۇرلەرى بويىنشا سايىستاردا الەمنىڭ ۇزدىك جۇلدىزدارىمەن تەڭ دارەجەدە شايقاسادى دەپ ەسەپتەپ وتىر. «ءبىز جۇلدەنى ەڭ الدىمەن شاڭعىشىلار كومانداسىنان كۇتەمىز. سودان كەيىن 2013 جىلى الەم چەمپيونى اتانعان كونكيشى دەنيس كۋزين مەن جاھاندىق جارىستا ەكىنشى بولعان دەنيس تەن وسى دەڭگەيدەن تابىلادى دەگەن ويدامىز», – دەدى ول.
«سول سياقتى سنوۋبورد جانە شورت-ترەك قۇرامالارى الدارىنا دا ناتيجەلەرىن جاقسارتۋ جونىندە تاپسىرما بەرىلدى. بۇل سپورت تۇرلەرى بويىنشا وليمپيالىق ويىنداردىڭ العاشقى وندىعىنا كىرە الاتىن جەكەلەگەن سپورتشىلار دا بار», – دەدى بۇدان ءارى ت.ەسەنتاەۆ.
ءدال قازىرگى تاڭدا قازاقستاندىقتار سپورتتىڭ 11 ءتۇرى بويىنشا 55 ليتسەنزيا جەڭىپ الىپ وتىر. بىراق بۇلاردىڭ بىرقاتارىنا وسى جەڭىپ العان ليتسەنزيالارىن الەم كۋبوگى كەزەڭدەرىندە تاعى ءبىر مارتە قورعاۋعا تۋرا كەلەدى.
رۋسلان يگىلىك.
شۆەيتساريا پرەزيدەنتى سوچيگە باراتىنىن راستادى
جاسىراتىنى جوق, XXII وليمپيالىق ويىندارداعى باسەكەنىڭ ءباسى ونىڭ سپورت الاڭدارى مەن جارىس جولدارىمەن عانا شەكتەلىپ قالمايتىن سياقتى. جەر-جاھاندى تاسقاياقتاي قاقتىرىپ وتىرۋعا قۇشتار بەلگىلى ءبىر ساياسي كۇشتەر سول سىرتقى سيپاتتا بولىپ جاتاتىن استارلى ويىنداردى قازىردىڭ وزىندە باستاپ كەتكەن سياقتى. بۇل بۇگىندە الەمنىڭ انا جەرىنەن ءبىر, مىنا جەرىنەن ءبىر وزدەرىنىڭ سوچي وليمپياداسىنا بارا المايتىندارىن ءسۇيىنشى سۇراعانداي ەتىپ جارىسا حابارلاپ جاتقان ءتۇرلى ەلدەردىڭ پرەزيدەنتتەرى مەن پرەمەرلەرىنىڭ مالىمدەمەلەرىنەن دە بايقالىپ جاتىر.
ءبىر قۋانىشتىسى, وسىنداي تىمىرايعان كوڭىل كۇيدە تۇنجىراڭقى كورىنە باستاعان كوكتىڭ ءجۇزىن جارق ەتە قالعانداي اسەرگە بولەپ, ويىندارعا قالايدا باراتىندارىن جاريا ەتىپ جاتقان جىلى جۇرەكتى, ءيمانجۇزدى مەملەكەت باسشىلارى دا كەزدەسە باستادى. سولاردىڭ قاتارىنان كۇنى كەشە شۆەيتساريانىڭ پرەزيدەنتى ۋەلي ماۋرەر دە كورىندى. ول ءوزىنىڭ الداعى جىلعى اقپان ايىندا سوچيگە مىندەتتە تۇردە باراتىنىن بايانداي وتىرىپ, الەمنىڭ ەستيار جۇرتىن سپورتتى «ساياساتقا اينالدىرماۋعا» شاقىردى. مۇنى ول ءوز ەلىنىڭ «زوننتاگبليك» گازەتىنە بەرگەن سۇحباتىندا جەتكىزدى.
