فينالدىق جەكپە-جەكتە ول باتىس قازاقستان وبلىسى اتىنان تارتىسقا تۇسكەن ساقا تەننيسشى داستان كەنجەعۇلوۆتى تىزە بۇكتىردى. ءسويتىپ ول ەرەسەكتەر اراسىندا چەمپيون بولعان ەڭ جاس تەننيسشى اتانىپ, قازاق سپورتىنىڭ شەجىرەسىنە ءوز ەسىمىن جازدى.
الان ۇستەل تەننيسىنىڭ الىپبيىمەن جەتى جاسىندا تانىسىپتى. جاس بالاعا ويىننىڭ ۇناعانى سونشا, ول جاتتىعۋ زالىنان شىققىسى كەلمەي, ەرتەدەن كەشكە دەيىن تەننيس وينايدى ەكەن. ءوزى قۇرالپى بالالار ءبىر, ءبىر جارىم ساعات جاتتىقسا, بۇل ولاردان ەكى ەسە كوپ جۇمىس ىستەيتىن كورىنەدى. بالانىڭ مۇنداي قۇلشىنىسىن بايقاعان ەلميرا اليەۆا سىندى سۇڭعىلا باپكەر وعان بىردەن نازار اۋدارىپ, قاناتىنىڭ استىنا العان.
البەتتە, جەتكىنشەكتىڭ مۇنداي تالپىنىسى ءوزىنىڭ جەمىسىن بەرمەي قويمادى. ارادا ەكى جىل وتكەندە جاستارى وزىمەن شامالاس بالالاردى شاڭ قاپتىرىپ, ەل چەمپيونى اتاندى. ال ءبىر جىلدان كەيىن الان وزىنەن ءۇش-ءتورت جاس ۇلكەن ويىنشىلاردى تۇگەل جەڭىپ, قازاقستان چەمپيوناتىندا توپ جاردى. سونىمەن بىرگە ول ۇستەل تەننيسىنەن ەلىمىزدەگى ەڭ جاس سپورت شەبەرى اتاعىنا دا يە بولدى.
ەل ىشىندە وزىنە توتەپ بەرە الاتىن قارسىلاس تابىلماعان سوڭ, جاس دارىن حالىقارالىق دودالاردا مىقتىلارمەن كۇش سىناسا باستادى. ۇستەل تەننيسىنە دەگەن ۇلكەن ماحاببات جانە ەرىنبەي توككەن تەردىڭ جەمىسى الان سىندى العان بەتىنەن قايتپايتىن قايسار ۇلدىڭ مەرەيىن وسىرە تۇسكەن بولاتىن.
سول جىلى ول ءتورت بىردەي ءىرى تۋرنيردە جەڭىس تۇعىرىنىڭ ەڭ بيىك ساتىسىنا كوتەرىلدى. اتاپ ايتقاندا, الماتى قالاسىندا وتكەن رەسپۋبليكالىق ىرىكتەۋ جارىسىندا, ودان كەيىن بىشكەكتە جالاۋ كوتەرگەن ورتالىق ازيا بويىنشا دودادا توپ جاردى. ىلە, تايلاندتا بولعان ازيا قۇرلىعىنىڭ ىرىكتەۋ تۋرنيرىندە قارسىلاس شاق كەلتىرمەدى. سونان سوڭ وماندا وتكەن الەمدىك ىرىكتەۋ جارىسىندا تاعى دا جەڭىس بيىگىنە كوتەرىلگەن. ناتيجەسىندە, الان قۇرمانعاليەۆ حالىقارالىق ۇستەل تەننيسى فەدەراتسياسىنىڭ (ITTF) شەشىمىمەن Hopes Week قۇرلىقارالىق جانە الەمدىك تۋرنيرلەرىنىڭ قورىتىندىسى بويىنشا 2019 جىلدىڭ ەڭ ۇزدىك ءجاسوسپىرىم تەننيسشىسى بولىپ تانىلدى!
