ءبىلىم • 19 قاڭتار، 2021

شىعىس قازاقستاندا وقۋشىلار قالاي وقىپ جاتىر؟

12 رەت كورسەتىلدى

شىعىس قازاقستان وبلىسىندا 2020 جىلعى 1 قىركۇيەك پەن 2021 جىلعى 18 قاڭتار ارالىعىندا 1037 وقۋشى كوروناۆيرۋس ينفەكتسياسىن جۇقتىرعان، دەپە حابارلايدى Egemen.kz

217 وقۋشى كەزەكشى سىنىپتاردا وقيتىندار، قالعان 820-سى قاشىقتىقتان ءبىلىم الىپ جاتقاندار. 18 قاڭتارداعى اقپاراتقا سايكەس 1 037 وقۋشىنىڭ 970-ءى قاۋىپتى ۆيرۋستان ساۋىعىپ، قازىرگى تاڭدا وقۋىن قايتا جالعاستىرىپ جاتىر.

مەكتەپ قابىرعاسىندا COVID-19 ۆيرۋسىن جۇقتىرعان وقۋشى انىقتالعان جاعدايدا، سانيتاريالىق-ەپيدەميولوگيالىق تالاپتارعا سايكەس، مەكتەپتەردەگى كوروناۆيرۋس ينفەكتسياسىنىڭ وشاعى بولىپ تابىلاتىن سىنىپتارعا قاشىقتىقتان وقىتۋعا اۋىستىرۋ تۋرالى قاۋلى شىعارىلدى. قاۋىپتى ۆيرۋس انىقتالعان بارلىق مەكتەپتەردە ەپيدەمياعا قارسى سانيتاريالىق-دەزينفەكتسيالىق ءىس-شارالار جۇرگىزىلدى.

وبلىستىق باس مەملەكەتتىك سانيتاريالىق دارىگەرىنىڭ 2021 جىلعى 3 قاڭتارداعى №26-2 قاۋلىسىنا سايكەس، 2020-2021 وقۋ جىلىنىڭ ءۇشىنشى توقسانىنان باستاپ كونتينگەنتى 300 وقۋشىعا دەيىن قالالىق جانە اۋىلدىق مەكتەپتەردە سىنىپتارداعى بالالار سانى 15 ادامعا دەيىن ءداستۇرلى فورماتتا وقۋعا رۇقسات بەرىلدى.

سىنىپتاعى بالا سانىن 15-تەن اسىرماي، اتا-انالاردىڭ ءوتىنىشى بويىنشا جالپى ءبىلىم بەرەتىن مەكتەپتەردە 1-دەن 5 (7) سىنىپقا دەيىن قوسا العاندا كەزەكشى سىنىپتاردىڭ وقۋىنا رۇقسات ەتىلگەن.

وقۋ بىتىرەتىن سىنىپتار (9، 11 (12) سىنىپتار) اپتانىڭ 6 كۇنى ىشىندە ارالاس وقۋ قولدانىلادى: پاندەردىڭ 70%-ىن شتاتتىق رەجىمدە، 30%-ىن قاشىقتىقتان وقۋ فورماتىندا جۇزەگە اسىرىلادى.

ءبىلىم بەرۋ مەكەمەسى اكىمشىلىگىنىڭ شەشىمى بويىنشا ساباقتان تىس ۋاقىتتا 5 ادامنان اسپايتىن توپتاردا وقۋشىلاردى جەكە وقىتۋعا رۇقسات بەرىلگەن.

سوڭعى جاڭالىقتار

ۇقساس جاڭالىقتار