«سوندا قالاي, ءبىز ەندى ەشقايدا بارماۋىمىز كەرەك پە؟ – دەپ ويىن سۇراۋ سالۋ ارقىلى تارقاتتى ماۋرەر. – وندا يسلام ەلدەرىنە بارمايىق, سەبەبى, ولاردا زاڭعا دەگەن كوزقاراس مۇلدەم باسقاشا, اقش-قا اتتاپ اياق سالمايىق, ويتكەنى, ونىڭ كەيبىر شتاتتارىندا ءالى كۇنگە دەيىن ءولىم جازاسى قولدانىلادى». ونىڭ ويىنشا, سپورت جارىستارىنا الدەقانداي ءبىر ساياسي سەبەپتەرمەن بويكوت جاريالاۋ «ناعىز بەيشارالىق شەشىم بولىپ تابىلادى».
ءبىر ايتاتىنى, شۆەيتساريادا پرەزيدەنتتىك مەرزىم ءبىر جىلعا عانا سوزىلادى. سوندىقتان بيىل ۇكىمەتتى باسقارىپ وتىرعان ۋەلي ماۋرەر كەلەسى جىلى سوچيگە قورعانىس, تۇرعىنداردى قورعاۋ جانە سپورت فەدەرالدى دەپارتامەنتىنىڭ (مينيسترلىگىنىڭ) باسشىسى رەتىندە اتتانعالى وتىر. مۇنىڭ ەسەسىنە, 2014 جىلى كونفەدەراتسيا پرەزيدەنتى بولىپ وتىراتىن ديدە بۋركحالتەر دە سوچيگە مىندەتتى تۇردە باراتىنىن جاريالاپ ۇلگەردى.
دامير قوجامقۇل.
شايبالار دا سىناق تاپسىردى
رەسەي حوككەي فەدەراتسياسىنىڭ پرەزيدەنتى ۆلاديسلاۆ ترەتياك پەن سوچي-2014 ۇيىمداستىرۋ كوميتەتىنىڭ باسشىسى دميتري چەرنىشەنكو مۇز ايدىنىندا وينالاتىن شايبالاردى كوپشىلىك نازارىنا ۇسىندى.
شايبالاردىڭ تانىستىرىلىمى حوككەيدەن رەسەي – فينليانديا قۇرامالارى اراسىندا وتكەن كەزدەسۋدىڭ ءبىرىنشى ءۇزىلىسى كەزىندە ءباسپاسوز ورتالىعىندا ءوتتى.
«ءبىز شايبالاردى حالىقارالىق حوككەي فەدەراتسياسىنىڭ بارلىق تالاپتارىنا ساي دايىندادىق. ەنى 2,52 جانە ديامەترى 7,62 سانتيمەتردى قۇراعان شايبالاردىڭ سالماعى 170 گرامنان اسپايدى», – دەدى دميتري چەرنىشەنكو.
شايبالاردا سوچي وليمپياداسىنىڭ سيمۆولى بەينەلەنگەن. ول شايبا بەتىنىڭ 35 پايىزىن جاۋىپ تۇرادى. بۇل سۋرەتتەر حوككەي ويىندارى وتكىزىلەتىن ەكى الاڭعا ارنالىپ, ەكى ءتۇرلى تۇسكە بويالعان.
«شايبا – حوككەي ويىنىنداعى ەڭ ماڭىزدى بولشەكتەردىڭ ءبىرى. حوككەي جانكۇيەرلەرىنىڭ اراسىندا ولاردان كوللەكتسيا جينايتىندار دا كوپ كەزدەسەدى. ءىرى جارىستاردىڭ كۋاگەرى بولعان ادامنىڭ سپورت مەرەكەسىنىڭ ءبىر بولشەگىن وزىندە ساقتاپ قالعىسى كەلەتىنى تۇسىنىكتى», – دەدى ۆ.ترەتياك.
