«شىمكەنت قالالىق مادەنيەت ءۇيى» كونتسەرتتىك ۇيىمى» مكقك ديرەكتورىنىڭ مىندەتىن اتقارۋشى ساكەن مايعازيەۆ الداعى جۇمىس جوسپارلارىمەن تانىستىرىپ, باق وكىلدەرىنە بريفينگ بەردى.
– الداعى ۋاقىتتا اتاۋلى داتالار بويىنشا 9 مادەني ءىس-شارا, سونىمەن قاتار رەسپۋبليكا كولەمىندە بىرنەشە بايقاۋلار, شەتەل ونەرپازدارىنىڭ بىرنەشە كونتسەرتتەرى مەن رەسپۋبليكامىزعا تانىمال «ونەر جۇلدىزدارىنىڭ 100 كونتسەرتى – شىمكەنتتە!» اتتى كونتسەرتتىك باعدارلامالار ۇيىمداستىرۋ جوسپارىمىزدا بار. قر مادەنيەت جانە سپورت مينيسترلىگىمەن بىرلەسىپ اتقارىلاتىن مادەني ءىس-شارالار بويىنشا «مادەنيەتتەر توعىسى» ءى-رەسپۋبليكالىق فولكلورلىق فورۋم-فەستيۆالىنە, قر تاۋەلسىزدىگىنىڭ 30 جىلدىعىنا ارنالعان «سىرلى ساز-نۇرلى وتانعا» كەرۋەن پويىزى, «الەم ساز» ءى-حالىقارالىق فەستيۆالىنە جانە «سالەم ەلوردا» ءىى-رەسپۋبليكالىق ونەر فەستيۆالى اياسىندا وتەتىن ءىس-شارالارعا قاتىسۋ ويدا بار. ونەرپازداردىڭ رەسپۋبليكا بويىنشا اقتاۋ, اتىراۋ, قىزىلوردا, استانا, الماتى قالالارىنا گاسترولدىك ىسساپارمەن كونتسەرتتەر قويۋ جانە 30 كونتسەرتىن بەرۋدى جوسپارلاپ وتىرمىز. ايتا ءوتۋ كەرەك, كارانتين شارالارىنا بايلانىستى جوسپارلار وزگەرۋى دە مۇمكىن, – دەدى ساكەن قورداباي ۇلى.
«شىمكەنت قالالىق مادەنيەت ءۇيى» كونتسەرتتىك ۇيىمى» 2014 جىلدان بەرى قىزمەت اتقارىپ كەلەدى. بۇگىنگى تاڭدا مەكەمە عيماراتى تۇركىستان سارايىندا ورنالاسقان. وندا 1300 ورىنعا ارنالعان كورەرمەن زالى, گريم بولمەلەرى, وركەستر, بي ۇجىمدارىنا ارنالعان بولمەلەر بار. مادەنيەت ورداسىنا قاراستى 5 مادەنيەت ءۇيى مەن 5 كلۋب جۇمىس ىستەيدى.
وتكەن جىلدىڭ قورىتىندىسى بويىنشا مادەنيەت جانە سپورت مينيسترلىگى ۇيىمداستىرعان «سالەم ەلوردا» رەسپۋبليكالىق فەستيۆالىنە قاتىسىپ جەڭىمپاز اتاندى. سونىمەن قاتار «رۋحاني قازىنا-2020» رەسپۋبليكالىق فەستيۆالىنە قاتىسىپ «ۇزدىك قالالىق مادەنيەت ءۇيى» نوميناتسياسىن جەڭىپ العان بولاتىن.
