پەتروپاۆلدا مەششان ورمانىندا زاماناۋي ەكولوگيالىق ساياباق سالىنباق. جوبالاۋ جۇمىستارى قاڭتار ايىندا باستالدى. قازىر جوبالىق-سمەتالىق قۇجاتتارى ازىرلەنىپ جاتىر. كۇن جىلىنىسىمەن ورماننىڭ ورتاسىندا قۇرىلىس باستالادى.
وسىلايشا وڭىردە مەششان ورمانىنا قاتىستى ماسەلە شەشىمىن تاپپاق. ويتكەنى كوپشىلىك بۇل ورماننىڭ تاعدىرىنا الاڭداۋشىلىق ءبىلدىردى. سقو اكىمى قۇمار اقساقالوۆ ءوزىنىڭ الەۋمەتتىك پاراقشاسىندا اعاشتاردىڭ ەندى كەسىلمەيتىنىن جەتكىزدى.
«2007 جىلى كوممەرتسيالىق تۇرعىن ءۇي سالۋ ءۇشىن مەششان ورمانىنان جەر ۋچاسكەسى بەرىلدى. ءبىز كەسۋدى توقتاتىپ, بۇل جەردى مەملەكەت مەنشىگىنە قايتاردىق. بيىل ءبىز وسى كەسىلگەن اۋماقتا ەكولوگيالىق پارك قۇرىلادى. ىڭعايلى ورىندىقتار قويىلىپ, دەمالۋ بۇرىشتارى جاسالادى. سپورت الاڭدارى مەن جاتتىعۋ كەشەندەرى پايدا بولادى. كىشكەنتاي دەمالۋشىلارعا ويىن الاڭقايىن جاسايمىز. ۆەلوسيپەد جولاقتارى وتەدى. شاعىن ارحيتەكتۋرالىق فورمالار ورناتىلادى. جاڭا ەكوپارك سپورتشىلاردىڭ, بەلسەندى جاستاردىڭ جانە تابيعاتتى جاقسى كورەتىن ادامداردىڭ سۇيىكتى دەمالىس ورنىنا اينالادى», دەپ جازدى قۇمار اقساقالوۆ.
زاماناۋي ۇلگىدە سالىناتىن بۇل ساياباقتىڭ جوباسىن ەلوردالىق «SHATYR GROUP» جشس جاساپ جاتىر. ساياباق 3 گا اۋماقتى الماق.
«زاماناۋي ەكولوگيالىق ساياباق سپورتقا نەگىزدەلگەن. ساياباقتا ترەناجەرلەر, ۆوركاۋتتار, بالالار ويىن الاڭدارى, جۇگىرۋ جولدارى, فۋتبول الاڭى بولادى. امفيتەاتر سالىنادى, سۋبۇرقاقتار قويىلادى. نەگىزگى جۇمىستاردى استانالىق ماماندار جۇرگىزگەنىمەن, جۇمىسقا جەرگىلىكتى تۇرعىندار الىنادى», دەيدى «SHATYR GROUP» جشس جوبالاۋشىسى الىبەك ەسداۋلەتوۆ.
ءوڭىر باسشىسى قۇمار اقساقالوۆ بولاشاق ساياباقتىڭ بەينەجوباسىن جاريالادى.
جالپى ەكولوگيالىق ساياباقتىڭ قۇرىلىسى جىل سوڭىنا دەيىن اياقتالىپ, پايدالانۋعا بەرىلمەك.
