باتىس قازاقستان وبلىسىنداعى سۋ تاپشىلىعى قاشان رەتكە كەلەدى؟

ايماقتار • 28 قاڭتار، 2021

باتىس قازاقستان وبلىسىنداعى سۋ تاپشىلىعى قاشان رەتكە كەلەدى؟

37 رەت كورسەتىلدى

سەناتور ناريمان تورەعاليەۆ ەلىمىزدىڭ پرەمەر-مينيسترىنە جولداعان دەپۋتاتتىق ساۋالىندا باتىس قازاقستان وبلىسىنىڭ وڭتۇستىگىندەگى 4 اۋدانىنىڭ، ونىڭ ىشىندە بوكەي ورداسى، جانىبەك، كازتالوۆ، جاڭاقالا اۋداندارىنىڭ 80 مىڭنان استام تۇرعىنى تاپ بولىپ وتىرعان وزەكتى ماسەلەنى كوتەردى، دەپ حابارلايدى Egemen.kz

ايىم ءداۋىت

قازىرگى ۋاقىتتا ايماقتا سۋمەن جابدىقتاۋ ماسەلەسى اسا ماڭىزدى بولىپ وتىر. بۇل ايماق نەگىزىنەن مال شارۋاشىلىعىمەن اينالىسادى جانە رەسەيدەن سۋ الىپ وتىر.

بۇگىنگى تاڭدا ەدىل وزەنىنەن رەسەيدىڭ ساراتوۆ، ۆولگوگراد وبلىستارى ارقىلى وبلىستىڭ وڭتۇستىك ايماقتارىنا ۇلكەن جانە كىشى وزەندەرىنە اعىپ كەلەتىن سۋ مولشەرى ايتارلىقتاي ازايدى. سونىمەن قاتار، جىل سايىن سۋ الۋ شىعىندارى ءوسىپ كەلەدى.

قازىرگى كەزدە ساراتوۆ كانالىنان 54 ميلليون تەكشە مەتر سۋ، ۆولگوگراد وبلىسىنان تاعى 28 ميلليون تەكشە مەتر سۋ كەلەدى. باتىس قازاقستاندىقتاردىڭ ناقتى مۇقتاجدارىنا قوسىمشا 131 ملن تەكشە مەتر سۋ قاجەت. سونىمەن قاتار 1 تەكشە مەتر سۋدى جەتكىزۋ قۇنى ورتاشا ەسەپپەن 4،6 ءرۋبلدى قۇرايدى.

«ەكى وزەننىڭ بويىندا ورنالاسقان شاعىن سۋ قويمالارىنىڭ سىيىمدىلىعى 211 ملن م3 قۇرايدى. بىراق قازىر بۇل سۋ قويمالارى بوس تۇر دەۋگە بولادى. ول ءوز كەزەگىندە، سۋدىڭ جويىلۋىنا، مينەرالدانۋىنا، لاستانۋىنا جانە بالىقتار مەن مالداردىڭ ەرىكسىز قىرىلۋىنا اكەپ سوعۋدا. سۋ ماسەلەسىنىڭ كۇردەلىلىگى سونشالىق، شارۋا قوجالىقتارى جەم-ءشوپ دايىنداۋ ءۇشىن قاجەتتى جايىلمالارعا جىبەرىلەتىن سۋدى شەكتەۋگە ءماجبۇر بولىپ وتىر. ولار ەندىگى كەزدە مال سۋارۋعا سۋ جەتسە سوعان قۋاناتىن بولدى»، دەيدى ناريمان تورەعاليەۆ.

وبلىس الدىندا تۇرعان نەگىزگى مىندەتتەردىڭ ءبىرى مال باسىن كوبەيتۋ، ونى وڭدەۋ جانە ەكسپورتتاۋ بولىپ تابىلادى. سۋ تاپشىلىعى بۇل ماقساتتى جۇزەگە اسىرۋعا ايتارلىقتاي كەدەرگى كەلتىرىپ كەلەدى.

«سوڭعى جىلدارى شارۋا قوجالىقتارى مەملەكەتتىك باعدارلامالاردىڭ كومەگىمەن شەتەلدەن اسىل تۇقىمدى مال ساتىپ الۋدا. بىراق قازىرگى پروبلەمالاردىڭ كەسىرىنەن بارلىق مالدان ايىرىلىپ قالۋ قاۋپى بار»، دەيدى سەناتور.

ناريمان تورەعاليەۆ قارجىلاندىرۋ ماسەلەسىن دە قوزعادى. دەپۋتاتتىڭ ايتۋىنشا، وتكەن جىلى 2021-2023 جىلدارعا ارنالعان رەسپۋبليكالىق بيۋدجەتتى بەكىتۋ كەزىندە باتىس ءوڭىرىنىڭ تۇرعىندارىنا سۋ جەتكىزۋ شىعىندارىن وتەۋ ماسەلەسى قولداۋ تاپپادى.

«وبلىستاعى بۇل وزەكتى ماسەلە مال شارۋاشىلىعىمەن اينالىسۋدا قيىندىق تۋدىرىپ قانا قويماي، سونىمەن قاتار مەملەكەت باسشىسىنىڭ بالىق شارۋاشىلىعىن دامىتۋ جونىندەگى تاپسىرماسىن ورىنداۋعا تەرىس اسەر ەتەدى»، دەدى دەپۋتات.

سەناتور ءوز ساۋالىندا ۇكىمەت باسشىسىنان بيىلعى جىلدىڭ اقپان-ناۋرىز ايلارىندا بيۋدجەتتى ناقتىلاۋ كەزىندە 131 ملن م3 كولەمىندە سۋ جەتكىزۋ جونىندەگى شىعىستارعا قوسىمشا 3،5 ملرد تەڭگە ءبولۋدى سۇرادى. بۇل باتىس قازاقستان وبلىسىندا مال شارۋاشىلىعىن دامىتۋعا مۇمكىندىك بەرەتىن قارجى كولەمى.