اگەنتتىكتىڭ وتكەن جىلعى اتقارعان جۇمىستارىنىڭ قورىتىندىلارى شىعارىلىپ, الداعى كەزەڭدەگى مىندەتتەرى مەن ولاردى ىسكە اسىرۋ جوسپارلارى تالقىلانعان القا وتىرىسىندا بايانداما جاساعان انار جايىلعانوۆا ساپالىق قۇرامنىڭ ارتىپ, مەريتوكراتيا قاعيداتىن ساقتاۋ جانە كادر تۇراقتىلىعى كورسەتكىشتەرىنىڭ جاقسارعانىن اتاپ ءوتتى.
ول سونداي-اق 7,5 مىڭ مەملەكەتتىك قىزمەتشىنىڭ مانساپتىق ىلگەرىلەۋگە قول جەتكىزگەنىن حابارلادى. بۇل بارلىق كونكۋرس بويىنشا تاعايىندالعانداردىڭ جالپى سانىنىڭ 60 پايىزىن قۇرايدى.
وتكەن جىلى اگەنتتىك ساياسي مەملەكەتتىك قىزمەتتى كاسىبيلەندىرۋ ماقساتىندا العاش رەت «جاڭا فورماتسيا باسشىسى» باعدارلاماسىن ەنگىزگەن بولاتىن. سينگاپۋردىڭ لي كۋان يۋ مەملەكەتتىك ساياسات مەكتەبى مەن مەملەكەتتىك باسقارۋ اكادەمياسى جانە نازارباەۆ ۋنيۆەرسيتەتى بىرلەسىپ ىسكە اسىرعان بۇل جوبانىڭ باستى ماقساتى – ساياسي قىزمەتشىلەردى زامان تالابىنا ساي وقىتۋ.
وتكەن جىلى وسى باعدارلاماعا 50 ساياسي قىزمەتشى قاتىسسا, بيىل تاعى 50-ءىن وقىتۋ جوسپارلانىپ وتىر. «جاھاندىق كوزقاراس», ء«تيىمدى كوممۋنيكاتسيالار» جانە «ترانسفورماتسيالىق كوشباسشىلىق» بويىنشا وتاندىق جانە شەتەلدىك بيزنەس-ترەنەرلەر مەن كوۋچتەردەن بىلىكتىلىكتەرىن ارتتىرعانداردىڭ دەنى – ۆيتسە-مينيسترلەر, اكىمدەردىڭ ورىنباسارلارى, پرەزيدەنت اكىمشىلىگى بولىمدەرىنىڭ باسشىلارى, سونداي-اق پرەزيدەنتتىك كادر رەزەرۆىندە تۇرعان جاستار.
«سونداي-اق باسشىلاردىڭ باسقارۋشىلىق تاجىريبەسىن ءتيىمدى پايدالانۋ ماقساتىندا مەملەكەت باسشىسىنىڭ 2020 جىلعى 13 قاراشاداعى جارلىعىمەن ساياسي قىزمەتشىلەردىڭ روتاتسياسى ەنگىزىلدى. ساياسي قىزمەتشىلەر تاعايىندالعان كۇننەن باستاپ ءار ءتورت جىل سايىن روتاتسيادان وتەدى. 2021 جىلى 67 ساياسي قىزمەتشى روتاتسياعا جاتادى», دەدى اگەنتتىك توراعاسى.
القالى جيىندا جەكەلەگەن ساياسي لاۋازىمدارعا بىلىكتىلىك تالاپتارىن بەلگىلەۋ جولدارى تالقىلانىپ, مەملەكەتتىك باسقارۋ جۇيەسىنە جوعارى بىلىكتى جاس مامانداردى تارتۋ ماسەلەسى دە ءسوز بولدى.
مەملەكەتتىك قىزمەتتىڭ تيىمدىلىگىن ارتتىرۋدا ماڭىزدى ءرول اتقارتىن كادر پروتسەستەرىن تسيفرلاندىرۋ جانە اۆتوماتتاندىرۋ, مەملەكەتتىك قىزمەت سالاسىنداعى زاڭناما مەن ادەپ كودەكسىنىڭ ساقتالۋىنا باقىلاۋ جاساۋ باعىتتارى دا نازاردان تىس قالمادى.
ال مەملەكەتتىك قىزمەت سالاسىن باقىلاۋعا قاتىستى تولىعىراق اقپارات بەرگەن اگەنتتىك توراعاسى وتكەن جىلى 743 تەكسەرۋ وتكىزىلىپ, 15 مىڭنان استام زاڭ بۇزۋشىلىقتىڭ انىقتالعانىن مالىمدەدى.
مەملەكەتتىك قىزمەت سالاسىنداعى ساياساتتى ىسكە اسىرۋ بويىنشا اتقارىلعان جۇمىستارعا كەڭىنەن توقتالعان اگەنتتىك توراعاسى نەگىزگى باسىمدىق – مەملەكەت باسشىسى العا قويعان مىندەتتەردەن تۋىندايتىن ستراتەگيالىق-يننوۆاتسيالىق مەملەكەتتىك قىزمەتتى قالىپتاستىرۋ بولىپ قالاتىنىن قاداپ ايتتى.
القا وتىرىسىنا پرەزيدەنت اكىمشىلىگى باسشىسىنىڭ ورىنباسارى تيمۋر سۇلەيمەنوۆ, قاراعاندى وبلىسىنىڭ اكىمى جەڭىس قاسىمبەك, پرەزيدەنت اكىمشىلىگى مەن پرەمەر-مينيستر كەڭسەسىنىڭ, حالىقارالىق ۇيىمدار مەن ازاماتتىق قوعامنىڭ وكىلدەرى جانە اگەنتتىكتىڭ جانە وعان باعىنىستى ۇيىمدار مەن اۋماقتىق دەپارتامەنتتەرىنىڭ قىزمەتكەرلەرى قاتىسىپ, ويلارىن ورتاعا سالدى.