سوچي-2014 ۇيىمداستىرۋ كوميتەتىنىڭ ءباسپاسوز قىزمەتى 22 جەلتوقسان كۇنى www.tickets.sochi2014.com سايتى نەمەسە ۇيالى تەلەفونعا ارنالعان «سوچي-2014» باعدارلاماسى ارقىلى ايەلدەر حوككەيىنە ءۇش نە ودان كوپ بيلەت ساتىپ العان العاشقى 500 ادامعا وليمپيادا شايباسى سىيعا تارتىلاتىنىن مالىمدەدى.
ايدار ورىسباەۆ,
«ەگەمەن قازاقستان».
ەلىمىزدىڭ 40 ءجۋرناليسى
قىسقى ويىنداردان حابار تاراتادى
كەلەسى جىلى سوچيدە وتكىزىلەتىن XXII قىسقى وليمپيالىق ويىندارعا الەمنىڭ 83 ەلىنەن 13 مىڭنان استام ءتىلشى باراتىنى ءمالىم بولدى. ال ءبىزدىڭ ەلىمىزدەن قاتىساتىن 40 جۋرناليست ءدۇبىرلى دودانىڭ قاق ورتاسىنان ءوز وقىرماندارىنا اقپارات تاراتادى.
وسىدان ءبىرشاما كۇن بۇرىن پرەزيدەنت جانىنداعى ورتالىق كوممۋنيكاتسيالار قىزمەتىندە وتكىزىلگەن بريفينگتە سپورت جانە دەنەشىنىقتىرۋ ىستەرى اگەنتتىگىنىڭ توراعاسى تاستانبەك ەسەنتاەۆ سوچي وليمپياداسى ۇيىمداستىرۋ كوميتەتى بۇقارالىق اقپارات قۇرالدارى وكىلدەرى ءۇشىن جارىس وتەتىن الاڭنان 15 مەديا ورتالىق اشقانىن ايتقان بولاتىن. قاجەتتى تەحنيكالىق جابدىقتارمەن قامتاماسىز ەتىلگەن بۇل جەردە 250-دەن استام جۋرناليست جۇمىس جاساي الادى ەكەن. سونىمەن بىرگە, تەلەارنا قىزمەتكەرلەرىنە ارنالعان 40 شاقتى ارنايى بولمە بار.
ويىندارعا قاتىساتىن ءبىزدىڭ ۇلتتىق قۇرامانى دايىنداۋ ءۇشىن شەتەلدەن 17 مامان شاقىرىلىپتى. ولار سپورتتىڭ 8 ءتۇرى بويىنشا (شاڭعى تەبۋ, بياتلون, مانەرلەپ سىرعاناۋ, كونكي , شورت-ترەك , فريستايل جانە ت.ب) جاتتىعۋ وتكىزەدى. ال ازىرگە ليتسەنزيا العاندار تىزىمىنە شىعىس قازاقستان, اقمولا, پاۆلودار, باتىس قازاقستان, اقتوبە جانە قاراعاندى وبلىستارى مەن الماتى قالاسىنىڭ سپورتشىلارى ەنگىزىلگەن. وكىنىشكە قاراي, تاۋ شاڭعىسى سپورتى مەن ترامپليننەن سەكىرۋدەن, شاڭعى سپورتى, شانا سپورتىنان كەنجەلەپ قالعان ەكەنبىز. دەگەنمەن, وسى سپورت تۇرلەرىنە ليتسەنزيا الۋدىڭ ءۇمىتى ءالى جوعالا قويعان جوق.
وقىرماندارعا حالىقارالىق وليمپيادا كوميتەتىنە 2022 جىلى الماتىدا XXIV قىسقى وليمپيالىق ويىندار وتكىزۋ تۋرالى ءوتىنىم تاپسىرىلعانىن دا ايتقىمىز كەلەدى. بۇل ءىستىڭ سالماعى باسىم. سوندىقتان جاۋاپتى تۇلعالار قازىردەن باستاپ دايىندىق جۇمىستارىن باستاپ كەتتى.
ءامىرحان الماعانبەتوۆ,
«ەگەمەن قازاقستان».
