ء«بىز اي سايىن كوممۋنالدىق تولەمدەردى, توقسان سايىن سالىقتاردى تولەپ وتىرمىز. كوبىمىز بيزنەس اشۋ ءۇشىن نەسيە الدىق. قازىر ءبىزدىڭ قىزمەتكەرلەرىمىز جۇمىسسىز وتىر. وزىمىزدە شىعىنعا باتتىق. بارلىق سانيتارلىق نورما مەن ەرەجەنى ساقتاي وتىرىپ, جۇمىس ىستەۋگە رۇقسات بەرۋىڭىزدى سۇرايمىز. مەيرامحانالاردا 120-150 ادامعا ارنالعان بانكەت وتكىزۋگە رۇقسات ەتىلسە, ءبىز تابىس تابا الار ەدىك» دەيدى مەيرامحانا يەسى سالتانات بەكبولوۆا.
اتىراۋ وبلىسىنىڭ كاسىپكەرلەرى مەن جۇمىس بەرۋشىلەر وداعىندا وتكەن جيىندا جۇمىس توبىن قۇرۋ تۋرالى شەشىم قابىلداندى. جۇمىس توبىنا بانكەت زالدارىنىڭ يەلەرى, كاسىپكەرلەر مەن جۇمىس بەرۋشىلەر وداعىنىڭ, جەرگىلىكتى اتقارۋشى ورگانداردىڭ ماماندارى كىرمەك. ولاردىڭ قاتىسۋىمەن پرەزيدەنتتىڭ, ۇكىمەت جانىنداعى قازاقستاندا كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ, قر باس سانيتارلىق دارىگەرىنىڭ اتىنا 150 ادامعا دەيىن تولتىرىلاتىن بانكەت زالدارىنىڭ جۇمىسىنا رۇقسات بەرۋ تۋرالى ءوتىنىش جاسالدى.
