ايماقتار • 02 اقپان، 2021

الماتى وبلىسىندا كاسىپكەر ءوز قارجىسىنا سپورت كەشەنىن سالىپ بەرمەك

13 رەت كورسەتىلدى

الماتى وبلىسىندا كاسىپكەر سپورت كەشەنىن ءوز قارجىسىنا سالىپ، حالىقتىڭ پايداسىنا جاراتۋ ءۇشىن ونى مەملەكەت مەنشىگىنە بەرۋگە نيەتتى. وسى جانە وزگە دە ۇسىنىستارىمەن، بىرنەشە ينۆەستيتسيالىق جوبالارىمەن كەلگەن كاسىپكەرلەردى بۇگىن وبلىس اكىمى اماندىق باتالوۆ قابىلدادى، دەپ حابارلايدى Egemen.kz

كاسىپكەرلەردى ازيا قۇرلىعىنداعى كۇرەس فەدەراتسياسىنىڭ پرەزيدەنتى، قر گرەك-ريم جانە ەركىن كۇرەس، ايەلدەر كۇرەسى فەدەراتسياسىنىڭ ۆيتسە-پرەزيدەنتى، بۇكىلالەمدىك كۇرەس فەدەراتسياسىنىڭ ۆيتسە-پرەزيدەنتى، «سەماز» اق اكتسيونەرى داۋلەت تۇرلىحانوۆ باستاپ كەلدى.

الدىمەن ءسوز العان «ۆيراج» حولدينگىنىڭ باس ديرەكتورى ۆلاديمير كوتەلنيكوۆ تالعار اۋدانى قىزىلقايرات اۋىلىندا 2،5 گا جەرگە سپورت كەشەنىن سالۋدى جوسپارلاپ وتىرعانىن ايتىپ، جالپى الاڭى 1 مىڭ شارشى مەترلىك ەكى قاباتتى سپورت نىسانىنىڭ ەسكيزدىك جوباسىن كورسەتتى. وندا كۇرەس زالى، ۆولەيبول، باسكەتبول، فۋتبول الاڭدارى قاراستىرىلعان. جوباعا شامامەن 450 مىڭ دوللار ينۆەستيتسيا سالىنادى. ۆ.كوتەلنيكوۆتىڭ ايتۋىنشا، قۇرىلىس جۇمىستارىنا 1-1،5 جىلداي ۋاقىت كەتەدى. كاسىپكەر عيمارات سالىنىپ بىتكەننەن كەيىن ونى كۇتىپ ۇستاۋ، نىساندا جۇمىس ىستەيتىن جاتتىقتىرۋشىلىق قۇرامدى قالىپتاستىرۋ، حالىقتى سپورتپەن اينالىسۋعا تارتۋ ءىسىن جانداندىرۋ ءۇشىن نىساندى مەملەكەت مەنشىگىنە بەرمەك. اكىمدىك تاراپىنان سپورت كەشەنى مەن نەگىزگى تراسسانى جالعايتىن 200 مەترلىك جولدى اسفالتتاۋ مەن جارىق شامدارىن ورناتۋ جوسپارعا ەنگىزىلسە دەگەن ۇسىنىسىن ايتتى.

1

وبلىس اكىمى اماندىق باتالوۆ ءوز كەزەگىندە سپورت كەشەنىنىڭ قۇرىلىسىن باستاۋعا قاجەتتى تەحنيكالىق شارتتار، رۇقسات قاعازدارىنىڭ كەدەرگىسىز بەرىلەتىنىن جەتكىزدى. جالپى وبلىستا 11 سپورت كەشەنى سالىنعانىن تىلگە تيەك ەتىپ، مۇنداي نىسانداردىڭ جاس ۇرپاقتى سپورت ارقىلى تاربيەلەۋگە تيگىزەتىن ىقپالى زور ەكەنىن اتاپ ءوتتى.

