تاۋەلسىزدىك – ۇلتتىق قۇندىلىقتارىمىزدىڭ ۇلىعى, الاش جۇرتىنىڭ ازات ەل ەكەنىن الەمگە ايعاقتايتىن قاسيەتتى ۇعىم. تاۋەلسىزدىك جىلدارى ەلىمىز تۇراقتىلىقتى, حالىقتىڭ اۋىزبىرشىلىگىن ىرگەتاس ەتىپ قالاپ, بىرلىگى بەكەم ەل رەتىندە العا قادام باستىق. الەمگە بەيبىتشىلىكتىڭ جارشىسى, يگى ىستەردىڭ باستاماشىسى رەتىندە تانىلدى. ۇلت تاتۋلىعى, ۇلىستار بىرلىگى الەمگە ۇلگى بولدى. بۇل ءبىزدىڭ تاۋەلسىزدىك جولىندا جەتكەن ۇلكەن جەتىستىگىمىز.
وسى ماقالادا پرەزيدەنتىمىز: «بيىل ايگىلى جەلتوقسان وقيعاسىنا 35 جىل تولادى. 1986 جىلى ورىمدەي ۇل-قىزدارىمىز كەڭەس وداعىنىڭ قاھارىنان قايمىقپاي, ۇلت نامىسى ءۇشىن الاڭعا شىقتى. وسى كۇننەن سوڭ تۋرا بەس جىل وتكەندە تاۋەلسىزدىگىمىزدى جاريالاۋىمىزدىڭ سيمۆولدىق ءمانى زور. بۇل ورايدا ازاتتىقتىڭ العاشقى قارلىعاشتارى – جەلتوقسان قاھارماندارىنىڭ ازاماتتىق ەرلىگى لايىقتى باعاسىن الىپ, جوسپارلى تۇردە ناسيحاتتالۋى كەرەك. ءبىز جىل سوڭىنا دەيىن جاڭا تاريحىمىزداعى بىرنەشە ايتۋلى وقيعانىڭ مەرەيلى بەلەسىن اتاپ وتەمىز» دەگەن ءسوزى ەلىمىزدەگى بارشا جەلتوقسان ارداگەرلەرى مەن ولاردىڭ وتباسىلارىنا زور قولداۋ بولدى.
«جىلى ءسوز جانعا شۋاق, بويعا قۋات سىيلايدى» دەگەن تەگىننەن تەگىن ايتىلماسا كەرەك. سونىمەن قاتار ماقالادا وتكەنىمىز بەن كەلەشەگىمىز تۋرالى تولعانارلىق تالداۋ, بولاشاقتا باعامدار بايىپتى باعىتتار سىلتەگەندەي اسەر بەرەدى. بيىلعى جىلدارى اتقارىلاتىن اۋقىمدى جۇمىستار مەن تىڭ باستامالاردىڭ باسىندا تۇرعان پرەزيدەنتىمىزدىڭ سەرپىندى سەرگەك ويى ەل جۇرتشىلىعىنا تىڭنان كۇش بەرگەندەي بولدى.
سونىمەن قاتار قاسىم-جومارت توقاەۆ «ۇلتتىق بولمىسىمىزدان, ءتول مادەنيەتىمىز بەن سالت-داستۇرىمىزدەن اجىراپ قالماۋ» ءۇشىن «تامىرىمىزدى بەرىك ساقتاۋعا» باعدارلى باعىتتار كورسەتەدى. «مادەني مۇرا» باعدارلاماسىن جالعاستىرۋ, «ناۋرىز» مەرەكەسىن جاڭا سيپاتتا, جاڭاشا ۇلگىدە جان-جاقتى ناسيحاتتاۋ – ەل ەرتەڭى جاستارعا جۇكتەلگەن ماڭىزدى قادام. بۇل بايىپتى باستامالارعا جەلتوقسان ارداگەرلەرى رەتىندە ءبىز دە قولداپ, قۋاتتاپ قوسىلامىز. تاۋەلسىزدىك تۋىن نىق ۇستاعان وتانداستارىمىزعا ايتارىمىز, دەندەرىڭىزگە ساۋلىق, وتباسىلارىڭىزعا اماندىق تىلەيمىن. ەلىمىز امان, اسپانىمىز اشىق, مەملەكەتتىگىمىز ماڭگى, تاۋەلسىزدىگىمىز تۇعىرلى بولسىن! ءبىز ءۇشىن تاۋەلسىزدىك – بارىنەن دە قىمبات!
ماقسات جەڭىس ۇلى,
سوزاق اۋداندىق «جەلتوقسان ارداگەرلەرى» قوعامدىق بىرلەستىگىنىڭ توراعاسى
تۇركىستان وبلىسى,
سوزاق اۋدانى
