«اتىراۋ وبلىسىنىڭ اكىمى ماحامبەت دوسمۇحامبەتوۆتىڭ تاپسىرماسىنا سايكەس, اپاتتى ءۇي تۇرعىندارىنا 50 پاتەر ساتىپ الۋ ءۇشىن مەملەكەتتىك ساتىپ الۋ كونكۋرسى قايتا جاريالاناتىن بولدى. ماسەلەمەن ءارى قاراي جىلىوي اۋدانى اكىمدىگى تىكەلەي اينالىسادى», دەپ اتاپ ءوتتى ايماق باسشىسىنىڭ ورىنباسارى باقىتگۇل حامەنوۆا.
بۇگىن جىلىوي اۋدانى, قۇلسارى قالاسىنان ءبىر توپ ازاماتتارى وسى ماسەلەنى كوتەرگەن بولاتىن. ولار جىلىوي اۋدانى, قۇلسارى قالاسىنىڭ №27 اپاتتى ءۇيىنىڭ تۇرعىندارى. 1988 جىلى سالىنعان بەس قاباتتى №27 ءۇي 2018 جىلى اپاتتى جاعدايدا دەپ تانىلعان.
ال تۇرعىنداردىڭ شاعىمدانۋىنا جىلىوي اۋداندىق اكىمدىگىنە سىبايلاس جەمقورلىققا قارسى كۇرەس اگەنتتىگىنىڭ اتىراۋ وبلىسى بويىنشا دەپارتامەنتىنىڭ حاتى سەبەپكەر بولعان. حاتتا جىلىوي اۋداندىق اكىمدىگى اپاتتى ءۇي تۇرعىندارى ءۇشىن ساتىپ الۋدى جوسپارلاپ وتىرعان ۇيلەردىڭ باعاسى ورتا ەسەپپەن 500-600 مىڭ تەڭگەگە قىمبات ەكەندىگى جازىلعان. سول سەبەپتى, اۋداندىق اكىمدىككە جوعارى باعادا ءۇي ساتىپ الۋ پروتسەدۋراسىن توقتاتۋ ۇسىنىلعان بولاتىن.
اتىراۋ وبلىسى اكىمدىگى, جىلىوي اۋداندىق اكىمدىگى جانە سىبايلاس جەمقورلىققا قارسى كۇرەس اگەنتتىگىنىڭ اتىراۋ وبلىسى بويىنشا دەپارتامەنتى جانە تۇرعىندارمەن ارادا وتكەن جيىن ناتيجەسىمەن تۇرعىن ۇيلەر ساتىپ الۋ تۋرالى كونكۋرس نارىقتاعى باعاعا ساي قايتا جاريالاناتىن بولدى.
