قوستاناي وبلىسىندا ارماتۋرا شىعاراتىن زاۋىت ىسكە قوسىلدى. بۇل تۋرالى «24 kz» حابارلادى.
توبىل ءوڭىرىنىڭ تۇرعىندارى ەندى «التىن استىعىمەن» عانا ەمەس, وزدەرىنەن شىعارىلاتىن بولات ونىمدەرىمەن ماقتانا الادى. ويتكەنى, بۇل ارماتۋرا زاۋىتى قۇرىلىس بويىنشا ەلىمىز ىشكى سۇرانىسىنىڭ 50 پايىزىن قامتي الادى. جالپى, وسى ءوندىرىستىڭ پايدالانۋعا بەرىلۋىنە 131 ملن. دوللار جۇمسالعان.
ماماندار سوزىمەن ايتقاندا, وندىرىسكە قولدانىلاتىن سوم تەمىرلەر رەسەيدەن جەتكىزىلەدى ەكەن. «تەمىردى 1300 گرادۋسقا دەيىن قىزارتىپ, 8 مم-دەن, 40 مم-گە جەتكىزەمىز دە, ارماتۋرا قالپىنا كەلتىرەمىز. بۇل قۇرىلىسقا پايدالانىلاتىن نەگىزگى ماتەريال بولىپ ەسەپتەلەدى»,-دەيدى ترانسپورتتىق ءوندىرىس بيۋروسىنىڭ باسشىسى ساپارحان حاكىموۆ.
زاۋىت كەلەر جىلدىڭ العاشقى جارتى جىلدىعىندا ءونىم كولەمىن ارتتىرۋدى كوزدەپ وتىر. زاۋىتتىڭ قارجى ديرەكتورى ءادىل بەلعوجاەۆتىڭ ايتۋىنشا, جالپى ەلىمىز قۇرىلىسىنا 1 ملن. تونناداي ارماتۋرا قاجەت بولاتىن بولسا, سونىڭ 450 مىڭىن وسى جەردەن شىعارۋدىڭ مۇمكىندىگى بار. بۇرىن دايىن ارماتۋرا رەسەي مەن ۋكراينا ەلىنەن تاسىمالدانعان ەكەن.
قازىر بۇل زاۋىت جەرگىلىكتى وڭىردەگى 250-دەن اسا ادامدى جۇمىسپەن قامتىپ وتىر. ەڭبەككەرلەردىڭ ورتاشا جالاقىسى – 160 مىڭ تەڭگە. ال جوسپار بويىنشا 8 جىل ىشىندە زاۋىتتى قالىپتاستىرۋعا جۇمسالعان قارجى تولىعىمەن وتەلەدى.
باقىتبەك كەنەش ۇلى.
دەرەككوز: «24 kz»
فوتو: «24 kz».
