قازاقستاننىڭ ەرلەر قۇراما كومانداسى مۇشەلەرى اراسىندا ەڭ ۇزدىك ناتيجە 60 كيلو سالماقتا كۇش سىناسىپ جۇرگەن ەلدوس سمەتوۆكە تيەسىلى. پارسى شىعاناعىندا قانداسىمىز ءساتسىز ونەر كورسەتكەنىمەن, بۇعان دەيىن جيعان ۇپاي قورى الەمدىك رەيتينگتەگى ءوز ورنىن ساقتاپ قالۋ ءۇشىن جەتكىلىكتى بولدى. بۇگىنگى تاڭدا ەلدوس بەسىنشى ساتىعا نىق تابان تىرەپ تۇر. ونىڭ قورجىنىندا 5 218 ۇپاي بار. ءدال وسى سالماقتا ونەر كورسەتەتىن عۇسمان قىرعىزباەۆ ۇزدىك وندىقتى قورىتىندىلاۋدا. دوحاداعى ساتسىزدىكتەن كەيىن ول ەكى ساتىعا تومەندەدى. عۇسمان 4 186 ۇپايدى ەنشىلەۋدە. قازىرگى كەزدە ەكەۋىنىڭ دە توكيوعا بارۋىنا تاماشا مۇمكىندىگى بار. الايدا وليمپيا ويىندارىنا ءبىر سالماق دارەجەسىندە جالعىز عانا بالۋاننىڭ بەلدەسەتىنىن ەسكەرگەن ءجون. ياعني الداعى تۋرنيرلەردە قوس قانداسىمىزدىڭ اراسىنان كىم كوپ ۇپاي جيسا, عالامدىق دوداعا سول بارادى.
66 كيلو سالماقتا دا قوس مىقتى ءوزارا تىرەسۋدە. الايدا ءدال قازىرگى كەزدە ەلدوس جۇماحانوۆقا قاراعاندا ەرلان سەرىكجانوۆتىڭ كورسەتكىشى ءبىرشاما جوعارى. بۇل كۇندەرى ەرلان (3 583 ۇپاي) 11-ورىندا تۇرسا, ەلدوس (2 457 ۇپاي) 25-ساتىعا سىرعىپ ءتۇستى. سونداي-اق «توپ-10» دزيۋدوشىنىڭ قاتارىنا تاعى ەكى جەرلەسىمىز ەنىپ وتىر. ولار – جانساي سماعۇلوۆ (2 930 ۇپاي) پەن يسلام بوزباەۆ (2 526 ۇپاي). 73 كيلو سالماقتا كۇرەسەتىن جانساي ماستەرس تۋرنيرىندە ءتاۋىر ناتيجە كورسەتىپ, بەسىنشى ورىندى يەمدەندى. سونىڭ ارقاسىندا بىردەن جەتى ساتىعا جوعارىلاپ, قازىرگى كەزدە 19-ورىندى ەنشىلەۋدە. 90 كيلو سالماقتا كۇرەسەتىن يسلام ءوز ورنىن ساقتاپ قالدى. ول 20-ورىندى قاناعات تۇتۋدا. سونىمەن قاتار ديدار حامزانىڭ دا (2 010) وليمپياداعا قاتىسسام دەگەن ءۇمىتى بار. 81 كيلو سالماقتا ونەر كورسەتەتىن دارىندى جاس 28-ورىنعا تۇراقتادى. بىراق الداعى ۋاقىتتا ديدار نامىسىن قامشىلاپ, قارقىنىن كۇرت كۇشەيتۋگە ءتيىس. ويتكەنى ءبىر توپ دزيۋدوشى ونى وكشەلەپ كەلەدى. ەگەر ديدار الداعى جارىستاردا دا ءدال قازىرگىدەي كۇرەسەتىن بولسا, جاپونياداعى جارىستان شەت قالۋى دا مۇمكىن.
وكىنىشكە قاراي, وزگە جەرلەستەرىمىزدىڭ قارقىنى باسەڭ. اسىرەسە ءبىزدى الىپتاردىڭ جاعدايى الاڭداتادى. ماسەلەن, 100 كيلو سالماقتا ايبەك سەرىكباەۆ (893 ۇپاي) 49-ورىندا تۇرسا, ۆيكتور دەميانەنكو (514 ۇپاي) 65-ساتىدا. اسا اۋىر سالماقتاعى ەلىمىزدىڭ ەڭ مىقتى بالۋانى ەراسىل قاجىباي (1 151 ۇپاي) نەبارى 38-ورىندى قاناعات تۇتۋدا. بايىپتاپ قاراساڭىزدار, ولاردىڭ جيعان ۇپايلارى دا تىم ماردىمسىز. ارينە, وسىنداي باياۋ جۇرىسپەن الىپتارىمىزدىڭ جاپونياعا جەتە المايتىنى انىق.
ال قىز-كەلىنشەكتەردىڭ جاي-كۇيى جايىندا اڭگىمەلەۋدىڭ ءوزى قيىن. ءدال قازىر تەك وتگونتسەتسەگ گالبادراح قانا وليمپيادا جولداماسى يەلىك ەتە الادى دەپ نىق سەنىممەن ايتۋعا بولادى. 48 كيلو سالماقتا بەلدەسەتىن ول 3 353 ۇپاي جيىپ, الەمدىك رەيتينگتە 13-ورىندى ەنشىلەۋدە. قالعاندارى ءتۇرلى دودالارعا ۇزدىكسىز قاتىسقانىمەن, العاشقى اينالىمداردان اسا الماي ءجۇر. توقەتەرىن ايتساق, گالبادراحتان باسقا قازاقستاننىڭ قىزدار قۇراما كومانداسىنىڭ وزگە مۇشەلەرى, تىپتەن «توپ-40» دزيۋدوشىنىڭ قاتارىنا دا ەنە الاتىن ەمەس.
ال قازىرگى كەزدە سپورتتىڭ بۇل تۇرىندە قاي مەملەكەتتەر وكىلدەرىنىڭ قارقىنى كۇشتى دەگەن ساۋال تۋىنداسا, وعان ايتار جاۋابىمىز دايىن. ماسەلەن, الەمدىك رەيتينگتە «توپ-10» دزيۋدوشىنىڭ قاتارىندا جاپونيانىڭ توعىز بىردەي وكىلى بار. وسى جايتتىڭ ءوزى-اق كۇنشىعىس ەلىنىڭ قىزدارى ءالى دە تۇعىردان تايماعانىن اڭعارتسا كەرەك. ارينە, وعان تاڭدانۋعا بولماس. سەبەبى جاپونيا – دزيۋدو كۇرەسىنىڭ وتانى. جانە دە جاپونيالىق بالۋاندار قانداي جارىسقا قاتىسسا دا, ۇنەمى بيىك تۇعىرلاردان كورىنەدى.
گرۋزيا مەن رەسەي قۇرامالارى ەكىنشى جانە ءۇشىنشى ورىنداردى ءوزارا بولىسۋدە. ولاردىڭ ارقايسىنىڭ التى بالۋانى جوعارىداعى تىزىمدە. يزرايل مەن نيدەرلاند دزيۋدوشىلارىنىڭ دا جاعدايى جامان ەمەس. مىقتىلار قاتارىندا اتالعان مەملەكەتتەردەن بەس بالۋاننان بار. سونداي-اق الەمدىك رەيتينگتىڭ ۇزدىك وندىعىندا مىندا ەلدىڭ وكىلدەرى تىركەلگەن. وڭتۇستىك كورەيا – 4, موڭعوليا, برازيليا, ازەربايجان, كانادا, تۇركيا – 3, قازاقستان, وزبەكستان – 2, يسپانيا, تايپەي, يتاليا, شۆەتسيا, كوسوۆو, بەلگيا, گەرمانيا, بولگاريا, كۋبا, سەربيا, ماجارستان, چەحيا, پورتۋگاليا جانە ۋكراينا – 1.
الەمدىك رەيتينگتە كوش باستاپ تۇرعان دزيۋدوشىلار
60 كيلو: 1. ريۋدزيۋ ناگاياما (جاپونيا), 2. روبەرت مشۆيدوبادزە (رەسەي), 3. ناوحيسا تاكاتو (جاپونيا).
66 كيلو: 1. مانۋەل لومباردو (يتاليا), 2. ۆاجا مارگۆەلاشۆيلي (گرۋزيا), 3. دزيوسيرو مارۋياما (جاپونيا).
73 كيلو: 1. سويچي حاسيموتو (جاپونيا), 2. رۋستام ورۋدجەۆ (ازەربايجان), 3. ان چانگ ريم (وڭتۇستىك كورەيا).
81 كيلو: 1. ماتتياس كاسس (بەلگيا), 2. ساگي مۋكي (يزرايل), 3. شوتا گريگالاشۆيلي (گرۋزيا).
90 كيلو: 1. نيكولوس شەرازاداشۆيلي (يسپانيا), 2. نوەل ۆان ’تەند (نيدەرلاند), 3. يۆان فيليپە سيلۆا مورالەس (كۋبا).
100 كيلو: 1. ۆارلام ليپارتەلياني (گرۋزيا), 2. پەتەر پالچيك (يزرايل), 3. جورجە فونسەكا (پورتۋگاليا).
+100 كيلو: 1. لۋكاس كرپالەك (چەحيا), 2. ينال تاسوەۆ (رەسەي), 3. گۋرام تۋشيشۆيلي (گرۋزيا).
