جەڭىل اتلەتيكادان حالىقارالىق دارەجەدەگى كسرو سپورت شەبەرى, قازكسر ەڭبەك سىڭىرگەن جاتتىقتىرۋشىسى, قازاقستانعا ەڭبەك سىڭىرگەن مادەنيەت قايراتكەرى سايلاۋ التىنباي ۇلى تۇرىسكەلدين جاسى 76-عا قاراعان شاعىندا ومىردەن ءوتتى.
سايلاۋ تۇرىسكەلدين 1937 جىلعى 12 جەلتوقساندا الماتى وبلىسى قاراتال اۋدانىندا تۋعان. 1963 جىلى الماتى دەنە تاربيەسى ينستيتۋتىن بىتىرگەن. ءار جىلدارى الماتى زووۆەتەرينارلىق ينستيتۋتىنىڭ وقىتۋشىسى, الماتى قالالىق ءبىلىم ءبولىمى بالالار مەن جاسوسپىرىمدەر مەكتەبىنىڭ ديرەكتورى, دەنە تاربيەسى جانە سپورت كوميتەتىنىڭ اعا جاتتىقتىرۋشىسى, ءبىلىم مينيسترلىگىنىڭ ءبولىم باستىعى, قازاق كاسىپتىك وداعىنىڭ ءبولىم مەڭگەرۋشىسى, «قايرات» ەرىكتى سپورت قوعامى ورتالىق كوميتەتىنىڭ توراعاسى بولىپ قىزمەت اتقاردى. 2001-2008 جىلدارى الماتى تەحنولوگيالىق ۋنيۆەرسيتەتىنىڭ دەنە تاربيەسى كافەدراسىن باسقاردى.
س.تۇرىسكەلدين الماتىدا XIII بۇكىلوداقتىق وقۋشىلار سپارتاكياداسىن وتكىزۋ جونىندەگى ۇيىمداستىرۋ جۇمىستارىنا بەلسەنە قاتىستى. وليمپيادا ويىندارىنىڭ چەمپيوندارى مەن جۇلدەگەرلەرىن دايىنداۋعا ايتارلىقتاي ۇلەس قوستى. سونىمەن قاتار وبلىستار مەن اۋدانداردا اۋىل سپورتشىلارى ويىندارىن وتكىزۋدىڭ باستاماشىلارىنىڭ ءبىرى بولدى.
سپورتتى بالا جاسىنان سەرىك ەتكەن سايلاۋ التىنباي ۇلى ودان ءومىر بويى قول ۇزگەن جوق. ول ارداگەرلەر اراسىندا وتكەن كوپتەگەن حالىقارالىق جارىستارعا ۇدايى قاتىسىپ وتىردى. جاسى الپىستان اسقاننان كەيىن ازيانىڭ ارداگەرلەر اراسىنداعى چەمپيوناتىندا ەكى دۇركىن توپ جاردى, ءبىر رەت قولا جۇلدەگەر اتاندى. ول وتان الدىندا سىڭىرگەن ەڭبەكتەرى ءۇشىن «كسرو اعارتۋ ءىسىنىڭ ۇزدىگى», «قازكسر حالىق اعارتۋ ءىسىنىڭ ۇزدىگى», «دەنە تاربيەسى جانە سپورت ءىسىنىڭ ۇزدىگى» اتاقتارىن الدى.
قازاقستان رەسپۋبليكاسى سپورت جانە دەنە شىنىقتىرۋ ىستەرى اگەنتتىگى سايلاۋ التىنباي ۇلىنىڭ قايتىس بولۋىنا بايلانىستى قايعىرىپ, تۋعان-تۋىسقاندارى مەن دوستارىنا كوڭىل ايتادى.
قازاقستان رەسپۋبليكاسى سپورت جانە دەنە شىنىقتىرۋ ىستەرى اگەنتتىگى.
