دەسە دە كەي سپورت تۇرلەرىنەن جەرلەستەرىمىزدىڭ تىنىسى تەك ەل تاۋەلسىزدىگىنەن كەيىن, ەلباسىمىزدىڭ سپورتقا دەگەن ەرەكشە قامقورلىعىنىڭ ارقاسىندا اشىلا ءتۇستى. تۇڭعىش پرەزيدەنت نۇرسۇلتان نازارباەۆتىڭ باستاماسىمەن ەلىمىز 30 جىلدا سپورت سالاسىندا تولايىم تابىستارعا جەتىپ قانا قويماي, سپورت ينفراقۇرىلىمدارىن دامىتۋدا دا العا قادام جاسادى. وسىنداي قولداۋدىڭ ارقاسىندا جەرلەستەرىمىز ەگەمەندىكتىڭ 30 جىلدىعىندا تىڭنان تۇرەن سالىپ, بۇرىن-سوڭدى جەتىستىككە جەتىپ كورمەگەن سپورت تۇرلەرىن مەڭگەرىپ, الەمدىك ارەنالاردا اتوي سالدى. اتاپ ايتار بولساق, كوركەم گيمناستيكا, سپورتتىق اكروباتيكا, سۋ سپورت تۇرلەرى, ۆەلوسپورت جانە بىرقاتار قىسقى سپورت ءتۇرى بار. سولاردىڭ اراسىندا ەڭ نەگىزگىسى – مانەرلەپ سىرعاناۋ سپورتى ەدى. ويتكەنى تاۋەلسىزدىكتىڭ اق تاڭى اتقاننان كەيىن سپورت ساڭلاقتارىمىز ءتۇرلى جارىستاردا ەل قورجىنىنا جۇلدە سالا باستادى. ماسەلەن, مۇزايدىننىڭ مۇزبالاعى سانالعان دەنيس تەن 2014 جىلى سوچيدە وتكەن قىسقى وليمپيا ويىندارىندا قولا مەدال الىپ, جالعىز جۇلدەمەن رەسەي تورىندە مەرەيىمىزدى اسىرعانى جانكۇيەرلەر مەن ەل ەسىندە ماڭگىلىك ساقتالاتىنى انىق. ودان بولەك دەنيس ەلىمىزدە وتكەن قىسقى ازيا ويىندارى مەن ۋنيۆەرسيادادا الدىنا جان سالعان جوق. وڭتۇستىك كورەيانىڭ باس شاھارى – سەۋلدە جالاۋى جەلبىرەگەن ءتورت قۇرلىق چەمپيوناتىندا اتوي سالدى. سونداي-اق لوندون مەن شانحاي قالالارىندا ۇيىمداستىرىلعان كەزەكتى الەم چەمپيوناتتارىندا ءبىر كۇمىس, ءبىر قولا مەدال ولجالادى.
ال ايەلدەر اراسىندا مانەرلەپ سىرعاناۋدان ماقتانىشىمىز ەليزابەت تۇرسىنباەۆا سپورتتىڭ بۇل تۇرىنەن تولايىم تابىستارعا قول جەتكىزىپ, قارسىلاستارى قايمىعاتىن ايگىلى سپورتشىعا اينالدى. 2019 جىلدىڭ ناۋرىزىندا سايتامادا (جاپونيا) وتكەن مانەرلەپ سىرعاناۋدان الەم چەمپيوناتىندا كۇمىس مەدال الىپ, نەگىزگى باعدارلامادا 4 اينالىم (4S) ەلەمەنتىن ورىنداعان الەمدەگى العاشقى مانەرلەپ سىرعاناۋشى قىز رەتىندە تاريحقا ەندى. بۇعان دەيىن مانەرلەپ سىرعاناۋ تاريحىندا 16 جاستان اسقان ايەلدەر اراسىندا ەشكىم ءتورت اينالىم ەلەمەنت سەكىرمەگەن-ءدى.
جۋىردا ءدال وسى دەنيس تەن مەن ەليزابەت تۇرسىنباەۆانىڭ ءىزىن جالعاعان سپورتشىلار ەل تاۋەلسىزدىگىنىڭ 30 جىلدىعىنا ورايلاستىرىلعان مانەرلەپ سىرعاناۋدان قازاقستان كۋبوگىندا باق سىنادى. ەلىمىزدىڭ ەڭ ۇزدىك دەگەن سپورتشىلارىنىڭ باسىن قوسقان الماتىداعى باسەكەدە بىرقاتار جاڭا ەسىمنىڭ جارق ەتكەنىنە كۋا بولدىق.
جارىستىڭ العاشقى كۇنىندە قىزدار اراسىنداعى باسەكەدە قاراعاندىلىق پولينا لوبينتسەۆا جەڭىسكە جەتتى. كۇمىس جانە قولا جۇلدەنى تيىسىنشە الماتىلىقتار اناستاسيا لوبانوۆا مەن بوگدانا راكيشەۆا يەلەندى. ەرلەر اراسىندا ەلوردالىق سپورتشى دياس جيرەنباەۆ توپ جاردى. كۇمىس مەدالدى قاراعاندىلىق دميتري كارپۋحين, قولانى الماتىلىق سيمون گەيكو ەنشىلەدى.