«اتالعان جاڭالىقتى ينتەرنەتتەن ءبىلدىم, – دەيدى الاننىڭ ءوزى. – ارينە, قۋانىشىمدا شەك بولمادى. ول سىندا ويىن ۇستىندەگى ەڭ ۇزدىك تەحنيكا, شاردى ۇرۋ جانە ونى زىر اينالدىرۋ سىندى تاسىلدەر ساراپقا تۇسكەن ەكەن. بۇدان بولەك, جاتتىعۋلارداعى ىنتا مەن تۋرنيرلەر اراسىنداعى ءتارتىپ ماسەلەسى دە قارالىپتى. بۇل ناتيجە مەنىڭ مەرەيىمدى وسىرە ءتۇستى. سونىمەن بىرگە, ارينە, جاۋاپكەرشىلىك تە جۇكتەيدى».
الان جاستىعىنا قاراماستان, جاتتىعۋ ۇستىندە بوساڭسۋعا جول بەرمەيتىن وتە ىقتياتتى, جاۋاپكەرشىلىگى زور بالا ەكەن. باپكەرىنىڭ ايتقانىن ەكى ەتكىزبەي ورىندايتىن تارتىپتىلىگى ونى باسقالاردان ەرەكشەلەندىرىپ تۇراتىن كورىنەدى. ياعني ويىن بالاسى بولسا دا جاتتىعۋدا, تۋرنير بارىسىندا ءوزىنىڭ بايسالدى, سابىرلى قالپىن مەيلىنشە قاتاڭ ساقتاي بىلەدى ەكەن.
«الان – تالانتتى عانا ەمەس, وتە ەڭبەكقور بالا. سونىڭ ارقاسىندا جوعارى كورسەتكىشتەرگە قول جەتكىزىپ ءجۇر», دەيدى ونىڭ جەكە باپكەرى, قازاقستاننىڭ ەڭبەك سىڭىرگەن جاتتىقتىرۋشىسى ەلميرا اليەۆا.
جاس دارىننىڭ اناسى تاتيانا پەرتسەۆا ۇلىنىڭ وزىنە ۇنايتىن سپورت ءتۇرىن اداسپاي تاپقانىنا قۋانىشتى ەكەنىن جاسىرمايدى. «جاس كەزىندە كوپ اۋىراتىن. قالاي سپورتپەن اينالىسا باستادى, سولاي اۋر-سىرقاۋ دەگەندى مۇلدە ۇمىتتىق. ءتارتىبى دە تۇزەلىپ, ۋاقىتتى ءتيىمدى جانە دۇرىس پايدالانۋدى ۇيرەندى», دەيدى اناسى مەرەيلەنىپ.
الان – تەكتى تۇقىمنان تامىر تارتقان ورەن. اتاسى حاكىم قۇرمانعاليەۆ ۇلى وتان سوعىسىندا باتىرلىعىمەن كوزگە تۇسكەن جاۋىنگەر بولىپتى. ءتىپتى مايدان دالاسىندا كورسەتكەن كوزسىز ەرلىگى ءۇشىن كەڭەس وداعىنىڭ باتىرى اتاعىنا ۇسىنىلعان كورىنەدى. ال الاننىڭ ءوز اكەسى دەنيس قۇرمانعاليەۆ قۇرىلىسشى بولىپ جۇمىس ىستەيدى. ونىڭ ايتۋىنشا, بالاسىنىڭ بويىنداعى ەڭبەكقورلىق پەن تاباندىلىق قاندا بار قاسيەت ەكەن. «مەن الاننىڭ ءبىزدى ۇياتقا قالدىرماي, ءوزىنىڭ كوزدەگەن ماقساتىنا جەتەتىنىنە سەنىمدىمىن», دەيدى دەنيس.
الان سىندى تۋما تالانتتىڭ ارمانى دا اسقاق: ەندى ول ازيا, الەم چەمپيوناتتارىندا جەڭىسكە جەتىپ, ودان كەيىن ءوليمپتىڭ شىڭىن باعىندىرۋدى الدىنا ماقسات ەتىپ قويعان.
قاراعاندى
