بۇعان دەيىن, ەكوبەلسەندى تيمۋر ەلەۋسىزوۆ الماتى قالاسى بوستاندىق اۋدانى مەن ىلە-الاتاۋ پاركىنىڭ شەكاراسىندا 5 000 اعاش كەسىلگەنىن مالىمدەگەن ەدى. كەيىن الماتى قالاسىنىڭ جاسىل ەكونوميكا باسقارماسى جاسىل جەلەكتەردى كەسۋ جۇرگىزىلگەنىن راستادى, الايدا ولاردىڭ سانى مەن تۇقىمدىق قۇرامى انىقتالىپ جاتقانىن تۇسىندىردى.
دەسە دە, ارمان احمەتوۆ اۋەل باستان سەل ۇستايتىن بوگەتتىڭ قۇرىلىسىنا ارنالعان اۋماق ىلە-الاتاۋ ۇلتتىق پاركىنە تيەسىلى بولعانىن جەتكىزدى.
احمەتوۆتىڭ ايتۋىنشا, 2019 جىلدىڭ مامىرىندا ۇكىمەتتىڭ ءوزى سەل ۇستايتىن بوگەتتىڭ قۇرىلىسىنا بايلانىستى الاڭدى تازارتۋ بويىنشا شارالار قابىلداۋدى تاپسىرعان.
«2019 جىلدىڭ مامىرىندا قازاقستان ۇكىمەتىنىڭ "ەرەكشە قورعالاتىن تابيعي اۋماقتاردىڭ جەرىن زاپاستاعى جەرگە بەرۋ تۋرالى" قاۋلىسى نەگىزىندە پرەمەر-مينيستر اسقار ءماميننىڭ قولى قويىلعان ىلە-الاتاۋ ۇلتتىق پاركىنىڭ ۋچاسكەسى الماتى قالاسىنىڭ بوستاندىق اۋدانىنا بەرىلدى. قاۋلىدا: «الىنعان سۇرەكتى ۇلتتىق پاركتىڭ بالانسىنا بەرە وتىرىپ, الاڭدى تازارتۋ جونىندە شارالار قابىلداۋ» دەپ ناقتى كورسەتىلگەن», دەپ ءتۇسىندىردى ول.
احمەتوۆ 2020 جىلدىڭ سوڭىندا «ىلە-الاتاۋ مەملەكەتتىك ۇلتتىق تابيعي پاركى» رمم بوگەت سالۋ ءۇشىن ورمان شارۋاشىلىعى ءوندىرىسىنىڭ شىعىندارى مەن زالالدارىن وتەۋگە ارنالعان ەسەپتەردى ۇسىنعانىن ايتادى. قر تجم «قازسەلدەنقورعاۋ» مەملەكەتتىك مەكەمەسىنىڭ وكىلدەرى ىلە-الاتاۋ ۇلتتىق پاركىنە رەسپۋبليكالىق بيۋدجەت كىرىسىنە شىعىننىڭ جانە شىعىننىڭ ورنىن تولتىرۋ تۋرالى كەپىلحات بەرگەن.
ارمان احمەتوۆ بەس مىڭ اعاش كەسىلمەگەنىنە سەنىمدى. ونىڭ ايتۋىنشا, 2021 جىلدىڭ قاڭتارىندا قۇرىلىسشىلار بۇتالارىن ءىشىنارا كەسىپ شىققان.
«اعاشتارعا قول تيگىزبەدىك. 20 سوتىق اۋماقتا بۇتالار كەسىلدى. بەس مىڭ اعاش - شىندىققا جاناسپايدى. سودان كەيىن ەكوبەلسەندىلەر كەلىپ, وسى جەردى ۆيدەوعا تۇسىرە باستادى. كەلەسى كۇنى قۇرىلىس ۋچاسكەسىنە جاسىل ەكونوميكا باسقارماسىنىڭ وكىلدەرى كەلىپ, ولاردىڭ باسقارماسىنان اعاشتاردى كەسۋگە رۇقسات الۋ قاجەتتىگىن ايتتى. ءبىز بۇعان دەيىن بۇل ۇلتتىق پاركتىڭ اۋماعى بولعانىن تۇسىندىردىك, سونداي-اق بىزدە پرەمەر-ءمينيستردىڭ قاۋلىسى جانە تاپسىرىس بەرۋشىدەن كەپىلحات بارىن ايتتىق», دەدى مەردىگەر ۇيىمنىڭ وكىلى.
ارمان احمەتوۆ تاۋداعى بوگەت قاجەت ەكەنىن جانە قۇرىلىس مەرزىمىن ۇزارتۋعا بولمايتىنىن ايتتى.
«سەل قاشان بولاتىنىن ەشكىم بىلمەيدى. سالىنىپ جاتقان سەل ۇستايتىن بوگەتتىڭ قورعالاتىن اۋماعى ۇلتتىق پاركتىڭ ءبىر بولىگى بولىپ تۇر. وندا الماتى گەس كاسكادى, الماتى – «الما-اراسان» شيپاجايىنىڭ اۆتوجولى, تۇرعىن ۇيلەر ورنالاسقان, سونداي-اق وڭتۇستىك استانانىڭ تۇرعىندارى مەن قوناقتارى ءۇشىن دەمالىس ورىندارى سالىنعان. جازدا سەل قاۋپى بار ايماقتا ءبىر مەزگىلدە بەس مىڭنان اسا دەمالۋشى, سونداي-اق جۇمىس ىستەيتىن پەرسونال بولۋى مۇمكىن», دەپ اتاپ ءوتتى ول.
بۇدان وزگە ول اقپاندا تاپسىرىس بەرۋشى جاسىل ەكونوميكا باسقارماسىنان اعاشتاردى كەسۋگە رۇقسات العانىن ەسكە سالدى.
«قازىر سەل ۇستايتىن بوگەتتىڭ قۇرىلىسى كەستە بويىنشا جۇرگىزىلىپ جاتىر. تاپسىرىس بەرۋشى مەن مەردىگەردىڭ وكىلدەرى ۋاقىتشا قولايسىزدىقتار ءۇشىن وڭتۇستىك استانانىڭ تۇرعىندارى مەن قوناقتارىنان كەشىرىم سۇرايدى», دەدى ا.احمەتوۆ.
سونداي-اق اعاش كەسىلىپ جاتقان جەردە بوستاندىق اۋدانىنداعى ايۋساي وزەنىنىڭ ساعاسىنان تومەن ۇلكەن الماتى وزەنىنىڭ جوعارعى اعىسىندا سەل ۇستايتىن بوگەت سالىناتىنى بەلگىلى بولدى.
