ء«ىىم تۇراقتى نەگىزدە ەلىمىزدەگى كوشى-قون احۋالىن مونيتورينگتەيدى. وسى سالاداعى نەگىزگى تاپسىرما – شەتەلدىكتەردىڭ قازاقستان رەسپۋبليكاسىنىڭ زاڭناماسىن ساقتاۋىن جانە رۇقسات ەتىلگەن مەرزىمى اياقتالعان سوڭ ولاردىڭ ەلدەن شىعۋىن باقىلاۋ. سونىمەن بىرگە, كورونوۆيرۋس پاندەمياسى قازاقستانعا كەلەتىن شەتەلدىكتەردىڭ ءومىر سالتى مەن جوسپارىنا بىرقاتار تۇزەتۋ ەنگىزدى. تىكەلەي كولىك قاتىناسىنىڭ بولماۋى ترانزيتتىك ساپار ءۇشىن شەكارالاردى جابۋ, اۆيابيلەتتەر قۇنىنىڭ ءوسۋى فاكتىلەرى كوپتەگەن شەتەلدىكتەردىڭ قازاقستاننان بەلگىلەنگەن مەرزىمدە شىعۋىنا مۇمكىندىك بەرمەيدى. قالىپتاسقان جاعدايدى ەسكەرە وتىرىپ, قر اۋماعىندا كورونوۆيرۋس ينفەكتسياسىنىڭ پايدا بولۋى مەن تارالاۋىنا جول بەرمەۋ جونىندەگى ۆەدومستۆوارالىق كوميسسيا شەشىم قابىلداپ, ەلىمىزدە ۋاقىشا بولاتىن شەتەلدىكتەردىڭ مارتەبەسىن زاڭداستىرۋعا جانە قازاقستاندا زاڭنامانى بۇزباۋعا مۇمكىندىك بەرەدى», دەدى قر ءىىم كوشى-قون قىزمەتى كوميتەتى توراعاسىنىڭ ورىنباسارى سابىرجان سەيىتجانوۆ قر ءىىم ۇيىمداستىرعان ونلاين بريفينگتە.
سپيكەردىڭ ايتۋىنشا, نەگىزگى اكتسەنت وتباسىمەن قاۋىشۋعا كەلگەن شەتەلدىكتەرگە, قۇجاتتارىنىڭ جارامدىلىق مەرزىمى وتكەن ازاماتتارعا جانە ەڭبەك ميگرانتتارىنا جاسالعان.
جول ءجۇرۋ قۇجاتتارىنىڭ, شەتەلدىكتىڭ ەلدە تۇرۋ ىقتيارحاتىنىڭ, قازاقستان رەسپۋبليكاسىنىڭ ۆيزالارىنىڭ, ەلدە ۋاقىتشا بولۋدىڭ رۇقسات ەتىلگەن مەرزىمى ءوتىپ كەتكەن نەمەسە مەرزىمى 2021 جىلعى 5 ماۋسىمعا دەيىن اياقتالاتىن شەتەلدىكتەر مەن ازاماتتىعى جوق ادامدار اكىمشىلىك جاۋاپكەرشىلىككە تارتىلماي, ەلدەن شىعۋىنا رۇقسات بەرىلدى. شەتەلدىكتەردىڭ ازاماتتىعى بار ەلىمەن نەمەسە تۇراقتى تۇراتىن ەلمەن تىكەلەي كولىكتىك قاتىناستار (اۆيا, اۆتو جانە تەمىر جول قاتىناستارى, جاياۋ) جانە ترانزيتتىك جول ءجۇرۋ بولماعان جاعدايدا شەتەلدىكتەردى جانە ازاماتتىعى جوق ادامداردى ەلدەن شىعارۋ تۋرالى سوت شەشىمى مەرزىمىنىڭ ورىندالۋى توقتاتىلدى.
«شەتەلدىكتەردىڭ ەلدە بولۋ مەرزىمى (ۆيزالار, ۋاقىتشا تۇرۋعا رۇقساتتار) 2021 جىلدىڭ 5 ماۋسىمىنا دەيىن ۇزارتىلادى. ەڭبەك ەتۋگە رۇقسات نەمەسە وزدىگىنەن جۇمىسقا تۇرۋعا ارنالعان بىلىكتىلىك تۋرالى جەرگىلىكتى اتقارۋشى ورگان بەرگەن انىقتاماسى بارلارعا ۆيزا مەن ۋاقىتشا تۇرۋعا ىقتيارحات شەتەلدىكتىڭ نەمەسە ازاماتتىعى جوق ادامنىڭ ەلگە كەلۋ ماقساتىن تالاپ ەتپەي-اق بەرىلەدى. قر اۋماعىنداعى وتباسىمەن قاۋىشۋ ماقساتىمەن جۇرگەن جانە ازاماتتىق ەلىنەن قۇجاتتاردى ۇسىنا المايتىندارعا ۆيزا شەتەلدىكتىڭ نەمەسە ازاماتتىعى جوق ادامنىڭ ەلگە كەلۋ ماقساتىنىڭ تالاپ ەتپەي بەرىلەدى», دەپ ءتۇسىندىردى س. سەيىتجانوۆ.
رۇقسات بەرۋ, ۇزارتۋ, قايتا رەسىمدەۋ تۋرالى وتىنىشپەن جۇگىنگەن ەڭبەك يمميگرانتىنا «كوشى-قون تۋرالى» قر زاڭىنىڭ 43-1-بابى 2-تارماعىنىڭ تالاپتارىن ەسكەرۋسىز راسىمدەلەدى (ەڭبەك يمميگرانتىنىڭ قر اۋماعىندا ۇزدىكسىز ۋاقىتشا ماكسيمالدى تۇرۋ مەرزىمى ون ەكى ايدان اسپاۋى ءتيىس).
«بۇل رەتتە قازاقستانداعى رۇقسات قۇجاتتارىنىڭ مەرزىمى وتكەن نەمەسە ءوتىپ بارا جاتقان شەتەلدىك ازاماتتار قۇزىرەتتى ورگاندارداعى ءوز قۇقىقتىق مارتەبەسىن ۋاقىتىلى رەتتەستىرۋ ءۇشىن كوشى-قون قىزمەتىنە جۇگىنۋلەرى قاجەت. 2021 جىلدىڭ 1 قاڭتارىنان 5 ماۋسىمىنا دەيىنگى كەزەڭدە قۇقىقتىق مارتەبەلەرىن زاڭ جۇزىندە رەتتەمەگەن شەتەلدىكتەردىڭ قۇقىقتىق جاۋاپكەرشىلىكتەن بوساتىلمايتىنىن ەسكەرتەمىز», دەدى سابىرجان سەيىتجانوۆ.
