الماتىدا «ەسكى ۇيلەر» باعدارلاماسى بويىنشا جاڭا پاتەر الۋشىلار قاتارى كوبەيىپ كەلەدى
الماتىدا «ەسكى ۇيلەر» باعدارلاماسى بويىنشا جاڭا پاتەر الۋشىلار قاتارى كوبەيىپ كەلەدى
وقىرماندار ەسىندە بولسا, وتكەن جىلى اقپان ايىندا 2012-2015 جىلدارعا ارنالعان الماتى قالاسىنىڭ اۋماعىنداعى توزىعى جەتكەن تۇرعىن ۇيلەردى بۇزۋ تۋرالى قاناتقاقتى باعدارلاما قابىلدانعان-دى.
اتالمىش باعدارلاماعا سايكەس, قالانىڭ 7 اۋدانىندا بوس جەر تەلىمدەرى تابىلىپ, بۇل جەرلەرگە كوپقاباتتى تۇرعىن ۇيلەر سالىنىپ, وعان ەسكى باسپانالارى بۇزىلاتىن تۇرعىنداردى كوشىرۋ كوزدەلىنگەن. قىسقاسى, «ەسكى ۇيلەر» باعدارلاماسى بويىنشا جاڭا پاتەر الۋشىلار قاتارى كوبەيىپ كەلەدى.
جاقىندا المالى اۋدانىنداعى ايتەكە بي كوشەسىنىڭ بويىندا كوپپاتەرلى تۇرعىن ءۇي جاڭادان پايدالانۋعا بەرىلدى. قازىرگى زامان تالاپتارىنا ساي سالىنعان بۇل تۇرعىن ءۇي كەشەنى اتالمىش باعدارلاما بويىنشا سالىنعان.
قالا اكىمى احمەتجان ەسىموۆ قونىستانۋشىلاردى جاڭا پاتەرلەرىمەن قۇتتىقتاپ, جىل باسىنان بەرى قاراي ەسكى ۇيلەردى الماستىراتىن جاڭادان 7 ءۇيدىڭ پايدا بولعانىن ايتتى. بۇل – قالادا وسى باعدارلاما بويىنشا جاڭا ۇيلەر بەرىلگەن ءۇشىنشى اۋدان.
بيىلعى جىلى تۇركسىب اۋدانىندا «ەسكى ۇيلەر» باعدارلاماسى بويىنشا بەس ءۇي, قاراشا ايىندا مەدەۋ اۋدانىندا 72 پاتەرلى ءبىر تۇرعىن ءۇي پايدالانۋعا بەرىلدى. 2014 جىلى قالانىڭ قالعان ءتورت اۋدانىندا 21 ءۇيدىڭ قۇرىلىسى اياقتالماق. الماتىدا وسى جوبا بويىنشا 55 ەسكى ءۇي بۇزىلىپ, ولاردىڭ تۇرعىندارى جالپى اۋماعى 27,6 مىڭ شارشى مەتر بولاتىن جاڭا ۇيلەرگە كوشىرىلەدى.
ايناش ەسالي,
«ەگەمەن قازاقستان».
الماتى.
