كونفەرەنتسيانى وزبەكستاننىڭ جاستار ءىسى جونىندەگى اگەنتتىگى ۇيىمداستىردى. القالى وتىرىسقا شىۇ, بۇۇ, ەقىۇ, سياقتى حالىقارالىق ۇيىمداردىڭ باسشىلارى, وكىلدەرى, ساراپشىلار مەن جاستار قاتىستى.
ب.امىرەەۆ ءوزىنىڭ العى سوزىندە جاستار ماسەلەسىندە ىنتىماقتاستىق تاقىرىبى تەك باسىم باعىتتاردىڭ ءبىرى عانا ەمەس, سونىمەن قاتار تۇركى كەڭەسىنە مۇشە مەملەكەتتەردىڭ الەۋمەتتىك-ەكونوميكالىق جانە ساياسي بولاشاعىن انىقتايتىن فاكتور بولىپ تابىلاتىندىعىن اتاپ ءوتتى.
ول جاستاردى دەسترۋكتيۆتى ءىس-شارالاردان ساقتاندىرۋ ۇيىمنىڭ ماڭىزدى مىندەتى ەكەنىن, سوندىقتان باسا نازاردا ۇستاۋ كەرەكتىگىن ايتتى.
وسىنداي ماڭىزدى كونفەرەنتسيانى ۇيىمداستىرعانى ءۇشىن وزبەكستان ۇكىمەتىنە ريزاشىلىعىن ءبىلدىردى.
سونىمەن قاتار باس حاتشى وزبەكستان پرەزيدەنتى شاۆكات ميرزيوەۆتىڭ بۇۇ باس اسسامبلەياسىنىڭ 72-سەسسياسىندا «بۇۇ-نىڭ جاستار قۇقىقتارى تۋرالى حالىقارالىق كونۆەنتسياسىن» قابىلداۋ تۋرالى باستاماسىنىڭ ماڭىزدىلىعىنا توقتالدى.
وزبەكستاننىڭ مەملەكەتتىك جاستار ساياساتىن تۇبەگەيلى رەفورمالاۋ جانە جاڭا دەڭگەيگە كوتەرۋ بويىنشا قابىلدانعان شارالاردى جوعارى باعالادى.
بۇدان وزگە ول جاستار سالاسىنداعى ىنتىماقتاستىقتى نىعايتۋ ۇيىم قىزمەتىنىڭ ماڭىزدى باعىتى ەكەنىن ەسكەرە وتىرىپ, «جاستار پلاتفورماسىن» قۇرۋ ەڭ ناتيجەلى جۇمىستاردىڭ قاتارىندا ەكەنىن ايتىپ ءوتتى.
وسى ورايدا باس حاتشى كونفەرەنتسيا قوناقتارىن تۇركى كەڭەسى ەلدەرىندەگى جاستاردىڭ ورتاق ماسەلەلەرىمەن تانىستىردى.
ب.امىرەەۆ سونداي-اق تۇركى كەڭەسىنىڭ ۇەۇ شەڭبەرىندە «جاستار پلاتفورماسىن» قۇرۋى ەڭ ناتيجەلى جوبا ەكەنىن باسا ايتتى.
سونىمەن قاتار تۇركى كەڭەسىنىڭ باسشىسى حالىقارالىق قاۋىمداستىقتى يسلامدى ەكسترەميزممەن ءوزارا بايلانىستىرىپ كورسەتەتىن نەگىزسىز تالاپتاردى توقتاتۋعا جانە نازار تەك ەكسترەميزممەن كۇرەسۋگە عانا ەمەس, سونىمەن قاتار جاستاردى يسلام ءدىنىنىڭ شىنايى قۇندىلىقتارىنا تاربيەلەۋ ءۇشىن قولدان كەلگەننىڭ ءبارىن جاساۋعا شاقىردى.
