175 مىڭنان اسا دومەن تىركەلگەن
دەسە دە ءالى دە دومەندىك اتاۋدى قازاقستاندىق حوستينگكە اۋىستىرۋعا كۇمانمەن قارايتىندار بار. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ دەرەگىنە سايكەس, بۇگىندە قازنەتتە 175 مىڭنان اسا kz جانە «قاز» دومەندىك اتاۋ تىركەلىپ, ونىڭ 99 632-ءسى جۇمىس ىستەپ تۇر.
«بىلتىر مينيسترلىك اقپاراتتاندىرۋعا قاتىستى زاڭ تالاپتارىن ساقتاۋ ماقساتىندا قازاقستاندىق جەلىلىك اقپارات ورتالىعىنا حابارلاما جولداپ, تىركەۋشىلەرگە 45 مىڭنان استام دومەندىك اتاۋعا بايلانىستى تالاپ بۇزىلعانى جايلى ەسكەرتىپ, جاعدايدى 2020 جىلدىڭ 30 قاراشاسىنا دەيىن رەتتەۋ ءۇشىن مەرزىم بەرىلگەن بولاتىن. الايدا بۇل مەرزىمدى كەيىنگە اۋىستىرۋ تۋرالى شاعىمدار مەن وتىنىشتەر تۇسە باستادى. ويتكەنى بۇل ءراسىمدى ىسكە اسىرۋ قارجىلىق جانە تەحنولوگيالىق تۇرعىدان قيىنعا سوقتى. جوعارىداعى احۋال مەن كوروناۆيرۋس پاندەمياسىنان تۋىنداعان تاۋەكەلدەردى نازارعا الىپ, مينيسترلىك ءتيىستى تالاپتاردىڭ ورىندالۋ مەرزىمىن 1 اقپانعا دەيىن ۇزارتۋ تۋرالى شەشىم قابىلدادى. بيىلعى 8 اقپانداعى جاعدايعا سايكەس, قازىر 18 623 دومەندىك اتاۋ قالدى. دەمەك, دومەندەردىڭ ۇشتەن ەكىسى قازاقستاندىق حوستينگكە كوشتى. ونىڭ ىشىندە 5,6% قازاقستاننىڭ رەزيدەنتتەرى ەمەس», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسحات ورازبەك.
ۆەدومستۆو وكىلى ينتەرنەت رەسۋرستاردى ەلىمىزدىڭ اۋماعىنا كوشىرۋ ۇدەرىسى شەتەلدىك دومەندەرى بار تانىمال سايتتاردىڭ جۇمىسىنا كەرى اسەرىن تيگىزبەيتىنىن ايتتى. قۇزىرلى ورگان kz جانە «قاز» دومەندەرىنە يە الەمدىك كونتەنت پروۆايدەرلەرىمەن تەڭ قۇقىقتى جاعدايدا ىنتىماقتاسۋعا دايىن ەكەندەرىن جەتكىزدى. ماسەلەن, Google.kz-
ءتىڭ بىرنەشە قىزمەتى قازاقستاندا ورنالاسقان.
تالاپتى بۇزعانداردىڭ جۇمىسى توقتاتىلادى
جۇيەلىك كەمشىلىكتەردىڭ الدىن الۋ ماقساتىندا جاۋاپتى ۆەدومستۆو دومەندىك اتاۋلاردى تىركەۋشىلەر مەن كومپيۋتەرلىك تاۋەكەلدەرگە ارەكەت ەتەتىن قىزمەتپەن (CERT) بىرلەسىپ, انىقتالعان بۇزۋشىلىقتارعا بايلانىستى تالداۋ جۇرگىزىپ كەلەدى. ونىڭ ناتيجەسىندە قولدانىستاعى تالاپتى بۇزعان kz جانە «قاز» دومەندىك اتاۋلارعا يە ينتەرنەت رەسۋرستارىنىڭ قىزمەتى كەزەڭ-كەزەڭىمەن توقتاتىلادى.
«بارلىعىنىڭ قىزمەتىن توقتاتىپ, جاپپاي جازالاۋ جوسپاردا جوق. مينيسترلىككە دومەندىك اتاۋلاردىڭ يەلەرى توقتاتۋ تۋرالى شەشىمدى 15-30 كۇنگە كەيىنگە شەگەرۋدى ءوتىنىپ جاتادى. كوپ جاعدايدا ءار ءوتىنىش بويىنشا مينيسترلىك وڭ شەشىم قابىلداپ, كەيىنگە قالدىرۋعا مەرزىم بەرەدى. بۇل ورايدا كەيبىرىنە كوپ ۋاقىت قاجەت ەكەنىن تۇسىنەمىز. قازىر 3 مىڭنان استام دومەندىك اتاۋدى قازاقستان اۋماعىنا كوشىرۋگە بايلانىستى جۇمىس جۇرگىزىلىپ جاتىر», دەدى ا.ورازبەك.
