29 قاڭتار كۇنى ساعات 18:00-دە بەلگىسىز بىرەۋ پوليتسياعا «قوستاناي قالاسىنداعى ساۋدا ۇيىندە جارىلىس بولادى», دەپ حابارلاعان. كەزەكشى بولىمگە كەلىپ تۇسكەن حابارلامادا جارىلىستىڭ ناقتى قاي ساۋدا ۇيىندە بولاتىنى جازىلماعان سوڭ, پوليتسيا دەرەۋ وبلىس ورتالىعىنداعى ەڭ ءىرى دەگەن «مارت», «قوستاناي پلازا» ساۋدا ورتالىقتارىندا جۇرگەن 2 مىڭ 300-دەن استام ادامدى ەۆاكۋاتسيالادى. وقيعا ورنىنا پوليتسيا كۇشتەرىنەن بولەك, جەدەل مەديتسينالىق جاردەم, وزگە دە توتەنشە قىزمەتتەر جەتكەن. بىراق ساۋدا ورتالىقتارىنىڭ ەشقايسىنان بومبا تابىلمادى.
كەلەسى كۇنى لاڭكەس پوليتسياعا تاعى ءبىر حابارلاما جىبەرەدى. بۇل جولى قۇرىلىس ماتەريالدارىن ساتاتىن ءىرى ساۋدا ورتالىعىنان 87 ادامدى تىسقا شىعارۋعا تۋرا كەلدى. بۇل جولى دا ساۋدا عيماراتىندا ەشقانداي جارىلعىش زات جوق بولىپ شىقتى.
اقپاننىڭ بىرىندە پوليتسيا دەپارتامەنتىنە ەلەكتروندىق پوشتا ارقىلى اۆتوۆوكزال اۋماعىنا جارىلعىش زات قويىلعانى تۋرالى تاعى ءبىر حابارلاما كەلىپ تۇسكەن.
«ارنايى ماماندار عيماراتتى تۇگەل تەكسەرىپ شىقتى. ەشقانداي جارىلعىش زات تابىلعان جوق. اۆتوۆوكزالدان 40 ادام ەۆاكۋاتسيالاندى», دەدى وبلىستىق پوليتسيا دەپارتامەنتى ەكسترەميزمگە قارسى ءىس-قيمىل باسقارماسى باستىعىنىڭ ورىنباسارى ەرلان سەمبين.
قازىر وسى وقيعاعا قاتىستى تەكسەرۋ-ىزدەستىرۋ شارالارى ءجۇرىپ جاتىر. پوليتسيا مالىمەتى بويىنشا, تۇرعىنداردى 4 كۇن قاتارىنان دۇرلىكتىرىپ قويعان جالعان اقپاراتتى ءبىر-اق ادام تاراتىپ وتىرۋى مۇمكىن.
