جاستاردى وتانشىلدىق سەزىمگە باۋلۋ, پاتريوتتىق رۋحتا تاربيەلەۋ ماقساتىندا مەملەكەتتىك «ەجەلگى تاراز ەسكەرتكىشتەرى» تاريحي-مادەني قورىق-مۋزەيى « ۇلىستىڭ ماقتانىشى – ۇلى جامبىل» اتتى ءىس-شارا ۇيىمداستىردى. اتالعان شارا «شەرحان مۇرتازا اتىنداعى رۋحانيات جانە تاريحتانۋ» ورتالىعىندا ءوتتى.
اۋەلى كەلۋشىلەر جامبىل جاباەۆتىڭ ءومىرى مەن ونەر جولىنان سىر شەرتەتىن كورمەنى ارالاپ كوردى. اتالعان قورىق-مۋزەيدىڭ تاريحشىسى ءمادينا يبادىلداەۆا قوناقتاردى جىراۋ ءومىرىنىڭ ءتۇرلى كەزەڭىن قامتيتىن ماتەريالدارمەن تانىستىردى. جيىندا «ەجەلگى تاراز ەسكەرتكىشتەرى» تاريحي-مادەني قورىق-مۋزەيىنىڭ ديرەكتورى نۇرلان بىقىباەۆ ءسوز الىپ, جامبىل شىعارماشىلىعى توڭىرەگىندە ءوز ويىمەن ءبولىستى. ال جازۋشى-دراماتۋرگ ەلەن ءالىمجان جىر الىبى تۋرالى مۇحتار اۋەزوۆ, عابيت مۇسىرەپوۆ, ءابدىلدا تاجىباەۆ سياقتى ادەبيەت قايراتكەرلەرىنىڭ ەستەلىكتەرىن ايتىپ, جامبىل شىعارماشىلىعىنىڭ ەرەكشەلىكتەرىنە توقتالدى. سونداي-اق وبلىستىق «تاريحي-مادەني ەسكەرتكىشتەردى قورعاۋ جانە قالپىنا كەلتىرۋ ديرەكتسياسى» مەكەمەسىنىڭ ديرەكتورى قۋانىش داۋرەمبەكوۆ جامبىل جاباەۆتىڭ, بەيىمبەت مايلين, ءىلياس جانسۇگىروۆ سىندى ءسوز زەرگەرلەرىمەن تىعىز بايلانىستا بولعانىن تابىلعان ارحيۆ دەرەكتەرى نەگىزىندە اڭگىمەلەسە, ايتىسكەر اقىن ەسەت دوسالى جامبىل وڭىرىندە جىر الىبىنىڭ جولىن قۋعان جاس ايتىسكەرلەردىڭ ءوسىپ كەلە جاتقانىن, ولاردىڭ الدى ەلىمىزدەگى الامان ايتىستاردا توپ جارىپ جۇرگەنىن جەتكىزدى. سونىمەن قاتار اسقار توقپانوۆ اتىنداعى وبلىستىق قازاق دراما تەاترىنىڭ ارتىستەرى ايگىلى ءسۇيىنباي اقىننىڭ بالا جامبىلعا باتا بەرۋ ءساتىن ساحنالادى. ءاناپيا احمەتوۆ پەن نۇرسۇلتان ماحانوۆ ۇستاز بەن شاكىرت اراسىنداعى رۋحاني ساباقتاستىقتى ەرەكشە شەبەرلىكپەن جەتكىزە ءبىلدى.
جالپى, جيىندا جامبىل جاباەۆتىڭ ءومىرى مەن ونەرىن جاڭاشا تۇرعىدان زەرتتەۋ, وڭىردە اقىن اتىنداعى كونكۋرستار ۇيىمداستىرۋ, تاپسىرىسپەن ادەبي دۇنيەلەر جازدىرۋ, ءبىر سوزبەن ايتقاندا, جىراۋ اتىن ۇلىقتاۋ ماسەلەسى ءسوز بولدى. بۇل رەتتە قۋانىش داۋرەمبەكوۆ وبلىستىق مادەنيەت, ارحيۆتەر جانە قۇجاتتاما باسقارماسىندا ءىس-شارالار جوسپارى جاسالعانىن, الداعى ۋاقىتتاردا تاراز قالاسىندا اقىن اتىنداعى رەسپۋبليكالىق اقىندار مۇشايراسىمەن قاتار, ايتىس ۇيىمداستىرىلاتىنىن دا جەتكىزدى. جىراۋ ەسىمىن ۇلىقتاۋ ماقساتىنداعى شارالار تەك اقىننىڭ تۋعان كۇنى اقپان ايىندا عانا ەمەس, جىل بويى جالعاساتىن بولادى.
جامبىل وبلىسى
