ءوز كەزەگىندە اشىقتىق, ايقىندىق جانە ەسەپتىلىك, تۇتىنۋشىعا تولىق باعدارلانۋ مەن جوعارى قىزمەت كورسەتۋگە نەگىزدەلگەن اقىلدى تسيفرلاندىرۋ, مەملەكەتتىك قىزمەتشىلەردىڭ ادەپ پەن ءمىنسىز-ءجۇرىس تۇرىس ۇلگىلەرىن ساقتاۋى – ازاماتتاردىڭ مەملەكەتتىك ينستيتۋتتارعا سەنىمىنىڭ باستى شارتى.
سوندىقتان مەملەكەتتىڭ 2020 جىلعى سىبايلاس جەمقورلىققا قارسى ساياساتىنىڭ نەگىزگى مىندەتتەرىنىڭ ءبىرى قالا, اۋدان, اۋىلدىق اكىمدىكتەردى سەرۆيستىك ۇلگىگە كوشىرۋ بولدى. ءبىز بۇل جۇمىستى مەملەكەتتىك اپپاراتتىڭ اشىقتىعى مەن تۇتىنۋشىعا باعدارلانۋىن ارتتىرۋعا باعىتتالعان رەسپۋبليكالىق «ادالدىق الاڭى» جوباسى اياسىندا ىسكە اسىردىق. بۇل جوبانىڭ ەلباسىنىڭ باستاماسىمەن قولعا الىنعانىن جانە «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا پرەزيدەنتتىڭ قولداۋىنا يە بولعانىن اتاپ وتكەن ءجون.
انتيكوردىڭ, بارلىق دەڭگەيدەگى اكىمدىكتەر مەن جۇرتشىلىقتىڭ ۇيلەسىمدى جۇمىسىنىڭ ارقاسىندا 317 اكىمدىك سەرۆيستىك فورماتقا كوشتى, بۇل – وبلىستىق ماڭىزى بار قالالار مەن اۋداندار 100 پايىز قامتىلدى دەگەن ءسوز.
«بۇل ازاماتتارعا نە بەرەدى؟» دەگەن سۇراق تۋى مۇمكىن.
بىرىنشىدەن, 900 توسقاۋىلسىز فرونت-كەڭسە جوعارى سۇرانىسقا يە مەملەكەتتىك قىزمەتتەردى جەدەل تۇردە كورسەتىپ قانا قويماي, ازاماتتارعا كوپتەگەن ماسەلەلەر بويىنشا قاراپايىم جانە قولجەتىمدى تۇردە كەڭەس بەرۋگە مۇمكىندىك بەرەدى. ەڭ باستىسى, بۇل شارا ءبىر جەردەن كومەك الۋ مۇمكىندىگىن جاساپ, مەملەكەتتىك قىزمەتشىلەر مەن ازاماتتار اراسىنداعى الشاقتىقتى ايتارلىقتاي ازايتادى.
ەكىنشىدەن, مەملەكەتتىك ءبىلىم بەرۋ جانە دەنساۋلىق ساقتاۋ مەكەمەلەرىنىڭ 5 مىڭنان استام ءبىرىنشى باسشىسى وزدەرىنىڭ ىڭعايلى كەڭسەلەرىنەن شىعىپ, ءبىرىنشى قاباتتاعى «اينەك كابينەتتەردە» جۇمىس ىستەۋگە كوشتى. وسىلايشا, باسشىلار دا قولجەتىمدى بولدى.
ۇشىنشىدەن, 1 400-دەن استام مەملەكەتتىك مەكەمەگە ەنگىزىلگەن open space فورماتىنداعى قىزمەتتىك كەڭىستىك ديزاينى مەملەكەتتىك قىزمەتشىلەردە اشىقتىق پەن ايقىندىق كۇندەلىكتى جۇمىس ستاندارتىنا اينالاتىن جاڭا ادەتتەردى قالىپتاستىرا باستادى.
تۇرمىستىق جەمقورلىقتى جويۋ تۇرعىسىنان مەملەكەتتىك قىزمەتتەردى ۇدەمەلى تسيفرلاندىرۋدى دا اتاپ ءوتۋ ماڭىزدى. ونىڭ دەڭگەيى قازىردىڭ وزىندە 93%. دەمەك, بۇل وسى سالاداعى تۇرمىستىق جەمقورلىقتىڭ بارىنشا تومەندەتىلگەنىن كورسەتەدى. وعان حالىققا 1 ميلليوننان استام مەملەكەتتىك قىزمەت كورسەتكەن سەرۆيستىك اكىمدىكتەردەگى «connection points» دەپ اتالاتىن تسيفرلى وزىنە-ءوزى قىزمەت ەتۋ بۇرىشتارى ايتارلىقتاي ۇلەس قوسۋدا.
تۇتىنۋشىعا باعدارلانعان ءتاسىلدى ەنگىزۋ تۋرالى ايتا كەلە, جىلعا جۋىق ۋاقىتتا ەلىمىزدىڭ ءار ايماعىندا 18 سەرۆيستىك انتيكور ورتالىعىن اشقانىمىزدى اتاپ وتكەن ءجون. قازىرگى تاڭدا ولار ازاماتتار جايلى جاعدايدا كەڭەستەر الاتىن ءبىزدىڭ فرونت-كەڭسەلەر عانا ەمەس, سونىمەن قاتار مەملەكەتتىك ورگاندار مەن قوعام اراسىنداعى سىندارلى سۇحبات الاڭدارىنا اينالدى.
مەملەكەتتىك ورگانداردىڭ جۇمىسىن اشىقتىق, قولجەتىمدىلىك, ايقىندىق جانە ەسەپتىلىك پريزماسى ارقىلى وزگەرتۋ جالعاسا بەرەدى. ءبىزدىڭ مىندەتىمىز – وسى ستاندارتتاردى بۇكىل ەل اۋماعىنا ەنگىزۋ.
اليك شپەكباەۆ,
سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى
