ء«بىز عانا ەمەس, كۇللى دۇنيە ءجۇزى مۇلدە جاڭا داۋىرگە بەت بۇردى. وركەنيەتتىڭ دامۋ جولى مەن الەمدىك قۇرىلىمنىڭ ءتۇپ نەگىزى تۇبەگەيلى وزگەرىسكە ۇشىراۋدا. الدىمىزدا سىناقتار مەن سىن-قاتەرلەر از بولمايدى. دەگەنمەن بارلىعىمىزدىڭ ەڭ باستى مىندەتىمىز – پاندەميانىڭ سالدارىن ەڭسەرۋ», دەيدى مەملەكەت باسشىسى قاسىم-جومارت توقاەۆ.
قازاقستان پرەزيدەنتى ءححى عاسىردىڭ 21 جىلى بارشا ادامزات ءۇشىن بەتبۇرىس كەزەڭىنە اينالاتىنىن العا تارتادى.
«بۇل جىل الداعى ونجىلدىقتىڭ باستى باعدارىن ايقىندايدى. مۇنداي كۇردەلى جاعدايدا ۋاقىتتان ۇتىلۋعا جانە ءبىر ساتكە دە بوساڭسۋعا بولمايدى», دەيدى پرەزيدەنت.