قورعاۋ قىزمەتى تەگىن ۇسىنىلادى
ۆيتسە-ءمينيستردىڭ ايتۋىنشا, قولعا الىنعان جۇمىستىڭ ارتىقشىلىعى كوپ. ايتالىق, WebTotem وتاندىق جۇيەسى ارقىلى قازاقستاندىق ينتەرنەت رەسۋرس-
تاردى اقىسىز نەگىزدە قورعاۋ بويىنشا قىزمەت ءتۇرى ۇسىنىلماق. وسى رەتتە kz جانە «قاز» دومەندىك اتاۋى بار حوستينگ يەلەنۋشىلەرى اقپاراتتىق قاۋىپسىزدىك كوميتەتىنە تەگىن قىزمەت الۋعا ءوتىنىش جىبەرۋگە قۇقىلى. بارلىق قازاقستاندىق دومەندىك اتاۋدى رەسپۋبليكانىڭ اۋماعىنا كوشىرۋ ۇدەرىسى اياقتالعان بويدا مينيسترلىك بايلانىس وپەراتورلارىمەن بىرلەسىپ, قازنەتتى ەلىمىزدىڭ ازاماتتارىنا ءتاريفسىز كۇيىندە قولجەتىمدى ەتۋدى جوسپارلاپ وتىر.
«ەلىمىزدەگى شىنايى جاعدايمەن بەتپە-بەت كەلگەن كليەنتتەرمەن تىعىز جۇمىس ىستەپ كەلەمىز. ءسوزسىز حوستينگتىڭ ورنالاسۋ مەملەكەتىن اۋىستىرۋىمىز كەرەك. ءىس جۇزىندە تەحنيكالىق سەبەپتەرگە بايلانىستى دومەندى قازاقستانعا اۋىستىرا المايتىن كليەنتتەردىڭ بەلگىلى ءبىر سانى بار. ولار kz دومەنىنەن باسقا ءبىر دومەنگە باعىتتاۋ جۇيەسىن ىسكە قوسادى. الايدا كليەنتتەردىڭ 90% مۇنى ەموتسيونالدى تۇردە قابىلدايدى. دومەن تىركەۋشى كومپانيا رەتىندە ادامدارمەن سويلەسەمىز جانە مۇنى كورەمىز. مەنىڭ ويىمشا, باسقا دومەندى پايدالانۋدى قالايتىنداردىڭ ۇلەسى 5-10% دەڭگەيىندە قالار. بىراق ءىس جۇزىنە كەلگەندە كليەنتتەردىڭ kz دومەنىمەن قالاتىنىن بايقاپ وتىرمىز. ويتكەنى بۇل رەسەيلىك نەمەسە شەتەلدىك اتاۋ ەمەس. شەتەلدىك بالاماعا قاراعاندا kz دومەنىنە سەنىم جوعارى», دەدى «Hoster.KZ كومپانياسى» جشس ديرەكتورى دەنيس سۋحاچەۆ.
سونىمەن قوسا ەلىمىز لاتىن قارپىنە اۋىسقان جاعدايدا بۇل دومەن اتاۋىنا قالاي اسەر ەتەتىنى بەلگىلى بولدى. اقپاراتتىق قاۋىپسىزدىك كوميتەتىنىڭ ساراپشىسى ايدانا التاەۆانىڭ ايتۋىنشا, بۇل ماسەلەگە قاتىستى حالىقارالىق ۇيىمدارمەن ءتيىستى كەلىسسوزدەر جۇرگىزىلىپ, qaz جانە qz دومەندىك اتاۋلارى ەلىمىزدە تىركەلگەن. ال لاتىن قارپىنە تولىق اۋىسقان جاعدايدا بارلىق رەسمي پروتسەدۋرانى ساۋدا جانە ينتەگراتسيا مينيسترلىگى جۇرگىزەتىن بولادى دەدى كوميتەتتىڭ وكىلى. ا.التاەۆا دومەندىك اتاۋلاردى اۋىستىرۋ كەزىندە بيۋدجەتتەن قاراجات بولىنبەيتىنىن ايتتى.