سونىمەن قاتار ۆ.كوتەلنيكوۆ كومپانياسىنىڭ قازاقستاننىڭ اۆتوكولىك نارىعىنداعى كوشباسشىلاردىڭ ءبىرى ەكەنىن ايتتى. حولدينگ شەتەلەردەن كولىك قۇرالدارى مەن ارنايى تەحنيكالاردى جەتكىزۋمەن قاتار سەمەي جانە كوكشەتاۋ قالالارىنداعى  «سەماز» ي Daewoo Bus زاۋىتتارىندا ءوز وندىرىستەرىن ىسكە قوسقان. كومپانيا باسشىسى اۆتوبۋستارىنىڭ، اۋىل شارۋاشىلىعى جانە كوممۋنالدىق، جول جانە قۇرىلىس تەحنيكالارىنىڭ، ۋاز جەدەل جاردەم كولىكتەرىنىڭ جانە باسقا دا كولىك قۇرالدارىنىڭ كاتالوگىن كورسەتتى. «ەلىمىزدەگى ءىرى قالالاردا تەحنيكالىق قىزمەت كورسەتۋ ورتالىقتارىمىز جۇمىس ىستەيدى. بىزگە جەر ءبولىپ بەرسە، تالدىقورعان قالاسىنان دا وسىنداي ورتالىق اشساق دەيمىز. ينۆەستيتسيا كولەمى 900 ملن تەڭگەدەن باستالادى. 50-70 ادامعا جۇمىس ورنى اشىلادى. باستى ماقساتىمىز – تەحنيكالىق، كەپىلدىك قىزمەت كورسەتۋ ءۇشىن شارۋالاردى الماتىعا سابىلدىرماي، وسى جەردەن قىزمەت كورسەتۋ»، دەدى ۆ.كوتەلنيكوۆ.

1

ءوز سوزىندە  اماندىق باتالوۆ جۋىردا تالدىقورعان قالاسىنىڭ اۆتوپاركتەرى جاڭارتىلعانىن، سول سياقتى اۋدان-قالالاردىڭ كوممۋنالدىق شارۋاشىلىققا قاجەتتى تەحنيكالارىنىڭ دا قاتارى تولىعاتىنىن ايتتى. سول سياقتى قانت قىزىلشاسىن، جۇگەرى ءوسىرۋدى جانداندىرۋ بارىسىندا دا بىرقاتار جاڭا اۋىل شارۋاشىلىعى تەحنيكالارى ساتىپ الىنعان. سوندىقتان الداعى ۋاقىتتا «ۆيراج» حولدينگى ۇسىنىپ وتىرعان كولىك قۇرالدارىن دا قاراستىرۋعا بولاتىنىن جەتكىزدى. سول سياقتى تەحنيكالىق قىزمەت كورسەتۋ ورتالىعىنىڭ جوباسى دا قولداۋعا لايىق جوبا ەكەنىن ايتتى.

كەزدەسۋدە «تەحنوگراد» جشس باس ديرەكتورى بالالدين ۋشۋروۆ تا ءسوز الىپ، ول تالعار اۋدانى اۋماعىندا جۇزەگە اسىرۋعا نيەتتى ينۆەستيتسيالىق جوبالارىن تانىستىردى. ولار - تۇرمىستىق تەحنيكا مەن جيھاز ساتاتىن ارنايى ساۋدا ءۇيى مەن جول بويىندا قىزمەت كورسەتەتىن ورىن. بىرىنشىسىنە 250 ملن. تەڭگە، ەكىنشىسى 650 ملن. تەڭگە كولەمىندە ينۆەستيتسيا سالىنباق. وبلىس باسشىسى جوبانى قولدايتىنىن، دەگەنمەن ونى ىسكە اسىرۋ بارىسىندا جول بويىنداعى ءبىر دە ءبىر اعاشقا زيان كەلتىرمەۋى كەرەكتىگىن ەسكەرتتى جانە ونى قاداعالاۋدى اۋدان اكىمدىگىنە تاپسىردى.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار