باسشىنى سايلاۋ فەدەراتسيانىڭ ەسەپ بەرۋ-سايلاۋ كونفەرەنتسياسى بارىسىندا ءوتتى.
«بۇل تاعايىنداۋ مەن ءۇشىن – جاڭا سىن, قازىرگى قىزمەتىمنەن قىزىعى كەم تۇسپەيتىن – جاڭا كەزەڭ. اقتوتى رايىمقۇلوۆا باسشىلىق ەتەتىن مادەنيەت جانە سپورت مينيسترلىگىنە سەنىم ءۇشىن جانە ءۇمىت بولاتحانقىزىنا 10 جىلدا اتقارعان جۇمىسى ءۇشىن العىس بىلدىرەمىن. مەن باس باپكەر قىزمەتىندەگى جۇمىسىمدى جالعاستىراتىن بولامىن. سەبەبى جاڭا تاعايىنداۋ – بۇل قوعامدىق لاۋازىم. مەن ەكەۋىن قاتار الىپ جۇرەمىن. ماقسات – سپورتتى دامىتۋ جانە ەلگە ناتيجە الىپ كەلۋ. العاشقى ۋاقىتتا وڭاي بولماسىن تۇسىنەمىن. الايدا, مەنىڭ تاجىريبەم, ءبىلىمىم جانە كۇش-جىگەرىم, سونداي-اق فەدەراتسيا مۇشەلەرىمەن بىرلەسكەن جۇمىس كوپتەگەن مىندەتتەردىڭ شەشىمىن تاباتىن بولادى. فەدەراتسيامىزعا كىرەتىن ءاربىر سپورتتى دامىتۋ جانە تانىمال ەتۋ باعىتىندا بىرگە جۇمىس ىستەيمىز», دەدى ا.يۋسۋپوۆا
ءاليا ماقسۇتقىزى يۋسۋپوۆا – 36 جاستا. شىمكەنت قالاسىندا دۇنيەگە كەلگەن. افينى جانە بەيجىڭ وليمپيادالارىنىڭ قاتىسۋشىسى. قر ەڭبەك سىڭىرگەن جاتتىقتىرۋشى. بۇگىندە كوركەم گيمناستيكادان قازاقستان رەسپۋبليكاسىنىڭ باس باپكەرى.
