تومەنگى پالاتانىڭ قارجى جانە بيۋدجەت كوميتەتىنىڭ مۇشەلەرىنە پرەمەر-ءمينيسترىنىڭ ءبىرىنشى ورىنباسارى ەتىپ تاعايىنداۋ ءۇشىن ءاليحان اسحان ۇلى سمايىلوۆتىڭ كانديداتۋراسى ۇسىنىلدى. ال ۇكىمەت باسشىسىنىڭ ورىنباسارلارى قىزمەتتەرىنە ۇسىنىلعان رومان ۆاسيلەۆيچ سكليار مەن ەرالى لۇقپان ۇلى توعجانوۆتىڭ كانديداتۋرالارى ءماجىلىستىڭ ەكونوميكالىق رەفورما جانە وڭىرلىك دامۋ كوميتەتى مەن الەۋمەتتىك-مادەني دامۋ كوميتەتىنە ەنگەن دەپۋتاتتارعا تانىستىرىلدى.
ۇمىتكەرلەر قالىپتاسقان ءراسىم بويىنشا دەپۋتاتتاردىڭ سۇراقتارىنا جاۋاپ بەرىپ, مەملەكەت باسشىسىنىڭ پارلامەنتتىڭ VII شاقىرىلىمداعى I سەسسياسىنىڭ اشىلۋىندا بەرگەن تاپسىرمالارىن ىسكە اسىرۋداعى باسىمدىقتار, سونداي-اق وزدەرى جەتەكشىلىك ەتەتىن باعىتتار بويىنشا جۇمىستى ودان ءارى ۇيىمداستىرۋ جايلى باياندادى.
ماسەلەن, ءاليحان سمايىلوۆقا سالىق مىندەتتەمەلەرىن ورىنداۋدى جەڭىلدەتۋگە, سالىقتار مەن تولەمدەر سانىن قىسقارتۋعا, بيۋدجەتتىڭ مۇنايلىق ەمەس تاپشىلىعىنىڭ مولشەرىن ازايتۋعا جانە جاڭا سالىق ساياساتىنا قاتىستى باسقا دا سۇراقتار قويىلدى.
رومان سكليارعا دەپۋتاتتار كولىكتىڭ بارلىق تۇرىمەن ترانزيتتىك جۇكتەردى تاسىمالداۋ كولەمىن ۇلعايتۋ, ەكونوميكانىڭ باسىم سالالارىندا ءىرى ستراتەگيالىق ينۆەستيتسيالىق جوبالار پۋلىن قالىپتاستىرۋ, سونداي-اق وتاندىق تاۋارلار ءوندىرىسىن ارتتىرۋ جانە جۇمىس ىستەپ تۇرعان كاسىپورىنداردى شيكىزاتپەن قامتاماسىز ەتۋ تۋرالى سۇراقتار قويدى. جەرگىلىكتى ماڭىزى بار اۆتوموبيل جولدارىن سالۋدى قارجىلاندىرۋ, اۋىلدىق ەلدى مەكەندەردى گازبەن قامتاماسىز ەتۋ ماسەلەلەرى دە كوتەرىلدى.
ەرالى توعجانوۆقا دەپۋتاتتار تاراپىنان اۋىلدىق جەرلەردەگى مەديتسينالىق جانە پەداگوگيكالىق كادرلاردىڭ تاپشىلىعى, جاڭا مەكتەپتەر سالۋ جانە جۇمىس ورىندارىن قۇرۋ سياقتى الەۋمەتتىك سالاداعى وزەكتى ماسەلەلەرگا قاتىستى سۇراقتار قويىلدى.
ءماجىلىس دەپۋتاتتارى مينيستر لاۋازىمىنا العاش رەت ۇسىنىلعان ۇمىتكەرلەرگە كوبىرەك سۇراق قويدى. اتاپ ايتقاندا, ۇلتتىق ەكونوميكا ءمينيسترى لاۋازىمىنا ۇسىنىلعان اسەت ەرعاليەۆتىڭ كانديداتۋراسىن كەلىسۋ كەزىندە شاعىن جانە ورتا بيزنەستىڭ ۇلەسىن ارتتىرۋ, مەملەكەتتىك باسقارۋدى ورتالىقسىزداندىرۋ جانە وڭىرلەردەگى بيۋدجەتارالىق قاتىناستاردى جەتىلدىرۋ جايلى مۇددەلى اڭگىمە بولدى. ەڭبەك جانە حالىقتى الەۋمەتتىك قورعاۋ ءمينيسترى لاۋازىمىنا ۇسىنىلعان سەرىك شاپكەنوۆ زەينەتاقى جۇيەسىن دامىتۋ, ەڭ تومەنگى بازالىق الەۋمەتتىك ستاندارتتاردى جەتىلدىرۋ, ەڭبەك نارىعىنداعى سۇرانىسقا يە ماماندىقتار قاجەتتىلىگىن بولجاۋ ادىستەمەسى جانە باسقا وزەكتى ماسەلەلەر حاقىندا ءوز وي-پىكىرلەرىن ورتاعا سالدى.
ماجىلىسمەندەر ءوز سوزدەرىندە ىسكە اسىرىلىپ جاتقان بارلىق باعدارلامانى اياعىنا دەيىن جەتكىزۋ جانە ەلدىڭ داعدارىستان كەيىنگى دامۋى ءۇشىن ساباقتاستىقتى قامتاماسىز ەتۋ ماڭىزدى ەكەنىن اتاپ ايتتى.
ءماجىلىس كوميتەتتەرى وتىرىستارىنىڭ قورىتىندىسى بويىنشا جوعارى لاۋازىمدارعا تاعايىنداۋ ءۇشىن ۇسىنىلعان كانديداتۋرالاردى ماقۇلداۋ تۋرالى شەشىمدەر قابىلداندى.
