ءبىرىنشى جارتىلاي ورتا سالماقتا جۇدىرىقتاساتىن قانداسىمىز ءاۋ باستا 33 جاستاعى گانالىق بوكسشى وبوداي سايمەن (35-3-1, 26 كو) جۇدىرىقتاسۋى ءتيىس بولعان. الايدا جەكپە-جەككە ءبىر كۇن قالعاندا وبودايدىڭ شارشى الاڭعا شىقپايتىنى بەلگىلى بولىپ, قانات 27 جاستاعى ەكۆادورلىق بوكسشى دجەيسون ميندامەن (14-4-1, 8 كو) جەكپە-جەك وتكىزدى.
ون راۋندقا ەسەپتەلگەن جەكپە-جەك جەتىنشى راۋندتا اياقتالدى. الدىمەن قانات يسلام قارسىلاسىن ءتورتىنشى راۋندتا ءبىر رەت نوكداۋنعا جىبەرسە, جەتىنشى راۋندتا تاعى دا سول جاعداي قايتالاندى. تەز ەس جيىپ ۇلگەرگەن ميندا جەكپە-جەكتى قايتا جالعاستىرۋعا دايىن ەكەنىن تورەشىگە ۇقتىردى. بىراق كوپ ۇزاماي قازاقستاندىق بوكسشى قارسىلاسىن اۋىر نوكاۋتقا ءتۇسىرىپ, جەكپە-جەكتى مەرزىمىنەن بۇرىن اياقتادى.
جەرلەسىمىز 14 اي ۇزىلىستەن كەيىن ۇلكەن رينگكە قايتا ورالىپ, مانسابىنداعى جارقىن جەڭىسىن قايتا جالعادى. ايتا كەتەيىك, قانات يسلام ەڭ كەيىنگى كەزدەسۋىن 2019 جىلى الماتىدا وتكىزىپ, WBO International تيتۋلى ءۇشىن ايقاستا ناميبيالىق ۋولتەر كاۋتوندوكۆانى (18-2, 17 كو) جەڭگەن ەدى.
