ەلەكتر كۇبى جاسادى

وقيعا • 20 قاڭتار، 2021

ەلەكتر كۇبى جاسادى

23 رەت كورسەتىلدى

ەل ىشىندە ون ساۋساعىنان ونەر تامعان شەبەر دە ەڭبەكقور جاندار كوپ. سولاردىڭ ءبىرى – قاراعاندى وبلىسىنداعى بۇقار جىراۋ اۋدانىنا قاراستى بايقادام اۋىلىندا تۇراتىن قايروللا مالىك ەسىمدى ازامات.

قايرات ءابىلدا

تاياۋدا شەبەر ەلەكتر كۇبى جاساپ شىعاردى. بۇل كۇبىنىڭ ەرەكشەلىگى سول، ول قىمىزدى ءبىر مينۋتتا 60 مارتە، ءتىپتى 70 رەت تە پىسەدى ەكەن. وسىنداي جولمەن دەمدەلگەن قىمىزدىڭ ءدامى قولمەن پىسىلگەنىنەن ءبىر دە ءبىر كەم ەمەس دەگەندى ايتادى بىلەتىندەر.

– ەلەكتر كۇبى جاساۋ يدەياسى قىمىزدىڭ ەمدىك قاسيەتىنە بايلانىستى تۋىندادى. قىمىزدى ادەتتە قولمەن پىسەدى عوي. شاكىرتىم ەكەۋمىز سول جۇمىستى قالاي جەڭىلدەتسەك دەپ ىزدەندىك. مەن وعان كۇبىنىڭ ديزاينى تۋرالى ايتتىم. سودان كەيىن ەلەكتر قۋاتىنىڭ كومەگىمەن قىمىز ءپىسۋدىڭ ىرعاعى مەن رەتتىلىگىن بۇزباي كۇبىنى جاساپ شىعاردىق، – دەيدى قايروللا مالىك.

قازىرگى تاڭدا ول ءوزى جاساعان ەلەكتر كۇبىسىنە پاتەنت الۋ ءۇشىن قاجەتتى قۇجاتتاردى جيناستىرىپ ءجۇر.

قايروللا مالىكتىڭ قولىنان كەلمەيتىنى جوق. ول كۇبىدەن باسقا ءتۇرلى مۋزىكالىق اسپاپتاردى جاسايدى. شەبەردىڭ قولىنان شىققان قوبىز، دومبىرالار ونەر ادامدارى تاراپىنان جوعارى سۇرانىسقا يە. ءوزىنىڭ ايتۋى بويىنشا، ەڭ العاشقى دومبىراسىن 7-سىنىپتا وقىپ جۇرگەنىندە شاپقان ەكەن. سونىمەن قاتار ول كەلىستىرىپ ات ابزەلدەرىن جانە تاستان قاشاپ ديىرمەن دە جاسايدى.

قايروللا مالىك الداعى ۋاقىتتا باياعىداعى حانداردىڭ كوشپەلى ارباسىن قالپىنا كەلتىرىپ، كيىز ءۇيدىڭ ەتنوگرافيالىق نەگىزىن ساقتاپ قالاتىن جىلجىمالى مۇراجاي ۇيىمداستىرعىسى كەلەدى.

بۇگىندە ول قاراعاندىداعى گۋمانيتارلىق كوللەدجدە ۇستازدىق ەتىپ، ءوزىنىڭ بىلگەنىن جاس بۋىنعا ۇيرەتىپ ءجۇر.

قاراعاندى وبلىسى،

بۇقار جىراۋ اۋدانى