تۇرعىندار اۋدان اكىمىنە ءوز ساۋالدارىن بايلانىس تەلەفونى مەن «Facebook», «Instagram» الەۋمەتتىك جەلىلەرى ارقىلى جولدادى. تۇرعىندار مەن باق وكىلدەرى تاراپىنان 30-عا جۋىق سۇراق قويىلدى. سۇراقتاردىڭ دەنى قوعامدىق كولىك, ينفراقۇرىلىم, قاۋىپسىزدىك, مەكتەپ پەن جول قۇرىلىسى ماسەلەلەرى بولدى.
كەلىپ تۇسكەن سۇراقتارعا قالا اكىمى دە بىرلەسە جاۋاپ بەرىپ, اۋدانداعى وزەكتى ماسەلەلەر مەن الداعى ۋاقىتتا اتقارىلار جۇمىستار جونىندە ايتىپ ءوتتى.
– قالادا جولاۋشىلارعا قىزمەت كورسەتۋدىڭ ساپاسىن جاقسارتۋ ماقساتىندا قوعامدىق كولىكتەرگە رەفورما جاسادىق. قازىر شالعاي ەلدى مەكەن تۇرعىندارى قوعامدىق كولىككە قوسىمشا كولىك جۇرگىزۋدى سۇراپ وتىر. ءساۋىر ايىنا دەيىن اۆتوبۋستارعا ارنالعان گاز قۇيۋ بەكەتىنىڭ قۇرىلىسى اياقتالىپ, پايدالانۋعا بەرىلگەننەن كەيىن 440 جاڭا اۆتوبۋس ءتۇرلى باعىتتا قىزمەت كورسەتەدى. سونىمەن قاتار, قوعامدىق كولىكتىڭ قايدا كەلە جاتقانى تۋرالى اقپارات بەرەتىن ءموبيلدى قوسىمشانى ىسكە قوسۋدى جوسپارلاپ وتىرمىز, – دەدى قالا اكىمى.
قازىرگى تاڭدا ەڭبەكشى اۋدانىندا قوعامدىق كولىكتىڭ 21 باعىتى بار. سونىڭ 13-ءى سۋبسيديالانعان. قالادا قوعامدىق كولىكتى دامىتۋدىڭ كەشەندى سحەماسىنا سايكەس گاز قۇيۋ بەكەتى ىسكە قوسىلعاننان كەيىن 15 باعىتتا 78 اۆتوبۋس قوسىلادى.