ءجاسوسپىرىم ۇلدار اراسىندا الماتىلىق ارتۋر سماعۇلوۆقا تەڭ كەلەر ەشكىم بولمادى. وزگە ارىپتەستەرىنە قاراعاندا ساۋاتتى ونەر كورسەتكەن ارتۋر قازاقستان كۋبوگىنىڭ جەڭىمپازى اتاندى. ەكىنشى جانە ءۇشىنشى ورىندى شىمكەنتتىك ولەگ مەلنيكوۆ پەن قاراعاندىلىق نيكيتا كريۆوشەەۆ قانجىعاسىنا بايلادى. ءجاسوسپىرىم قىزدار اراسىندا شىمكەنتتىك كارينا يسساكوۆا قارسىلاستارىن شاڭ قاپتىرىپ, التىن جۇلدە ولجالادى. بۇل باسەكەدەگى كۇمىس مەدالدى شىمكەنت قالاسىنىڭ تاعى ءبىر وكىلى ايعانا سانسىزباەۆا, قولانى ەلوردالىق ميلەنا سەمكوۆا جەڭىپ الدى.
ەكىنشى كۇنگى باسەكەدە ەرلەر اراسىندا 16 جاستاعى الماتىلىق ميحايل شايدوروۆ دارا شىقتى. بۇگىندە ول ايگىلى وليمپيادا چەمپيونى الەكسەي ۋرمانوۆتىڭ قولاستىندا جاتتىعىپ, سپورتتىڭ قىر-سىرىن جەتىك مەڭگەرۋدە. 2019 جىلى الماتىداعى ەل چەمپيوناتىندا توپ جارسا, مىنە, اراعا ەكى جىل سالىپ ەل كۋبوگىندا باعى جاندى.
بۇل سايىستا ەكىنشى ورىندى نۇر-سۇلتان قالاسىنىڭ وكىلى دياس جيرەنباەۆ قاناعات تۇتسا, ۇزدىك ۇشتىكتى دميتري كارپۋحين تۇيىندەدى. ال ايەلدەر اراسىنداعى سايىستا ءۇش مەدال جيىنتىعىن الماتىلىق قىزدار ءوزارا ءبولىسىپ الدى. التىن مەدالدى ماريا گرەچانايا جەڭىپ السا, اجار جۇماحانوۆا – كۇمىس, اناستاسيا لوبانوۆا قولا مەدالدى ەنشىلەدى.
ەل كۋبوگى جولىنداعى جارىس مارەسىنە جەتكەن سوڭ قازاقستان قۇراماسىنىڭ باس باپكەرى قۇرالاي ۋزۋروۆا ءوز ويىن ورتاعا سالىپ, الداعى جوسپارلارىن ايتتى. «بىلتىر پاندەمياعا بايلانىستى حالىقارالىق جارىستارعا قاتىسۋ بىلاي تۇرسىن, جاتتىعۋ جۇمىسىن جاساي الماي قالدىق. بىراق سپورتشىلار سوعان قاراماستان, ءۇي جاعدايىندا جاتتىعىپ, بارىنشا سپورتتىق بابىن ساقتاۋعا تىرىستى. ءسويتىپ تەك تامىز ايىنىڭ سوڭىندا عانا مۇز ايدىنعا ورالۋعا مۇمكىندىك الدىق. قازىرگى تاڭدا سپورتشىلار سپورتتىق بابىنا ەنىپ ۇلگەردى, كۇندەلىكتى ەكى رەتتىك جاتتىعۋلار ءوز جەمىسىن بەرىپ جاتىر», دەدى ول.
سونىمەن قاتار ۋزۋروۆا الداعى ۋاقىتتا حالىقارالىق جارىستاردا قازاقستان نامىسىن قورعايتىن سپورتشىلاردىڭ ەسىمىن اتادى. «ەرلەر اراسىنداعى حالىقارالىق جارىستاردا ەل نامىسىن جۋىردا عانا قازاقستان كۋبوگىندا, ەل چەمپيوناتىندا جوعارى ناتيجە كورسەتكەن ميحايل شايدوروۆ قورعايدى. بۇل سپورتشى كەيىنگى ەكى ماۋسىمدا جاقسى ناتيجە كورسەتىپ, ءتورت سەكىرۋدەن تۇراتىن وتە كۇردەلى باعدارلامالاردى ورىنداپ ءجۇر. ايەلدەر اراسىنداعى جەكەلەي سىندا قازاقستان نامىسىن ياسمين تەكيك قورعايدى. ول كونكيمەن وتە ۇقىپتى جۇمىس ىستەپ, بارلىق جاتتىعۋدى ەش قاتەسىز ورىندايدى. سونداي-اق ماريا گرەچانايا جۋىردا جاسوسپىرىمدەر اراسىندا وتەتىن بولگارياداعى Sophia Trophy جارىسىندا ونەر كورسەتەدى», دەيدى باس باپكەر.
