ساياسات • 25 قاڭتار، 2021

ب.بايبەك: نۇروتاندىق دەپۋتاتتىڭ 616-سى – جاستار

157 رەت كورسەتىلدى

ەلباسى، پارتيا ليدەرى نۇرسۇلتان نازارباەۆتىڭ كەلىسىمىمەن «Jas Otan» ورتالىق كەڭەسىنىڭ وتىرىسىندا نۇرجان جەتپىسباەۆ «Nur Otan»-نىڭ جاستار قاناتىنىڭ جاڭا باسشىسى بولىپ سايلاندى. بۇل تۋرالى پارتيا توراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى جازباسىندا ايتتى، دەپ حابارلايدى Egemen.kz

«بۇگىندە «Jas Otan» – 20 جىلدىق تاريحى بار جاي عانا جاستار ۇيىمى ەمەس، ماڭىنا 35 جاسقا دەيىنگى 100 مىڭنان استام بەلسەندى قازاقستاندىقتى توپتاستىرعان ءىرى بىرلەستىك. دامىعان وڭىرلىك ينفراقۇرىلىمى، زاڭ شىعارۋشى جانە بارلىق دەڭگەيدەگى وكىلدى ورگانداردا دەپۋتاتتىق كورپۋسى بار ىرگەلى ۇيىم.

وسى سايلاۋدا «Nur Otan» پارتياسى جاستارعا جۇيەلى قولداۋ كورسەتتى، ولاردىڭ وكىلدەرى شتاب مۇشەلەرىمەن بىرگە بەلسەندى ۇگىت-ناسيحات جۇمىستارىن جۇرگىزىپ، بارلىق دەرلىك سايلاۋالدى ءىس-شارالارعا قاتىستى.

1

سايلاۋ قورىتىندىسى بويىنشا ەلباسى بەلگىلەگەن كۆوتانىڭ ارقاسىندا ءبىزدىڭ پارتيادان بارلىق دەڭگەيدەگى ماسليحاتتارداعى جاس دەپۋتاتتاردىڭ سانى 3 ەسە، ياعني 7-دەن 23%-كە دەيىن ارتتى. وسىلايشا، 2701 نۇروتاندىق دەپۋتاتتىڭ 616-سى – جاستار وكىلدەرى بولدى.

ولار 6 ميلليوننان استام قازاقستاندىق جاستاردىڭ مۇددەسىن بىلدىرەتىن بولادى»، دەپ جازدى باۋىرجان بايبەك.

سونداي-اق، باۋىرجان بايبەك پارتيا تاراپىنان جاستاردى قولداۋ ماقساتىندا اتقارىلاتىن ءىس-شارالار جانە «Jas Otan» جق مەن جاس دەپۋتاتتارعا جۇكتەلەتىن مىندەتتەرگە توقتالدى.

«وزدەرىڭىزگە بەلگىلى، ەلباسىنىڭ قاتىسۋىمەن تاياۋدا وتكەن «Jas Otan»-نىڭ سەزىندە 5 جىلدىق «جاستار-وتانعا!» باعدارلاماسى قابىلدانعان بولاتىن. بۇل قۇجات جاستاردى قولداۋ بويىنشا 100 ناقتى جۇيەلىك شارانى قامتيدى. ولاردىڭ قاتارىندا الەۋمەتتىك ليفتىلەر قۇرۋ جانە جاستار باستامالارىن جۇزەگە اسىرۋ، جۇمىسقا ورنالاستىرۋ جانە ءبىلىم ساپاسىن كوتەرۋ سەكىلدى كوپتەگەن ماسەلەلەر بار.

«Jas Otan»-نىڭ جاڭا باسشىلىعى مەن جاس دەپۋتاتتىق كورپۋس الدىندا وسى باعدارلامانى ءتيىمدى جۇزەگە اسىرۋ مىندەتى تۇر.

ەڭ الدىمەن، باعدارلامانىڭ ءاربىر باعىتىنا جاۋاپتىلاردى بەلگىلەي وتىرىپ، رەسپۋبليكالىق جانە 216 وڭىرلىك جول كارتاسىن بەكىتۋ قاجەت.

تاعى ءبىر ماڭىزدى مىندەت – مەملەكەت باسشىسى قاسىم-جومارت توقاەۆتىڭ «جاستار ساياساتى تۋرالى» جاڭا زاڭ ازىرلەۋ جونىندەگى تاپسىرماسىن جۇزەگە اسىرۋ. ءبىزدىڭ جاس دەپۋتاتتارىمىز «Jas Otan»-مەن بىرلەسىپ، پارتيانىڭ قولداۋىمەن وسى جۇمىسقا بەلسەندى اتسالىسۋى، جاستاردى جۇمىلدىرىپ، ساراپشىلار توپتارى اراسىندا جان-جاقتى تالقىدان وتكىزۋى ءتيىس.

«Jas Otan»-نىڭ جاڭا باسشىلىعى مەن جاس دەپۋتاتتارىمىز العا قويىلعان مىندەتتەردى ابىرويمەن اتقارىپ شىعادى دەپ سەنەمىن. قيىندىقتاردى ەڭسەرىپ، جەڭىسكە بىرگە جەتەمىز!»، دەپ تۇيىندەدى  دەدى ب.بايبەك.

سوڭعى جاڭالىقتار

ۇقساس جاڭالىقتار