قارجى • 07 اقپان، 2021

قازاقستانداعى ونلاين تولەم ۇلەسى 90 پايىزعا جەتپەك

68 رەت كورسەتىلدى

سوڭعى ۋاقىتتارى قازاقستاندىقتار ءموبيلدى تەلەفون كومەگىمەن تولەم جاساۋدى جيىلەتە باستاعان. اسىرەسە، تۇركىستان وبلىسى تۇرعىندارى قولما-قول اقشا تولەۋدى كۇرت ازايتقان. ونلاين تولەم جاساۋ دەڭگەيى 6،8 ەسە ءوسىپ، 2،7 ترلن تەڭگەگە جەتكەن. سونداي-اق ەلەۋلى ءوسىم جامبىل وبلىسىندا (824،6 ملرد تەڭگە) جانە قىزىلوردا وبلىسىندا (653،4 ملرد تەڭگە) بايقالعان.

Kaspi.kz كومپانياسى باسقارما توراعاسى ميحايل لومتادزە ونلاين تولەم جۇيەسىنىڭ دامۋى ازاماتتاردىڭ ءومىر ءسۇرۋ ساپاسىن جاقسارتادى دەيدى. بۇل تۋرالى ول الماتىدا وتكەن ءداستۇرلى Digital Almaty 2021 فورۋمىندا ايتتى.

– ءبىزدىڭ ەكوجۇيەدە بار بارلىق سەرۆيسكە قارايتىن بولساق، ەشقانداي كوميسسياسىز 5000 قىزمەت تۇرىنە تولەم جاساۋعا بولادى. ونىڭ ءبارى كۇندەلىكتى قاجەتتىلىكتەرگە ارنالعان. ساتىپ الۋ اۋدارىمدارىن دا كوميسسياسىز جۇزەگە اسىرامىز. ەلەكتروندى كوممەرتسيا نارىعىنداعى ءىرى دۇكەندەر ءبىزدىڭ ەكوجۇيەمەن تولىق ينتەگراتسيالانعان.  قازاقستاندىقتار ساتىپ الۋ ارقىلى جەتكىزىپ بەرۋ قىزمەتىن قوسا الا الادى. جەتكىزىپ بەرۋ قىزمەتىن دە تەگىن قىلدىق. تەحنولوگيالاردى دامىتۋدىڭ، تەحنولوگيالاردى ينۆەستيتسيالاۋدىڭ ۇلكەن مۇمكىندىگى بار بولعاندىقتان ءبىز سەرىكتەستەرگە دە ۇلكەن جول اشىپ وتىرمىز. 20 000 سەرىكتەسىمىز ءبىزدىڭ پلاتفورماعا قوسىلعان. ونىڭ كوبى شاعىن جانە ورتا بيزنەس وكىلدەرى، – دەيدى لومتادزە.

ونىڭ ايتۋىنشا، بيىلدىڭ وزىندە ەلىمىزدە تولەمدى كارتامەن نەمەسە ءموبيلدى قوسىمشامەن جاسايتىندار ۇلەسى 90 پايىزعا جەتۋى مۇمكىن.

– سونداي-اق جەكە قاراجاتتى باسقارۋ بويىنشا دا قوسىمشامىزدى جەتىلدىردىك. قازاقستاندىقتار قوسىمشانى پايدالانۋ ارقىلى دەپوزيتكە اقشا جينايدى، نەسيە الادى، تولەم كارتاسىن الادى. سونداي-اق مەملەكەتپەن، تسيفرلاندىرۋ مينيسترلىگىمەن بىرلەسە وتىرىپ جەكە كاسىپكەرلىكتى ونلاين تىركەۋ، اۆتوكولىكتى قايتا راسىمدەۋ، بيۋدجەتكە سالىق تولەۋ سياقتى مۇمكىندىكتەردى دە ۇسىنىپ وتىرمىز. وسىنىڭ ءبارى الەمدە انالوگى جوق ءبىر عانا سۋپەر قوسىمشاعا ەنگىزىلگەن. سونىڭ ارقاسىندا ونلاين تولەمدەردى جاساۋ تۇرعىسىنان دا كوشباسشى اتانىپ وتىرمىز. قازاقستاندا ونلاين تولەم جاساۋ دەڭگەيى اسا قاتتى قارقىنمەن ءوسىپ كەلە جاتىر. 2016 جىلى جەلتوقسان ايىندا ونلاين تولەم 161 ملرد تەڭگە بولسا، 2020 جىلدىڭ جەلتوقسان ايىندا ەلدەگى ونلاين تولەم كورسەتكىشى 4،3 ترلن تەڭگەگە جەتتى. دەمەك، ءتورت جىلدا 29 ەسە وسكەن. قازاقستانداعى ونلاين تولەم كورسەتكىشى 72 پايىزدى قۇراپ وتىر. جاقىن ارادا بۇل كورسەتكىشتىڭ 90 پايىزعا جەتەرىنە سەنىمدىمىز، – دەدى Kaspi.kz جۇيەسىن قۇرۋشى.

سوڭعى جاڭالىقتار

قانت تاپشىلىعى نەدە؟

ەكونوميكا • كەشە

بەنزين قىمباتتايدى

ەكونوميكا • كەشە

اق جەلەڭدىلەرگە العىس

مەديتسينا • كەشە

ادالدىقتىڭ ەتالونى ەدى

قازاقستان • كەشە

بۇيراتاۋ بازارلىعى

تۋريزم • كەشە

ءۇش ۇنسىزدىك

ونەر • كەشە

ۇقساس جاڭالىقتار