مىنە, جاقىندا قازاق رۋحانياتى تاعى ءبىر قۇندى دۇنيەمەن تولىقتى. كورنەكتى مەملەكەت جانە قوعام قايراتكەرى, تانىمال عالىم ومىرزاق وزعانباەۆتىڭ بەس تومدىق شىعارمالار جيناعى جارىققا شىقتى. ءالى سياسى كەۋىپ ۇلگىرمەگەن جاڭا تۋىندى «رەسەي مەملەكەتتىك دۋماسى», «تاريح تاعىلىمى», «قازاقتىڭ شەشەندىگى مەن كوسەمدىگى استاسقاندا», «جارىق جۇلدىزدار», «تاعزىم» اتتى بەس تومنان قۇرالىپ, قازاقتىڭ تاريحي تۇلعالارىنىڭ, اتاقتى كوسەمدەرى مەن شەشەندەرىنىڭ ەل كوسەگەسىن كوگەرتۋ جولىنداعى جانكەشتى قايراتكەرلىك ىستەرى تولاعاي تولعانىستارمەن باياندالعان.
اۆتور شىعارمالارىندا الاش مۇراسى مەن مۇراتىن تانۋدىڭ تەرەڭ تولعامى كورىنىس تاپقان. ۇلتىمىزدىڭ سان عاسىرلىق رۋحى مەن مۇراتىنىڭ ۇلى بۇلقىنىسىنا اينالعان الاش قوزعالىسى قايراتكەرلەرىنىڭ تاعدىرى دا – وزەكتى ماسەلە. الاش قايراتكەرلەرى كۇرەسىنىڭ تاعىلىمى دا, الاش قالامگەرلەرىنىڭ مۇراسى دا جىلدان-جىلعا قازاقتىڭ رۋحاني-مادەني ومىرىنە ەنىپ جاتقاندىعى كوڭىل قۋانتادى. الاش زيالىلارىنىڭ ساياسي جانە رۋحاني كۇرەسىندەگى نەگىزگى ماقسات, وراسان مىندەت, ول ۇلتىمىزدى ۇيىستىرۋ, سول ارقىلى ەلدىگىمىزدى ايقىنداۋ بولىپ تابىلادى. قازاقتىڭ وقىعان, ۇلتجاندى ازاماتتارىنىڭ تىزە قوسىپ, ەلدىڭ بولاشاعى ءۇشىن اتقارعان ەرەن ىستەرى دە ايقىن كورىنىس تاپقان. رەسەيدە قوس ۇكىمەتتىڭ ورناۋىنىڭ سالدارى قازاق حالقىنىڭ ءوز الدىنا شاڭىراعى بولەك ەل بولۋىن كوكسەگەن الاش سەركەلەرىنىڭ ساياسي ساحناعا شىعىپ ۇلكەن مىنبەر مەملەكەتتىك دۋمادان ءۇن قاتقانى تاريحتان ءمالىم. بۇل كىتاپتاردا ءا.بوكەيحان, ب.قۇلمانوۆ, م.تىنىشباەۆ, ش.قوسشىعۇل ۇلى, ت.ب مەملەكەتتىك جۇيە قۇرۋعا كۇرەسكەن قايراتكەر تۇلعالار تۋرالى دەرەكتەردى كوپتەپ كەزدەستىرەسىڭ.
عالىم ومىرزاق وزعانباي ۇلى اعامىزدىڭ ەسەلى دە ەڭسەلى ەڭبەگى جيىرماسىنشى عاسىر باسىنداعى قوعامدىق وي-سانانى وياتىپ, ۇلتىن ازاتتىق پەن تاۋەلسىزدىك جولىنا جەتەلەگەن حالقىمىزدىڭ اياۋلى پەرزەنتتەرىنىڭ ارۋاقتارىنا باس ءيىپ, ماڭگى وشپەس بەينەلەرىنە قويعان ەسكەرتكىشى دەپ ايتۋعا بولادى. تاريحي-تانىمدىق مۇرامىزدىڭ قاينارىن قالقىپ الىپ, شىعارمانىڭ وزەگىنە اينالدىرىپ ەش قوسپاسىز, بوياماسىز, بۇلتارتپاس دەرەكتەردى, اينىماس ايعاقتاردىڭ قيىسىن كەلتىرە قولدانا وتىرىپ وقىرمانعا جايىپ سالعان.
بەيبىت وسپان,
قازاقستان جۋرناليستەر وداعىنىڭ مۇشەسى
